– Вера, Верушка, стяк, чипаесь уш менель тёкшс кепететсь! Атякштне моратадызь! – Вера Прохоровань Татьяна Захаровна сырькаензэ овсе арасель мелезэ пувтамс тиринь нуцькинензэ, кадык уды, од удомась пек тантей. Ансяк течи сынст пек ламо тевест. Валске Вера сырги Московов экзаменэнь максомо ды пек покш таркав: Россиянь музыкань академияв, раськень хоронь факультетэв, раськень моронь отделенияв.
Конкурсось, келя, пек покш, весе Союзстонть од ломантне сакшныть, аволь весенень уцяскась мизолгады. Ансяк Верань сырькаезэ кемиль, нуцьказо изни! Эдь сон вишка пингестэ саезь сти моро марто ды мади морсезь. Видькстама, теньсэ чумось аламодо сон. Урьванзо марто пек вечкить морсеме. Свадьбав-ков сынст уш васенцекс тердить. Кадык рузава урьвась, ялатеке весе морсематнень-лайшематнень тонавтнинзе. Вера школань хортнэсэ, концерттнэсэ моронь ушодыця. Виев вайгелезэ, мазый! Сонськак удалась, алкуксонь эрзянь тейтерь!
Отяжеле ёнксонь Пилезелесэ Прохор Иванонь Веранень весе мерить сырнень вайгель. Сон ськамонзо велестэнть морамонь кияванть тусь. Вана кавто иеть уш Чебоксары ошсо музыкань училищасо тонавтни. Ялганзо-оянзо ды тонавтыцянзо превс путызь, келя, Вера, тонеть тесэ а мезе теемс, содамочитнень кастомат Московсо. Сась Вера кудов сырькаензэ кедьстэ превень кевкстеме, кода свал, 19 иензэ перть. «Мезе ней, Таня бабай, теемс, кодамо моро морамс?» А тонась каршонзо: «Тон иля мора, тон лайшек!» Зярыя чить вечкевикс сырькаензэ марто тонавтнесь эрзянь свадьбань одирьвань лайшеманть. Максызе тиринь ломанесь тензэ эсензэ од порань панаронзояк, конасонть мирденень лисекшнесь, пулаензэяк содызе. Пурнызь-сэрнизь Верань веленек Московонь изнямо.
Московось сельведтненень а кеми
1987 ие. Те шканть Вера Прохорова, ней мирдензэ фамилиясо Каяцкая, ледстнесы пек парсте ды пейдезь сюлми эсь прянзо «Приходите завтра» фильмань героинянть Фрося Бурлакова марто. Кода Фросяяк, Вера сась минек масторонь прявт ошов покш мель марто изнямс весе экзаментнэсэ. Эйстэдест Гнесинтнэнь лемсэ Россиянь Музыкань академиянтень эрявсь максомс целанек кото. Одирьвань лайшеманть кисэ Прохорованень путсть сехте покш оценка – «вете». Лия пелькстамотненьгак максынзе, эсензэ мельсэ, а беряньстэ. Ансяк редизе сеске, кодат виевть ды дока од ломанть састь Музыкань академиянтень пряст невтеме. Кой-кить уш ниле иестэ саезь музыкальной школав яксесть, Вера жо кавто иеть ансяк музучилищасо содамочить пурнась. Экзаментнэнь примицятнень ютксто пек явовсь содавикс весенень хормейстерэсь, композиторось, педагогось, раськень искусстванть кисэ аштицясь, СССР-нь народной артисткась Нина Константиновна Мешко. Сон налксеськак мейле Вера Прохоровань эрямосо пек покш роль. Ансяк те мейле, васняяк жо Вера эзизе муе эсь фамилиянзо абитуриенттнэнь спискасо. Весе педе-пес сельмсэнзэ ваннынзе – арась. Те кулясь валгстызе од тейтеренть менельстэ модас ды аволь валгстызе – вачкодизе теке эземс. Сельведтне эзть кирдеве, чумондомс а кинь, ансяк эсь прянть. Ялатеке Верань обуцязо аволь аварькаень, сыргась деканатов видечинь вешнеме, паряк, эштё