Окойники, гайгстась баягинесь. Эйкакштне шалнозевсть, кармасть пурнамо кудов. Охаяк панжизе портфелензэ. Састо, прок стака кирьпецть, вачкась сон вейке омбоце мельга книганзо, ручканзо, карандашонзо. Весе уш тукшность, зярдо сонгак окойники пурнавсь. Пильгень ускозь сыргась кудов.
Оха эзь капша сасамо ялганзо, конат гайтев вайгельсэст пештить куринканть. Прянь нолдазь кандсь лавтовонзо трокс понгавтозь портфелензэ. Сон течи мекс-бути пек стака.
– Тон, нать, «кавтот» кандат? – корсяня вайгельсэ кевкстизе каршонзо молиця Андрей атя.
Цёрынесь прянзояк эзизе кепеде, ансяк арсезевсь: «Нать, портфеленть пачка неи».
Кузтемпес пачкодемстэ сон кувать эзизе венсте кедензэ кенкшкундамонтень.
«Кода ней сован, мурнесамизь таго», – ливтнесть пряпотсонзо мельтне.
– Я, нуцькам, пачкодить? – кевкстизе сырькаезэ, зярдо тона совась кудос.
– Ага.
– Тон мекс истямат? Аволь чей таго пуло мартотнень кандыть?
Цёрынесь стакасто каизе лавтовонзо лангсто портфеленть ды кувать вансь лангозонзо: кодаткак «кавтот» а неявить, кода эно весе содыть?..
– Озак эно, «кавтонь» кандтниця, ярсамо, – пшкадсь сырькаезэ. – Ва, сыть тетят-ават, варштасызь дневникеть.
Неть валтнэде цёрыненть пекезэяк сеске «пешкедсь». Сон ялганзо марто налксемеяк эзь моле, яла нусманясто вансь портфелензэ лангс. Сырькаезэяк сонзэ мекс-бути кадызе эзем лангс, эзизе совавто икельце кудос: нать, алкукскак пек стака. Оха таргинзе книганзо-тетрадензэ ды озась столь экшс уроконь тееме: лиякс, секень вант, ванды портфелесь седеяк стакалгады, мейле уш а кандовияк.
Геннадий Гребенцов