Республикань велень хозяйствань предприятиятнесэ покш тевтне прядовсть. Сюротне нуевсть, паксятне соказь, озимойтне видезь. Агрономтне уш арсизь, зяро кармить видеме тунда яровойть ды кона паксятне сокавить. Кой-косо тешкстызь Велень хозяйствасо важодицянь чинтькак, казизь сехте вадря роботниктнень.
Неть читнестэ минь пачколинек «Сабанчеевское» ООО-в, косо вастовинек прявтонть Александр Палькин марто. Кортамонок алтавсь сенень, кода ютась те иесь. Ледстясынек, Александр Ефимович хозяйстванть прявтсо важоди вейксэ ковонь перть.– Неть читнестэ Ромодановань сахаронь заводов ускинек меельце урожаенть, тов пачтинек уш 54 тежат тоннат ламбамо якстерькай. Тедеде вейке гектарсто саинек малав 350 центнерт, кой-кона таркатнестэ седеяк ламо. Седе тов паксятнень, косо кассь якстерькай, ардтнесынек дискатор марто, мейле сокасынек, – ушодызе кортамонзо прявтось.Кода евтнесь А.Е. Палькин, предприятиянь важодицятнень тедеде кецявтызь сюротнеяк. Валовой пурнавксось – 29 тежат тоннат. Мелят жо те цифрась ульнесь ансяк 24 тежат тоннат. Средней урожайностесь вейке гектарсто – 38 центнерт, яровой сюротне – малав 45 центнерт. Бути саема шужонть – 70 центнерт. Соясь макссь вейке гектарсто 17 центнерт. Озимойтне видезь 2519 гектарт, те ветесядт гектардо седе ламо мелень иенть коряс.
Кукурузадонть видезельть 453 гектарт, юткстост 100 гектартне – сюрокс. Истя жо анокстазь 10 тежат тоннат силос, сон пештязь бетонированной латкотнес. Эйсэст те андомапелесь парсте ванстови.Ламо иень тикшетнеде видезь 1350 гектарт. Тикшесь колмоксть ледезель: пурназь 10 тежат тоннат сенаж, тикшень 400 рулонт, олго марто 200 рулонт, эрьванть сталмозо малав 700 кг. Весе те андомапелесь сатстови вейке пель марто иес.Кода а ледстямс велень хозяйствань важодицятнень лемест? Сюротнень нуемасо покш изнявкст сайсь Алексей Аньчков, сон пивсэсь малав 40 тежат тоннат! Мельганзо моли Виталий Учеваткин, конась пивсэсь 32 тежат тоннат. Сынь од ломанть, пряст невтизь пек парсте. Колмоце таркасонть Виталиень тетязо Петр Иванович Учеваткин, конась пивсэсь 30 тежат тоннат.
Вадрясто важодить механизатортнэ Александр Федоров, Николай Иневаткин, Сергей Фадеев ды лиятне. Сынь эрьва тунда сокить-видить, эрьва кизна роботыть паксясо.– Александр Ефимович, кодат полавтомат улить ракшатнень трямосо-кастомасо?– Минек колмо ферматнесэ кирдевить 2000 прят КРС. Потявтовиця скалтнэде – 900. Ноябрянь васенце чинтень скалтнэ макссть 918 букинеть-ведрекшть. Те кавтосядто ламо мелень иенть коряс. Тенень лездасть скалтнэнь осеменениянь неень шкань технологиятне. Вазтнэнь мельга якить эсь тевест парсте содыця важодицятне. Эрьва чи вазтнэ касыть 650 граммат. Те цифрась средней.Минь полавтынек андомань рациононть. Тень кувалма сеске вадрялгадсть невтевкстнэ. Тевс нолдатано соянь, рапсонь ды чиньжарамонь жмых. Вейке скалось максы 26 литрат ловсо. Кавксо ковтнень перть потявтозельть 4 244 тоннат. Мелят цифрась седе вишкинель. Ловсонть, кода икелеяк, усктано Ицялонь сырань теиця комбинатов ды Саранскоень консервной заводов. Сонзэ вадрячизэ паро.Башка валсо тешкставлинь скалонь потявтыцятнень Марина Тикшайкинань, Мария Бояркинань, Ольга Сорокинань, Светлана Сорокинань, Галина Чекушкинань (сон пелькстась трудовой соперничествасо) ды лиятнень.Эряви меремс, Дюрькина велесэ кармась важодеме комбикормовой заводось. Колмо ферматнесэ стявтозельть комбикоромонь ванстомань таркат. Ладязь ловсонь кельмевтемань покш блок, косо ванстовить 10 тежат тоннат ловсо. Сабанцелесэ прядовома лангсо скалонь фермань стявтомась, сон панжови 2026 иестэ. Тосо кармить 300 скалт. Аловасо витнезь вазонь фермась.Тедеде «Сабанчеевское» ООО-сь рамась «Полесье» сюронь нуемань комбайна, «Джон Дир» тракторс силосонь трамбовщик, дискатор, 25 тоннас удобрениянь почодомка, тикшень велявтнемка ды лия эрявикс техника. Сынст уш варчнизь сюронь видематнесэ ды нуемстэ. Истя жо рамазель миксер, кона човори ракшатненень андомапеленть.Тешкстама, предприятиянтень сась важодеме Александр Ефимовичень церазояк. Даниил прядызе Н.П. Огарев лемсэ МГУ-нь Аграрной институтонть, ней тонавтни Кооперативной институтсо экономической специальностень коряс. Тесэ сон важоди производствань коряс прявтонь полавтыцякс.«Сабанчеевское» ООО-сь максы эрьва кодамо лезкс велентень. Истя, витнезель Ине Отечественной войнасо чавовозтненень кеврунгось ды тов ветязель газ. Максови лезкс СВО-в ды кекшемань алтыматнень кодыцятненень. Предприятиясь макссь ярмаконь лезкс Таразбуень, Аловань, Ботужелень, Алашеевкань церьковатнень витнемантень-петнемантень.Сыре ломанень чинтень явшесть сахор икелень важодицятненень – предприятиянь ветерантнэнень (541 ломаннень). Велень хозяйствань важодицянь чинтень истя жо анокстасть казнеть. Весе 215 трудицятненень явшить ярсамопелень наборт. Продукциянть нолдызь минек республикань предприятиятне.Велень хозяйствасо важодицянь профессиональной кенярксчинть кувалма евтан седейшкавань лембе валт сетненень, кить ламо иень перть роботыть мода лангсо – сокить, видить, нуить, роботыть фермасо: потявтыть скалт, андыть-симдить вазт, якить ракшатнень мельга – кепедить минек масторонь аграрной тевтнень. Кадык норовось карми сюпав, техникась вадря, менелесь маней! Кадык важодемась канды тенк кеняркс. Арсян кеме шумбрачи, вийть, семиясо ды кудосо – уцяска, мельтнень-бажамотнень топавтома, икелев молемань тевть!
Александр ПАЛЬКИН,
«Сабанчеевское» ООО-нь прявтось.
Татьяна Маторкина,
Фототне Сергей ЧИЖЕНКОВОНЬ.Реклама. ООО "Сабанчеевское".
ИНН: 1303069116.
ERID: CQH36pWzJqCcH54RE3vrhFaGP8KsZduJRe6NbnyEy7Dnij