мезе ёвтыть, паряк, стувтымизь? Истя арсезь, цють эзь эшкеве комиссиянь членэнть, тонавтыцянть, Северэнь хоронь художественной прявтонть Светлана Конопьяновна Игнатьевань мештес. Тонась оймавтызе, келя, иля икелепелев майсе, вешни эйсэть сонсь Нина Мешко. Вера васняяк оргодиксэль, уцясказонзо, Нина Константиновна аштесь крыльця песэ. Кундызе кедте ды максызе Прохорованень телефононзо, мерсь гайневтемс сентябрясто. Вера эзь кемезеве лездамонтень. Паронь апак учне, сон тусь оймсеме велев. Нина Константиновна жо тейтерьканть эзизе стувто ды муизе Галина патянзо вельде. Экзаменэнь максомсто савсь кадомс тонанть кудонь телефононзо. Галя шкань апак сатстне сась Чебоксарсто Пилезелев, мерсь саемс эрзянь оршамопельтнень ды ильтизе Верань Московонь роднянстэнь-раськенстэнь. Тосто гайневтсть Мешконень, ды тонась абунгавтынзе: ванды эряви самс мазыйстэ наряжазь Советской Союзонь Культурань министерствав ды морамс сонсензэ министранть Ивановонь туртов. Роднятне Верань оршневтизь омбо масторонь (импортной), сестэ пек модной, костюмсо. Нина Константиновна жо сялдызе, культурань министранть икелев эряви лисемс ансяк раськень оршамопельсэ, конатнесэ сон ульнесь вокалонь коряс экзаменсэ.
Пельчи сынь Нина Константиновна марто учнесть министранть приёмнойсэ, зярдо тонась прядсынзе тевензэ. Окойники, тердизь. Талноманть васов кекшезь, эрзянь тейтересь поровт лангсто гайгстызе «Самсон леляй» кезэрень моронть, пильгетне сынсь сыргасть киштеме. Те чистэнть Вера ледстни ансяк министранть седеень токновтыця валонзо, а чаманзо, а кабинетэнть сон теке эзинзе нееяк. Пилесэнзэ те шкас гайги: «Спасибо. Идите учитесь. Мы выделяем вам дополнительное место». Истя, 1987 иень сентябрясто Вера Прохорова понгсь Гнесинтнэнь лемсэ Россиянь Музыкань академияв.
Весемесь – эсенек кедьсэ
Вете иетне академиясонть ютасть теке вете чить. Верань туртов тонавтнемась мольсь шождасто. Ломань марто ладиця обуцясь, тонавтнемадонть апелемась, содамочитнень мельга панемась пек лездасть од тейтерентень муемс кель-вал педагогтнень ды од ялгатнень-оятнень марто. Светлана Конопьяновна Игнатьева се шкастонть панжсь студентэнь ансамбля, козонь саизе Вера Прохорованьгак. 1991 иестэ «Россия» Государственной академической рузонь раськень ансамблясь, конань прявтсоль Людмила Георгиевна Зыкина, яволявтсь пелькстамо. Сынь вешнесть од вийть ды од вайгельть. С.К. Игнатьева конкурсонтень ветизе ансамблянзо, ды сынь ютызь ванкшноматнень-кунсоломатнень. Сонськак Светлана Конопьяновна саезель тозонь хормейстерэкс.
Студентэнь эрямось, од порась, дипломонь идемась (тешкстама, Вера саинзе дипломонь темакс эрзянь ды рузонь свадьбатнень) сюлмавсть гастрольтнень марто. «Васенцеде омбо масторов молемась, ине морыцянть Людмила Зыкинань марто концерттнэ – те талновтыця шкась седеяк сюпалгавтызе монь оймем, – ёвтни Вера Ивановна. – Минь неинек, кода роботы Зыкина, тонавтнинек пельдензэ, вастневинек масторонь сехте паро музыканттнэнь марто. Вете иетне, зярс минь важодинек «Россия» ансамблясонть, монень пек ламо макссть».
