Воскресенье, декабря 04, 2022
Важное



«Приоритет 2030» федеральной программань «СМАРТ АГРО» стратегической проектэнть лувсо Н. П. Огарёв лемсэ Мордовиянь государственной университетэнь Аграрной институтсо топавтови пек мельстуиця программа, конась полавтсынзе омбо масторонсетнень. 

Те агроскаутингень проект, лиякс меремс, сонзэ вельде агрономтне седе парсте кармить чарькодеме, кодат мелявкст улить те эли тона модасонть, кода касыть тикшетне, мезе тенст эряви, мезе а сатны. Проектэнтень лездыцятне – РФ-нь Велень хозяйствань министерствась, «Инженерия будущего» НОЦ-сь ды «Талина» агрохолдингесь.

Ютазь цетьверькстэ минь пачколинек Инсаронь райононь Ямщина велев, косо журналисттнэнень невтезель, кода роботыть беспилотной ливтниця устройстватне (дронтнэ) агрофирмань паксятнесэ. Чарькодеви, неень шкане хозяйстватнень паксятне сравтовить пек ламо вайгельбева, ардтнемс сынст педе-пес, варштамс эрьва курыненть, костояк шка а муят, кодаткак вийть а сатыть. Дрононть вельде жо неяви, кода касы сюрось ды косот мелявксов таркатне. Теде башка, пурнави информация трёхмерной электронной картатнень туртов. Результаттнэнь программась невтьсынзе сеске, паксясо. Зярс Агроинститутонь доцентэсь Андрей Савельев ды «Талинань» агрономось, студентэсь Алексей Мочалов ливтневтсть дрононть, сынст директорось Алексей Столяров ёвтнесь тенек од цифровой системадонть. Программась аволь ансяк невтьсынзе сюротнень, паксянь модатнень асатыкстнэнь, сон истя жо ёвты, кода сынст изнямс, невти зярыя ёнкст изнямост коряс. Истямо программатнень марто роботамсто эрявить од специалистт, сынь содавольть айти-технологияткак, агрономияяк. Самай истят ломанть неень шкане аноксты Агроинститутось, сынь уш ней бажить невтемс содамочист вейсэ институтонь учёнойтнень марто. Агрономиянь ды ландшафтной дизайнэнь кафедрань доцентэсь Александр Никольский ёвтнесь седе, мейсэ эсенек программатне явовить ды икельдить омбо масторонсетнень.


«Мордовский бекон» ЗАО-нь прявт агрономось, теке институтонть прядыцясь Михаил Трубкин ёвтнесь, кода од технологиятне ней лездыть производительтненень. «Весе предприятиятнень туртов неень шкань прявт тевесь – кирдемс тиринь масторонть продовольствиянь виевчинзэ. Секскак продукциянь ламочинть эряви кастомс-виевгавтомс, айти-технологиятневтеме ды цифровой ресурстнэвтеме те а тееви! Мордовиянь госуниверситетэнть марто умок кирдтяно ялгаксчи. Ламот минек специалисттнэ тонавтнесть тосо ды секскак весе учотано сюронь кастомань, моданть марто роботамонь коряс од разработкат. Арсетяно, сынь совить минек эрямос уш сыця иестэ. Тень кувалма предприятиянь руководствась эрьва иестэ кучи Агроинститутов квалификациянь кастомо зярыя специалистт».

Паксятнесэ тевтнень ваннозь, минь сыргинек Ковылкинав, тосонь комбикоромонь нолдыця заводов, конась истя жо сови «Талина» компаниянь группантень. Тесэ минек вастымизь нолдавиця продукциянть вадрячинзэ мельга ваномань коряс лабораториянь прявтось Алексей Кукушкин. Сон ёвтнесь: «Весе сюротне-тикшетне паксятнестэ саевить агрохолдингень тувонь комплекстнэсэ ракшатнень туртов ярсамопелень анокстамс. Васняяк сынст эрявить ванкшномс зярыя невтевкстнэнь коряс ды секскак, тевенть шождалгавтомга, эрявить совавтомс цифровой инструментт, конатне редясызь сюронь парочинть эрьва участкатнестэ, ды минь тень кувалма анокстатано ракшатнень андомань седе паро рацион».
Весе неть проекттнэнь ваннозь, сынек ве мельс, минек масторсо пек ламо превей ломанть, конатне нолдыть эсенек программат эрьва кодамо ёнксонь коряс, ды а васоло се шкась, зярдо целанек полавтсынек импортнойтнень эсенексетнень лангс.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».