Вторник, октября 04, 2022
Важное

…Хмелевка (эрзякс Портовка) велентень малав 300 иеть. Сон ашти Ульяновской ёнксонь Сурской районсо Кальциклеенть вакссо, конанть чирева касыть ламо комолят. Сынст кувалма максозельгак велентень лемесь. Эрзятне мерить тензэ Портовка. Эрицятне ёвтнить истямо легенда велень лемденть. Келя, косо-бути васоло эрясть-аштесть колмо лелят-ялакст – Сыртяй, Туртай ды Портай.
Семияст сынст ульнесть покшт, эрямо таркаст жо берянель. Модась ламо а максыль, пешксель чейбулодо, ды андомс семиянть стакаль. Сыргасть сынь паро эрямонь ды чевте модань вешнеме. Тусть сынь колмо ёнга ды мейле, шкань ютазь, вастовсть. Сыртяй мезеяк седе паро эзь муе ды велявтсь роднянзо-раськензэ ваксс. Туртай мусь седе паро ёнкс: модаськак пароль, вирть ды лейть тосольть. Лемдизе сон велензэ Турдаки (эрзякс Тыргак). Портай пачкодсь весемеде васов, сэрей пандо алов. Кавшаня модатне, тумопулотне ды лисьмапрятне пек тусть мелезэнзэ. Кадовсь Портай вишка лейненть чирес, конанть берёкка кассть ламо комолят. Истя чачсь Портовка велинесь, конань мейле рузтнэ лемдизь Хмелевкакс. Ней те велинесэнть истя жо эрить эрзянь ломанть. 170 ломантнестэ малав 120-тне кортыть эрзякс.

Хмелевка (Портовка) велень «Комолькай» ансамблянть марто минь вастовинек Сурскоенть (Промзинанть) 470 иетнень тешкстамо чистэ, козонь пачкодинек инжекс, ды овсе эзинек арсе неемс тестэ эрзянь раськень культурань тешкст. «Комолькай» ансамблянь участниктне эрзянь раськень мазый оршамопельсэ сцена лангсто морсесть «Умарина» моронть, мейсэ сеске каявсть минек сельмес-пилес.

Шкань апак сатстне теевинек мартост содавиксэкс ды кевкстнинек сынст морокуронть чачомадо. Ансамблянь художественной руководителесь Наталья Александровна Куликова малав 40 иеть уш сонзэ прявтсо. Ушодызе эсь историянзо «Комолькаесь» малав 65 иеде теде икеле. «Минек велесь ашти а восоло Мордовиянть ды Чувашиянть эйстэ. Икелев Хмелевкась совиль Алатырской уездэв. Истя лиссь, эрзянь вишка велинесь ськамонзо кадовсь Ульяновской областень Сурской районс, маласо аштиця лия велетне ютазь пингень 30-це иетнестэ совавтозельть Мордовиянтень. Ялатеке тесэ, кода машттано, вансттано тиринь раськень культуранок, келенек ды коенек-кирданок.

Ламо иеде икеле Хмелевкань эрицясь Раиса Петровна Нарушева пурнызе те ансамблянть ды ушодсь морсеме велень сыре бабинетнень марто. Васняяк сынь пурнавкшность кудова, мейле кармасть невтнеме концертт велень клубсо – истя теевсь «Комолькаесь». Морокуронть эрямонзо перть минь пурнатано эсенек ланга альбом фотографиятнень ды газетасто заметкатнень марто. Ней уш пурнавсь покштояк покш книга, конанть невтнетяно выставкатнесэ ды течияк вана туинек тей. Сон ашти велень администрациянь курынесэнть, косо, сондензэ башка, невтевить Хмелевкань эрзятнень викшнезь оршамопелест, нардамопацяст, курмост-кармост», – ёвтнесь тенек Наталья Куликова.

«Комолькаесь» – содавикс ансамбля Ульяновской ёнкссо. Сон зярыя иень перть весе тосо ютавтовиця покш мероприятиятнень «тештине».
Аволь умок аватне ульнесть «Шумбрат» кенярксчисэнть, конанть анокстыцязо В. А. Софонов, Кузоватовань райононь Кивать велесэ «Масторавань морот» фестивальсэнть. Тешкстама, Ульяновскоень национально-культурной автономиянь прявтось В.А. Софонов лездась тенст раськень оршамопелень рамамосояк, конатнесэ сынь ней «цивтёрдыть» весе вастовоматнесэ. «Комолькаентень» ней совить кеветее ават: велень Культурань кудонь прявтось И. Ю. Карькина, тонавтыцясь Л. В. Ефимова, Н. С. Беляева, Р.Н. ды О.Н. Мартьяноватне, М. Н. Ховрина, Л.Н. Новикова ды лиятне. Мартост бажить сайнемс эйкакштненьгак. Кадык морсить, ваныть, седейпотс саить. Ули эсест баянистэсткак. Те А. Д. Ховрин.

Хмелевкань аватнень марто кортамсто сась превезэнь вейке мель: Отяжелень райононь Сабанцеле велесэ ули истямо жо эрзянь авань «Комолькай» ансамбля. Мекс бу неть коллективтненень а вастовомс ды а ютавтомс вейсэнь концертт? Эритькак-аштитькак сынь вейкень-вейкень эйстэ а васоло – паксянь-паксянь трокс, ловт, 20-шка вайгельбеть. Те улевельть бу пек паро кенярксчить кавто эрзянь велетнень туртов.

Марина Девятова
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».