А. С. Пушкин лемсэ библиотекасо ютась общественной деятеленть, публицистэнть Николай Храмовонь од книганзо презентация. «Лапти снега не боятся» – истя лемдеви авторонть уш сисемеце книгась. Тей совасть кото мельстуиця ёвтнемат, косо кортамось моли вакссонок эриця лия ёнов а молиця ломантнеде.
Вастовомантень сакшность Николай Леонидовичень малавиксэнзэ, ялганзо, коллеганзо (сон ламо иень перть важодсь газетасо журналистэкс) ды книгань геройтне. Кой-кить уш ловнызь книганть, секскак мерсть, кода шождасто сон ловнови, таркань-таркань пейдят ды нусмакадат.
Васенце ёвтнеманть сон алтызе Феофан старецэнтень, кона эрямонь меельце иетнестэ эрясь Макаровкань монастырьсэ. Сонензэ лезкс ды ознома мельга ардсть эрьва ёндо. Кадык ульнеськак уш сыре, чизэнзэ тензэ сакшность 200-300 ломанть. Храмов вастовсь мартонзо апак учне ды ютксост лиссь паро кортамо, конась те шкас авторонтень кодаяк а стувтови. Феофан батюшкась ламо ёвтнесь эседензэ. Теке марто сон неинзе ды чарькодинзе Николай Леонидовичень оймень мелявксонзо. Феофан старецэсь тусь эрямосто 2013 иестэ. Ансяк те шкас калмонзо лангс, конань велькссэ стявтозь часовня, сакшныть ламо ломанть энялдомаст ды ризнэмаст марто.
Книгань эштё вейке ёвтнемась – «Амати у Тьмати» – пек мельстуиця. Сонзэ геройтнеде фильма эряви снимамс! Тесэ ёвтневи Италиянь мастерэнь скрипкадо, конась пачкодсь мокшонь вейке велес, ды сонзэ азордонзо. Те азорось – Сыре Теризморгань эрицясь Николай Тимофеевич Храмов. Сон чачсь 1914 иестэ. Ютызе Ине Отечественной войнанть, кода тусь кудосто 1939 иестэ, мекев велявтсь 1946 иестэ. Вастовомантень сакшнось Лидия Николаевна тейтерезэ, кона паро мельсэ ёвтнесь тетядонзо:
– Тетям эрямонзо перть налксесь скрипкасо. А кемезеват, тенень сонзэ кияк эзизе тонавто, эзь сода нотат. Пазонь сяткине, нать, ульнесь эйсэнзэ. Пароль слухозо. Васенцеде несь ды марясь скрипка эйкакшпингстэ, кинь-бути свадьбасо, косо чинь перть вансь скрипкасо седиця атянть мельга. Тона макснизе тензэ варчамс. Теде мейле оймамо тарка эстензэ эзь муе, сонсь тейсь эстензэ скрипка. Эряви меремс, тетязо (монь покштям, Тьматя тензэ мерильть) маштсь седямо волынкасо, гитарасо, балалайкасо. Ды вана войнасо политрукось казсь тетянень алкуксонь скрипка. Те эдь стака инструментэсь, аволь эрьва ломанесь тонады седямо, сон изнизе. Седясь ды морась народной, военной морот, нусманят ды пейдевтицят. Теризморгасо сон якиль свадьбава, седиль скрипкасонзо. Гайтезэ ульнесь мазый, аволь эрьва скрипкась истя гайги, сон марявсь велень вейке пестэ омбоце пев. Минек кудос, теке клубов, велень ломантне сакшныльть кунсоломо.
Книгасонть домкасто пачтяви, кода тюрсь немецтнень каршо Н. Т. Храмов, мезе савсь неемс ды печтямс войнасо. Сон тосояк морсиль, ладсиль морот ды лайшиль. Кода войнасто самсто урьвакстсь Прасковья лангс – таго алкуксонь история. Сынь чачтсть-кастсть кавксо эйкакшт. Малав весе истя жо вечкить музыканть ды маштыть седямо кодамояк инструментсэ. Мейле лиссь тамашань тев – свадьбасто самсто Николай Тимофеевич кармась венстямо скрипканть нинстэнь ды сон прась, пек порксавсь. Чевте седеель, эзь карма чумондомо нинзэ, эсь прянзояк эзь чумондо. Скрипканть сон ловсь ломанекс, ялгакс. Кемеде-илядо, пурнынзе велень эрицятнень скрипканть калмамо. Сонсь секе-тев авардсь ды вайгельсэ лайшесь велькссэнзэ. Ломантненьгак эзть кирдеве сельведест. Колмоце чистэнть скрипканть калмизь. Теде мейле Николай ниле иеть ульнесь, кода ней кортыть, покш депрессиясо. Киньгак марто эзь кортне, аштесь мадезь, кувсесь, мезеяк эзь тее. Велесэ натой кортасть, паряк, сон превстэ лиссь. Колмоце эйкакшонь чачомаськак эзизе полавто ёжонзо.
Кие соды, кода ладяволь эрямось седе тов, ансяк… Сынст велень кавто ялакстнэ Чевтайкинтнэ усксть тензэ Московсто лия скрипка. Нама, тесэ ули криминалгак, ансяк мезе а эрси эрямосонть! Скрипкась 1903 иень, немецень. Кадык гайгсь уш тунь лиякс, Николай Тимофеевич теке одс чачсь, таго кармась якамо седямо свадьбава ды клубов. Ярмакт седямонь кис зярдояк эзть сае.
Теризморгав сынст кудос сакшность композитортнэ Г. И. Сураев-Королёв, Н. В. Кошелева, учёноесь ды тонавтыцясь Н. И. Бояркин. Сынь сёрмадызь мирдть-нить Храмовтнень седямост ды морамост. Зяро кирдсть мельсэст-превсэст морот! Ней скрипкась ванстови Храмовтнень нуцькаст Денисэнь кедьсэ. Сон тонавтнесь музыкальной школасо, прядсь скрипка классонь коряс музыкальной училища, эри Ивановасо. Эряви меремс, скрипкань историядонть ушодовськак книганть чачомазо.
Истя жо книгасонть ёвтневи авторонть авадонзо, кона ульнесь Сурань оборонительной рубежсэ ды чувсь латкот. Седейс токиця ёвтнема алтазь предпринимателентень Александр Видясовнень, васенце группань инвалидэнтень, кона стака ранявомадо мейле аволь якамо, озадояк эзь аштеве. Ды, сонськак, паряк, эзь кеме, шкань ютазь сти пильге лангс, тееви покш ломанекс. Александр сакшнось те вастовомантень ды видькстась, весе, мезе сёрмадозь книгасонть сондензэ – алкуксонь эрямозо.
Ламот пурнавозтне арсесть Н.Л. Храмовнень а кадомс сёрмадоманть, кецявтомс ловныцятнень од историясо, содавтомс минек вакссо эриця паро ломантнень марто.
Татьяна Маторкина