«Защитники Отечества» специальной военной операциянь участниктненень лездамонь государственной фондонть теемадо Указонть РФ-нь Президентэсь Владимир Путин сёрмадстызе 2023 иень апрелень 3-це чистэ. Саранскойсэ Фондонь региононь филиалось ушодсь важодеме июнень 1-це чистэ. Фондонть панжомо сакшнось Мордовиянь Прявтось Артём Здунов.
Фондонь прявт тевесь – СВО-нь ветерантнэнень лездамонь весе тевтнень топавтомасо лездамось, сынст ютксо медицинань ды социальной реабилитациясь, ормаменькстнэнь явомась, психологической лезксэсь, реабилитациянь технической средстватне ды санаториясо-курортсо лецямось. Фондось истя жо карми лездамо ветерантнэнь од тевс тонавтомасо ды важодема таркатнень муемасо.
Мордовиясо фондонть панжомсто пурнавозтненень пшкадсь «Защитники Отечества» СВО-нь участниктненень лездамонь государственной фондонь Председателесь Анна Цивилева. «Фондонь теемадо указонь тешкстамо шкастонть ютасть кавто ковдо седе аламо. Икеленек путозь вешема, конась икеле эзь витевкшне педе-пев. Секскак Россиянь эрьва регионсо важодеманть туртов анокстынек инфраструктура ды пурнынек команда, конась кемевикс минек прявт питнейчитненень – те видечись, мелень явомась».
Артём Здунов тешкстась, тевесь, конань топавты фондось СВО-нь участниктненень ды сынст семиятненень лездамонть коряс, пек покш. «Специальной военной операциясь аволь косо-бути васоло, сон токши юткстонок эрьванть. СВО-нь участниктне – те малавиксэнек, оянок, мартонок важодицятне, шабратне. Минь топавттано Россиянь Президентэнь решениянть обществанть вешематнень коряс. Прявтось: фондось теезь ды вейке таркасо максовить толковамот весе кевкстематнень коряс».
Мордовиянь Прявтось ёвтась сюкпря республикасонть фондонь теицятненень вадря, мелень витиця тарканть тееманзо кис.
Фондонь важодемань прявт ёнкстнэстэ вейкесь – СВО-нь ветерантнэнь общественной проекттнэс совавтомась, конат аравтозь эрицятнень патриотизмань лувсо тонавтомантень, историянь ледстнематнень ванстомантень ды Россиянь духовно-нравственной питнейчитнень кемекстамонтень.
Фондонь весе инфраструктуранть ванномадо мейле Иван Волков – специальной военной операциянь участникесь, ней – фондонь социальной координатортнэнь ютксто вейкесь, ёвтызе СВО-нь участниктненень лездамонь государственной фондонь тееманть минек масторонь ды региононь эрямосо покш тевекс. «Истямо фонд зярдояк арасель. Покш сюкпря Владимир Владимирович Путиннэнь сонзэ тееманть кисэ! Те кепеди минек Вооружённой Вийтнень военнослужащейтнень, доброволецтнэнь, СВО-нь весе участниктнень статусост. Монь туртов, кода специальной военной операциянь участникенть туртов, кода лия боецтнэнь туртовгак, пек питней содамс – эйсэнек учить, эзимизь стувто, вечксамизь ды анокт лездамс. Покш сюкпря!»
Зиновий митрополитэсь, сон ульнесь фондонть панжомасо, баславизе те тевенть ды мерсь: «Минек священнослужительтне кармить явомо свалшкань лезкс СВО-нь участниктненень, сынст семиятненень. Кеман, религиянь весе конфессиятнень представительтне вейсэндить те эрявикс важодемантень».
МР-нь Правительствань Председателень Васенце полавтыцянть, СВО-нь участниктненень лездамонь коряс межведомственной комиссиянь руководителенть Галина Лотвановань валонзо коряс, ютавтозь кевкстнеманть вельде кочказь сехте эрявикс ёнкстнэ: «Те – юридической блокось, тосо уш улить вете покш классонь специалистт, омбоцесь – медицинань – весемесь, мезесь сюлмавозь медико-социальной экспертизанть, лецямо ды реабилитацияс кучоманть, медикаменттнэнь явоманть марто. Колмоцесь – соцподдержкань коряс весеме ёндонь сопровождениясь, тень туртов фондсонть свалшкань лувсо важодить эрявикс специалистт».
Мордовиясо «Защитники Отечества» СВО-нь участниктненень лездамонь государственной фондонь филиалось панжозь истямо адресэнть коряс: Саранск ош, Полежаевень ульця, 113. Фондонь руководителекс кармась Алексей Герасименко, сон важоди шумбрачинь ванстомань ёнкссонть комсь иеде ламо.