Воскресенье, декабря 04, 2022
Важное

Апрелень 6-це чись – Россиянь МВД-нь предварительной следствиянь органтнэнь теевема чи



Эрьва иень апрелень 6-це чистэ тешкстави Россиянь МВД-нь предварительной следствиянь органтнэнь теевема чись. Сон ловови Внутренней тевень министерствань следовательтнень профессиональной кенярксчикс. Системасонть важодить ламо ёроков, дока ды эсь тевень содыця вадря специалистт. Минек республикасо Управлениянть важодемадо ды следователень а шожда тевденть ловныцятненень ёвтни Мордовия Республикава МВД-нь Следственной управлениянь Следственной частень прявтонь полавтыцясь юстициянь полковникесь Александр Павлович КАЛИГИН.

– Александр Павлович, зяро уголовной тевть Мордовиянь следовательтне панжсть ютазь иестэ?

– Закононь коламотнень панжомась – те а шожда ды эрьва ёндонь тев, конанть лангсо важодить внутренней тевень министерствань ламот службатне. Эрьвась топавты мезе-бути эсензэ, следовательтне жо те тевенть прядыть. Лиякс меремс, сынь пурныть эрявиксэнть уголовной тевенть панжомга ды максыть сонзэ судс.
Целанек ютазь иенть перть внутренней тевень органтнэнь следовательтне ванность малав 4 тёжат уголовной тевть, мезесь малав 10 % седе ламо ютазь иенть коряс. Сынст эйстэ судс максозь 1200 тевть 1300 ломантнень коряс, конат колызь закононть.

– Александр Павлович, кодамокс тынь ловтадо Следственной управлениянть важодеманзо?

– Арсян, минек следственной коллективесь ютазь иестэ ды нейгак важоди а беряньстэ. Уликс кевкстематнень лангс апак вано, кода кадратнень асатноманть коряс, истя лия ёнксонь коряскак, минь ванстынек прявт следовательтнень, конатнень вакссо касыть ды тонавтнить од кадрат.
Следователень тевесь иестэ иес стакалгады, вешематне касыть, тень лангс апак вано, арсян, пурназь коллективесь кеместэ ашти пильге лангсо ды анок решамс икелензэ аравтозенть.

– Кодамо важодема тынь топавтыде, штобу кастомс закононь коламотнень панжоманть?

– Минек свалшкане башка мель явови следовательтнень профессиональной содамочист кастомантень, законодательствасо полавтоматнень тонавтнемантень. Истя, эрицятнень мобильностест касоманть марто минек лиснесть стакачить чумондовицятнень кевкстнеманть коряс, секс мекс сынь ве ёнольть. Ней законодательствас совавтозь полавтомат, конат лездыть кевкстнеманть ветямс «дистанционна». Неть полавтоматнень ней тонавтнетяно ды карматано нолдамо тевс. Арсян, те лезды тенек.

– Ёвтнеде, важодемань кодат ёнкст ульнесть васенце таркасо 2021 иестэ?

– Следователенть туртов прявтокс свал ульнесь ды кадови – эрицятнень праваст ванстомась. Ютазь иестэ, кода икелеяк, ламо зыянов тевть ульнесть информационно-телекоммуникационной ёнкссонть, лиякс меремс, виевгадсть «дистанционной мошенничестватне». Закононь истят коламотнень марто бороцямонтень, зярдо эрицятнень аволь ансяк салавить ярмакост, сынст лангс эштё саевить кредитт, максовсть ламо вийть. Теке марто эзинек кадно лия тевтненьгак, кода экономикасо преступлениятне, наркотиктнень каршо бороцямось ды седе тов. Неть ёнкстнэ минек важодемасо кадовить те иентеньгак.

– Ёвтнеде ютазь иень седе покш ды зыянов уголовной тевтнеде?

– Седе, кода кортыть, резонансноекс можна ёвтамс уголовной тевенть Рузаевкань райононь аванть коряс, кона покш тевс ярмаконь путоманть вельде салынзе республикань сядодо ламот эрицятнень ярмакост – целанек 200 миллиондо ламо целковойть. Теке марто эряви тешкстамс, те авась сонськак понгсь манчицянень. Ды минь ве шкасто ваннынек уголовной тевть, зярдо вейкесэнть ломанесь ёвтазель чумондовицякс, омбоцесэнть – зыянс понгозекс. Неень шкане тевтне максозь судс.

Истя жо судс максозь зярыя тевть организованной группань коряс, конат манчесть ломантнень ярмакост газонь счётчиктнень миеманть вельде.
Покш тевть ульнесть наркотиктнень марто сюлмавозтнень коряскак, конат снартнесть минек республикасо ладямс наркотикень миема тевенть, ансяк сынст «важодемаст» шкастонзо редявсь ды лоткавтовсь.

– Лездыть-арась эрицятне закононь коламотнень панжомасо, бути арась, мекс?

– Внутренней тевень органтнэнь важодемасо покш тевекс ашти полициянь сотрудниктненень эрицятнень кемемась. Паро, неень шкане улить истят ломанть, конатне лездыть полициянтень закононь коламотнень ливтемасо, лоткавтомасо ды панжомасо. Лездыть закононь колыцятнень вешнемасояк. Ансяк улить истяткак, конат весе тень лангс ваныть мельде-валдо.

