Четверг, декабря 08, 2022
Важное

«Инклюзия на кончиках пальцев» проектэсь лиссь изницякс культурань инициативань Президентэнь фондонь грантонь омбоце конкурссо. Сон карми тевс нолдавомо Эрзянь ды мокшонь национальной театрасо.


Те проектэнть вельде вейсэндявить лавшосто неиця ды а неиця ломантне, конат эрить Мордовиянь оштнесэ, велетнесэ ды республикань томбале. Сынст туртов тееви адаптированной театральной искусства. Лиякс меремс, неиця ломантнень марто вейсэ содавтовить искусстванть марто. Истя, теевить спектаклятнень коряс тактильной экспонатт, сынь алтавить а неиця ды лавшосто неиця ломантненень, конат сыть театрав.

Проектсэнть творческой колмо ёнкст. Ёвтнетяно сындест седе домкасто. Теевить тактильной макетт: «Куйгорож» спектаклянь коряс ниле покш паннот; эйкакштнень туртов тактильной пазлань ниле комплектт; скульпторонть С. Д. Эрьзянь важодевксэнзэ вете копият; Национальной театрань зданиянть ушо ёндо невтеманзо коряс тактильной вейке макет. Весе экспонаттнэ ладявить театрань фойесэ.
Омбоце пельксэсь истямо: «Нузякс Курмайде ёвкс», «Куйгорож», «Эрьзя. Валдос ливтиця» спектаклятнень тифлокомментирования марто «кортыця» книгас сёрмадомась.

А неиця ды лавшосто неиця ваныцятнень туртов театрасо невтевить «Нузякс Курмайде ёвкс», «Куйгорож», «Эрьзя. Валдос ливтиця» путовкстнэ. Теке жо шкане карми важодеме тактильной экспонаттнэнь марто выставка.

Теде башка, тифлокомментирования марто спектаклятне ды тактильной экспонаттнэ невтевить Орданьбуесэ, Зубова-Полянань, Рузаевкань, Ковылкинань, Темниковань районтнэсэ ды ПФО-нь колмо ёнкстнэсэ (Пензань, Ульяновскоень областтнесэ ды Чувашиясо).
Проектэсь алтави лавшосто неиця ды а неиця ломантненень, лавшо шумбрачи марто эйкакштненень ды весе лиятненень. Инклюзивной театральной искусстванть ды «кортыця» книгатнень вельде сельмевалдонь коряс инвалидтнэ ды лавшо шумбрачи марто эйкакштне содавтовить эрзя-мокшонь раськень искусстванть ды литературанть марто.

Эряви меремс, те проектэнть анокстызь ды кармить тевс нолдамо Эрзянь ды мокшонь национальной театрась, МР-нь а неиця ломантнень туртов специальной библиотекась, «Всероссийское Ордена Трудового Красного Знамени общество слепых» инвалидтнэнь Общероссийской общественной вейсэндявксонь минек региононь организациясь, С. Д. Эрьзя лемсэ изобразительной искусствань республикань музеесь.

Анокстызе
Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».