Неень шкане республикань паксятнесэ моли кснавонь урядамось. Кода сонзэ пурныть Ромодановань райононь «ООО «Комсомолец» и Компания» ТНВ-сэ, неинек эсенек сельмсэ. Тов минь пачколинек июлень 18-це чистэ.

– Тедеде минь видинек 700 гектарт кснав. Сынст ютксто 70 гектартнэ – видьмексэкс туить. Кснавось те кизэстэнть вадря, вейке гектарсто сайтяно 47 центнерт. Усксетяно сонзэ Саранскоень Консервной заводов. Теинек натой рекорд – пурнынек ды ускинек 292 тоннат. Высшей ды васенце сортонь кснавось туи консервировамс, лиясь – видьмексэкс кайсеви кескавга. Комбайнань бункерс кельгить малав 2,5 тоннат. Сон пешкеди 20-40 минутас. Бути кснавось паро ды сондензэ ламо, пешкеди седеяк куроксто, – пачтясь тенек «ООО «Комсомолец» и Компания» ТНВ-нь управляющеесь Николай Шумкин.

Тесэнь важодицятне кснавонть пурныть чинек-венек, малав 52-57 гектарт (нама, те ашти сень эйстэ, кодамо урожаесь). Валскень 7 чассто саезь омбоце валскес важодить вете комбайнат, 10 комбайнёрт, зярыя механизатортнэ покш машинасо ускить кснавонть заводов, истя жо паксясонть свал агрономось, техникань витниця-петниця, андыцят.
Кснавось сови комбайнанть потс, тосо кувтёлось панжови, кснавось саеви бункерс, нетьксэсь лиси мекев. Кода ёвтнесь Николай Николаевич, кснавонь нетьксэнть кадсызь паксяс, сонзэ эйсэ ней ламо азот, те карми пек паро удобрениякс модантень. Сонзэ аламодо керсесызь, сокасызь, човорясызь моданть марто. Ды уш сёксня видить озимой шуж.

Эряви меремс, минек республикасо истя ламо кснав видить ды пурныть ансяк те организациясонть.

Татьяна МАТОРКИНА
Фототне: Э. Ретунский