– Ули мель кевкстемс финансонь пирамидатнеде. Арсеви, сынь таго кармасть вельмеме. Ламот минек эрицятне эшкевкшнесть тень марто ютазь пингень 90-це иетнестэ – ледстяви «МММ-сь», «Хопёр инвестэсь» ды лиятне. Путыть-арась эрицятне ярмакост истят организациятнес?
– Следственной управлениянь следовательтнень вановт ало истят пирамидатнень коряс уголовной колмо тевть. Эряви тешкстамс, сынст важодемаст ульнесь а кувать, зярыя ковт, ансяк сынь пурнасть а вишкине ярмакт. Теке шкасто истят организацият важодсть Россиянь лия регионтнэсэяк. Ды зыянс понгозтнестэ седе ламотне сыре ломанть, конатне кандсть эсь аволь покш ярмакост кодамояк доходонь получамга. Кадовсть жо овсе ярмактомо. Неть уголовной тевтнень коряс ветяви домка робота, эдь эряви тонавтнемс неть организациятнень финансово-хозяйственной тевест, ванномс салазь ярмактнень таркаст. Ули мелем пшкадемс те зыянонтень понгозтненень ды кемекстамс, минь тейтяно весементь, штобу манчицятнень чумондовлизь ды ярмактнень велявтовлизь.

– Тынк коряс, кодат явовиксчить улить следователень профессиясонть? Эрьва-аволь ломанесь может улемс следователекс?

– Явовиксчись сеньсэ, те пек ответственной роботась. Эрьва чистэ следователесь реши ломанень уцяскат, тень туртов эряви маштомс примамс законнойть ды кемекстазь тевть. Самай следовательтненень максозь прават ломаненть олячинзэ саемадо. Ды аволь эрьва ломанентень следователень тевесь виень коряс. Профессиясь веши башка явовиксчить. Васняяк аналитической превть, кемечи, цидярдома. Ломанесь улезэ превей, мобильной, цидярдыця, улемс а талныцякс ды маштомс ладямс важодеманть лиятнень марто.

– Кодамо следователенть важодема чизэ?

– Эрьва чись ашти следственной тевтнестэ – кевкстнемат, документтнэнь ды предметтнэнь ванкшномат, очной ставкат ды седе тов. Документтнэнь видестэ теемаст эйстэ следственной тевсэнть ашти пек ламось. Куш кодамо ильведевксэсь пачти зыянс. Истя, бути аволь видестэ тешкстамс наркотической средстватнень саеманть, те пачти зыянс, лиясто чумондовицясь а канды кодамояк ответственность.

Теке шкастонть сеедьстэ тевенть коряс кемекстамотнень получамось ашти следственной тевтнень шкастонзо ютавтоманть эйстэ. Ды сестэ следователесь зярыя чинь перть важоди кабинетстэ апак лисне, кемексты пурназенть, кабу мезеяк аволь ёма.

– Васенце тевесь превстэ а нардави весе эрямонь перть. Ледстясынк-арась тынь эсь васенце следственной опытэнк?

– Истя, мон пек вадрясто ледстнян васенце уголовной тевем. Те ульнесь килангонь зыян, косо иредьстэ водителесь кинь трокс ютамо таркасо эшксь эйкакш марто ава. Сынь эзть чавово, ансяк пек томбавсть. Водителесь чумокс прянзо эзизе лово ды ёвтнесь эрьва мезе: буто валдосо сокоргавтызь, ютыцятне лия машина удалдо лиссть. Ансяк минек прявттнэнь лезксэст вельде сонзэ манчеманзо панжовсть ды тевесь максозель судс, косо сон чумондовсь закононь коряс.

– Мезесь тынк туртов сехте стака ды сехте питней те тевсэнть?

– Следователесь васенцекс сы зыянов тевень теема таркантень ды сеедьстэ эрсить алкукс стака тевть (чавовозь ломань марто ДТП-ть), зярдо а эряви нолдамс эсь ёжонь невтематнень ды важодемс. Те а шожда. Савкшны кортамс эрьва кодамо ломань марто, лиясто эряви улемс седе казямокс ды видестэ тевс нолдамс закононть. Сехте питнеесь – эрьва тевенть прядомадо мейле вийтнень кепетемась, зярдо зыянонь теицясь чумондовсь закононь коряс. Эсь роботам вечкса, зярдояк эзинь янксе, мекс сынь следствияс.

– Александр Павлович, мезе роботань коряс ялгатненень ды сынст семиятненень арсетядо 2022 иестэ?

– Следственной подразделениятнесэ важодицятненень сынст кенярксчинтень арсян кемечи ды вийть эсь службань тевтнень топавтомасо, а эряви стувтнемс – весе вейсэ минь тейтяно вейке тев. Следователень роботась саи ламо шка ды вийть, мезень коряс весе важодицятненень арсян уцяска ды чарькодема семиясо. Семиятненень жо арсян а стувтнемс весе стакачитнень ды эрявиксчинть сынст малавиксэст важодемасо.

Истя жо пшкадян минек службань ветерантнэнень. Сюкпря тенст сень кисэ, што тонавтымизь минек сеньс, мезес ней машттано, ды арсян тенст кеме шумбрачи, уцяска ды сэтьмечи.

Анокстызе Юлия ЕРЕМИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».