Вера пурнась содамочить, ды эрзянь кеме обуцясь вешсь лия изнямот. Сонзэ свал ульнесь мелезэ морамс ськамонзо. Апак учо лиссь тарка «Садко» рузонь музыкань ансамблясонть, ды те коллективенть марто Вера Прохорова (Каяцкая) а яви уш 25 иеде ламо. Ансамблясь сови Москов ёнксонь филармонияс ды сонзэ прявтсо М.И.Дунаевский. Теке марто кеветее иень перть уш Вера Н.А. Римский-Корсаков лемсэ Россиянь военно-морской флотонь оркестрань солистка. Сон содавикс морыця весе Московонть ды маласо ёнкстнэнь келес. Ансяк вана Мордовиясо Верань а пек содасызь, чуросто тердтнить эрзяванть культурань мероприятиятнес, вейсэнь вастовоматнес. Мелесь жо морамс тиринь моданть лангсо эрзянь кельсэ пек покш! Содатано, ули сонзэ салавачинь арсемазо – пурнамс Отяжелень эли Саранск ошонь покш сцена лангсо весе рузонь ды эрзянь кельсэ моронзо вечкицятненень концерт. Кода сонзэ вастыть кунсолыцятне, неинек эсенек сельмсэ мелят «Равось – ояксчинь лей» этнокультурной экспедициянть шкасто. Верань вайгелезэ гайнезь гайнесь теплоходонть ды Рав леенть келес ды сонзэ туртов эзь эрявкшно микрофоноськак.
Вечкемась муизе Австриясо
Россиянь Заслуженной артистэсь, М.Е. Пятницкий лемсэ хоронь морыцясь, Кубанень казакось Сергей Каяцкий Вера Прохоровань туртов ульнесь менельстэ а кундавикс тештекс. Кие Каяцкий ды кие киненьгак а содавикс эрзянь тейтересь Вера Прохорова? Васенцеде сонзэ марязь, Вера «ваязь ваясь» вайгелензэ потс, весе ялгатнень оймест ливтсь – адядо Каяцкоень концертэв. Весть та-кода якась хоронтень прянзо невтемеяк, ансяк вечкеманзо эзизе нее. Тешкстама, конкурсонть сон ютызе, ансяк тонавтыцязо эзизе нолда.
Ансяк бути ломанесь тонь уцяскат, весе масторось ды пертьпельксэсь кармить лездамо вейсэндямонтень. Апак учонь Австрияв командировкась кандсь вастовома Сергей Каяцкий марто, кона истя жо сась омбо масторов морамо, ды сынст ульнесь вейсэнь репетициянь залост. Австриясо чачськак покш вечкемась, конась поладови комсь иень перть. Сергей мейле видькстась, сон уш умок каякшнынзе сельмензэ Верань лангс, ансяк арсесь, од тейтерентень, кона кемгавтово иеде седе вишкине, а пек туи мелезэнзэ 45 иесэ цёрась. Кода невти эрямось, алкуксонь вечкемась а ваны иетнень лангс. Шкань ютазь Каяцкийтнень чачсь Никита цёрынест, конантень ней уш 19 иеть. Сон П.И. Чайковский лемсэ консерваториянть юрсо музыкань училищань студент, служась армиясо ды ней морси А.В. Александров лемсэ хорсо. Никитанень ютасть тетянзо-аванзо талантост, рунгонь ды чамань мазычист. Цёрась арси истя жо весе эрямонзо сюлмамс музыканть ды морамонть марто.
