Суббота, сентября 18, 2021
Важное

Сардин марто Вардин теевсь содавиксэкс умок, Ленгелейсэ: тунда, видема ланга. Васенцесь эйстэдест – корреспондент. Омбоцесь – сюронь кастыця.

Содавиксэкс сынст теинзе эрямо лувось. Эдь кие марто ансяк эзь вастневе те эли тона журналистэсь... Бути ансяк Занзибаронь короленть марто?..

Яков Петровичнень (истя мерить тетялемсэ Вардиннэнь) эрявсь сёрмадомс очерк паро механизатордо. Ленгелейсэ кие-бути ёвтась мель:
– Те бути Границядо?..
– Эзинь чарькоде, – мерсь корреспондентэсь.
– Ули истямо, – мизолдозь каясь вал вельхозартелень прявтось. – Сардин, Пантелей Андреевич. Мезеяк а мерят. Важоди тык важоди. Кавтонь кис. – А сёпса... сеньгак, мекс тензэ мерить Границя, – седе тов мизолдозь кортась предэсь. – Виде-паро тамашань тев... Пантелей Андреевич войнадо мейлень иетнестэ служась границя лангсо. Ды зярдо те сэтьме обуця, чаво валонь коряс а кирдиця ломанесь кинь мартояк чуродо весть ды теке шкане байтяк корштави «шайтянонь ловсодонть» – сеске лия чачос сови. Чамазо брага чакшокс якстерьгады. Сельместэнзэ толт верьгедить. Пшти вановтонзо сялгсы ялганзо чамас. Мейле друк таркастонзо ёртозь ёртови... Прянзо кепедьсы тюрьган атякшокс. Тутмавгавтозь мештензэ мезе вий кавксть вачкодьсы салдырьксэшка мокшнасонзо ды верьга вайгельть рангсты: «Мон – Границя!!! А тон кие? Пехота! Понав сукс! Кортамояк мартот а карман».

Секскак ней велесэнек весе, покшнек-вишкиненек, Пантелей Андреевичнень удалга ды сельмскак мерить Границя.
Сестэ Вардин ды Сардин вастовсть чокшне ланга васоло паксясо. Кортнесть ансяк видевть ума песэ, килейбуло чиресэ. Яков Петрович эрязкалесь. (Истямо уш журналистэнть оймамонь а содыця уцясказо, коезэ. Сон свал капши, арси тевдензэ мик урьвакстомстонзояк, эйкакшонзо чачомстояк...). Сон Сардинэнь секе-тев кевкстнесь эрямонь кидензэ-яндонзо ды сехте пек роботадонзо.

Механизаторось эстедензэ ёвтнесь прянь комавтозь, виздезь-талнозь, човор, тия-тува... Ды те, нать, вана мекс. Пантелей Андреевич васенцеде вастовсь корреспондент марто, секскак, бульчом, абунгадозь арсесь: «Ды косто саевсь истямось?! Потмом, секень вант, илештясы. Сюлонек-пуярмонек ноцордасы... Оймень таргамс шка а максы».

Сардин журналистэнть минень-сюнонь кевкстемадонзо истя стомавсь, мик псилгадсь. Сон, окойники, стакасто кепедизе прянзо, Вардинэнь чамас вансь сельмень тетькезь, энялдозь: «Кадомак, инескеть. Весе валон ёвтынь, пежеть. Мезть ламо кевкстнемс... Чей, мон аволь кодамо-бути тосо покш прявт. Монь кондятнэде зняро, зяро вирьсэ чувтотнеде».
Механизаторось ды корреспондентэсь Ленгелеев сыргасть чинзэ валгозь. Сэняжа пертьпелькстнэ аламонь-аламонь оласть. Раужо паксянть вельтясь ашо сув. Экше коштсонть качадсь летьке модань, наксадыця лопань, килей пургондавксонь ды мень-бути судонь кутькавтыця, ташто винань кондямо, вечкевикс чине.

Килейбулосонть кайсететсь цёковонь моро, васня буто пелезь-кунсолозь, мейле седе эрязасто, гайтевстэ, мерят, лыкавтсь килеень ёлманя-цёцяня тарадтнэнь, лангстост певердсь мазый эрьгеть-човалят.
Яков Петровичень Сардин удомо тердизе эстензэ. Пантелей Андреевичень низэ инженть андызе рестазь модамарде ды пангодо, каванямонь койсэ каськасто таргсесь умарень вина. Столь экшсэ Вардин кудазоронть марто кортнесть малав пелевес. Валскестэнть корреспондентэсь капшазь тусь ошов.

Ветешка чинь ютазь газетасо лиссь виде-паро пракстань кувалмосо-келесэ очерк. Лемдязель – «Сардин нейгак границя лангсо». Песэнзэ раужо буквасо сёрмадозель – «Я. Вардин».
Очеркенть Пантелей Андреевич ловнызе оймень апак таргсе, мерят, мештезэ тыц пештязель пси, оймень кирьмицявтыця коштто. «Вантака, тамашань тевть: кодамо дошуз алясь, – окойники, домкасто лекстязевсь сон. – Педе-пес эрямом сёрмадызе. Ды допрок алкукс, бути ансяк аламнешкадо артымим. Ды косто сон нучк-пачк содасамам? Натой сеньгак ёвтызе, кода вечкса козяйкам. Буто потсон эрясь пингем перть. Оно кодат неть журналисттнэ! Некак, министрадояк превейть... Те аволь минь: превсэ а кирдеви тенек се, мезде валске ярсынек, басинек эйкакшонок марто».

Кувать эштё Сардин дивсесь-вайкснесь: «Ды те кода истя? Мондень зяро сёрмадозь… ды эдь весе паро валсо!» Пантелей Андреевичень седейс валовсь та-кодамо покш мельспаро, кона, бульчом, куломазонзо а стувтови, кода мазый моро.

Нама, Сардинэнь лемс икелеяк промкссо а весть ёвтазельть шнамонь валт, но сынь истя виевстэ, псистэ эзть сыремте мелензэ-арсеманзо, кода газетасо сондензэ сёрмадовксось. Механизаторось ловнызе очеркенть колмоксть. Муст-муст пейдезевсь, газетанть стамбарнэ шикадизе горобияс, нинть венчамонь оршамонзо юткс.

Мейлеяк, юткошкасто, сон яла таргасы газетанть, озы столь экшс ды апак капша ловны «Сардин нейгак границя лангсо» очеркенть. Се шкастонть Пантелей Андреевич прянзо мари истямокс, теке одс чачи, тееви аволь ансяк эсь тиринь велентень, натой весе масторонтень эрявикс ломанекс. Теке марто седейсэнзэ сыремкшни истямо мель: «Неемаль бу корреспондентэнть. Некак пильгезэнзэ сюконявлинь».

Пётр Ключагин

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».