Эрзянь вайгель
Московсо эрямсто Вера зярдояк эзинзе кадно сюлмавксонзо тиринь Пилезелензэ марто. Сон нейгак тов сакшны покштянь-бабань ледстнемань читнестэ, ванськавты тиринь ломанензэ калмоланготнень, яки-паки эйкакшпорань китнева, вастневи тосонь эрицятнень марто…
«Оймесь терди», – видьксты морыцясь. Самай те эрзянь оймесь 30 иеде теде икеле ветизеяк Прохоровань (Каяцкаянь) Москов ёнксонь эрзянь ды мокшонь землячествав. Ялгазо – музыкальной училищань прявтось, Орданьбуень райононь Куцян велесэ чачозесь Н.И.Удельнова – содавтызе тов якицятнень марто. Меельце иетнестэ Вера – мокшонь ды эрзянь землячествань активной член. Сонзэ икелень прявтонть Е.Е.Ледяйкинэнь Московсто туемадонзо мейле Прохорова топавты вейсэндявксонь прявтонь тевтнень. Вети покш робота «Эрзянь вайгель» сайтсэнть, снимси тозонь видеот, кода пидемс эрзянь раськень ярсамопельть. Пидекшнесь салмат, селянка, панекшнесь эрьва кодат прякат, каймакт, сюкорот… Пародояк паро контентэнть тееманть туртов тензэ лездыть Домодедово ошонь «Нармунь» кафень кирдицятне, конатне истя жо эрзянь ломанть. Вера Ивановнань покш мелезэ вейсэндявксонь члентнэнь марто вейсэ путомс эрзянь кельсэ спектакля. Сценариеськак ули, паряк, весемесь топавтови Од иентень. Покш лезкс вейсэнь важодемантень Вера Ивановнанень максыть «Эрзянь вайгель» ды «Азорава» ансамблятне. Зярдояк а кадыть вановттомо сонзэ энялдоманзо Плеханов лемсэ Академиянь прявтось В.И.Гришин, С.И.Чиндяскин депутатось, лия мокшотне ды эрзятне. «Эрзянь вайгель» ансамблянть марто меельце ковтнестэ вастневематне коронавирусонь кезовонть кувалма ютнесть онлайн-форматсо. Ялатеке вейсэнь тевтнень сынь эзизь кадно. Эрьвась мазылгавтызе эсензэ эрзянь оршамопелензэ човалясо ды эрьгесэ. Костюмтнень ставтокшнызь «Мордовские узоры» фабрикасо. Викшневкстнэнь жо теизь «Мордовский костюм» книганть вельде. Арсить аватне сонзэ коряс теемс пулай ды пряс панго. Вера Ивановна жо тейсь те шкастонть эрзянь някине, стась тензэ платиине, пулайне, кодась кирьгакш, ней теи кемнеть. Невтизь пряст аватне Рязанень ёнксонь Сасово ошсо ютавтозь онлайн-фестивальсэнтькак, конась алтазель Александр Аверкин композиторонтень.
Сонсензэ Вера Прохоровань (Каяцкаянь) творчествазо а шешки ве таркасо. Морыцясь сёрмады эрзянь кельсэ стихть ды морот, конатне эрьва иестэ гайгить Московонь Раськень кудонь мероприятиятнесэ. Неть моротнень сон ладси, ёвтни Каяцкая, аволь ярмаконь кисэ, сынь а кандыть целковойть, сынь максыть ойментень сюпавчи, пештить эйсэнзэ кезэрень эрзятнень вийденть ды содамочитнеде. Эсь моронзо марто Вера Ивановна ламо ардтни минек масторонь оштнева: кавто иень перть якась Санкт-Петербургов ошонь чинтень, ней аравтлувсонзо – молемс Алтаень эрзятнень содавтомо. Эрьва иестэ мельспаросо ютавтни вейсэнь концертт Оренбургсо эриця ялганзо, морыцянть Россиянь заслуженной артистканть мокшаванть Юлия Учеватовань марто. Иезэнзэ землячествасонть Вера Ивановнань вийсэ анокставить зярыя мероприятият, ютксост – эрзянь келень чись ды эрзянь кезэрень моронь чокшнеть-вастовомат. Зярдояк сынь а менстить эсь пряст невтемс «Шумбрат!» фестивальсэнть ды лия покш кенярксчитнесэ. Вера Ивановнань мельсэнзэ-превсэнзэ ютавтнемс вастовомат од ломантнень, эйкакштнень марто, эдь эрзянь келенть ды койтнень сы шкаст сынст кедьсэ. Ды ансяк эйстэнек ашти, зяро содамочить минь кадтано сынст туртов: килеень паргине эли покш улов. Ламо-мезе арсематнестэ тедеде колась коронавирусонь инфекциясь, ансяк Вера Ивановнань мейсэяк а тандавтсак. Сонзэ эрзянь оймесь а соды пелема ды терди ансяк икелев. Од изнявкстнэс!
Марина ДЕВЯТОВА
Те фотографиясонть Вера Прохорова оршазь сырькаензэ оршамопельсэ, конанть морыцясь вансты тиринь ломанензэ куломадо мейле. Панарось ды кушакось витнезельть-петнезельть дока ломанень кедьсэ. Кой-кона викшневкстнэ, конатне парсте ванстовсть оршамопельтнень лангсо, кадозельть некеть. Вера Ивановнань туртов те эрзянь оршамопелесь бабадонзо ледстнема, покштояк покш сюпавчи, конанть сон а полавтсы мезеяк лангс.