Среда, февраля 28, 2024
Важное

«Птицефабрика «Атемарская» ОАО-сь эсь васенце продукциянть – саразонь алтнэнь – нолдынзе малав 57 иеде икеле, эштё 1967 иестэ. Неень шкане нармунень трямонь-кастомань фабрикась ловови Россиянь агропромышленной покш предприятиятнестэ вейкекс. Птицефабрикасонть нолдавт саразонь алтнэнь вадрячись тесэ васняяк топавтови неень шкань высокоэффективной производственной цикланть тевс нолдазь. Предприятиянть важодемадо, производствань од ёнкстнэде ды фабрикань прявт сюпавчиденть – трудий ломантнеде, ловнодо минек материалстонть.



– Фабрикась минек полной циклань: родительской стадасто саезь промышленной алыиця саразс, – ёвтни «Птицефабрика «Атемарская» ОАО-нь прявтось Александр Валентинович Щемеров. – 2023 иестэ предприятиясь нолдась 488 млн алт. Эрьва чистэ саезь 1 млн 370 алт. Неень шкане алыиця саразтнэде лововить малав 1 млн 680. Минек продукциясь миеви кода эсенек предприятиянь лавкатнесэ, истя сетевой покш магазинтнэсэ, кода Мордовиясо, истя лия регионтнэсэяк.
«Атемарская» нармунень фабрикась башка мель яви производствань одкстомтомантень. Неень шкань оборудованиясь ды ресурсонь ванстомань аппараттнэ лездыть кастомс производстванть ды вишкалгавтомс ёмавкстнэнь. Истя, 2023 иенть прядовомсто предприятиясонть панжозель алонь ванстомань од склад. Тосо весемесь теезь неень технологиятнень коряс: кирдеви эрявикс температура ды кошт, конась лади алтнэнь ванстоманть туртов.
А вана кодамо ки алось юты саразонь кирдема корпустнэстэ рамицянть видьс, миненек ёвтнесь «Птицефабрика «Атемарская» ОАО-нь алонь складонь прявтось Анастасия Викторовна Макарова.

– Минь тынк марто ваннотано алонь ванстома складонть ды цехенть, косо юты алтнэнь сортовамонь производственной весе циклась. Тесэ важоди Moba Omnia сортировамонь машинась, конань важодемань виезэ – 120 тёжат алт часозонзо, – ёвтни Анастасия Макарова. – Транспортёртнэва алось пачтяви предприятиянь весе корпустнэстэ. Седе мейле алось моли таштамонь столенть лангс ды седе тов пачкоди ориентаторс, косо велявтови эрявикс ёндо ды юты дезинфекторс, косо тееви дезинфекция. Эряви тешкстамс, дезинфекторонть потсо важодить ультрафиолетэнь 12 лампат, конатне теить лангозост путозь весе эрявикс роботанть.

Седе тов, кода ёвтнесь Анастасия Макарова, алось понги егг-инспекторс, конась реди технологической рудазонть (пуленть, толгатнень). Теде мейле алтнэ ютыть крег-детекторонть пачк, конась ванны эрьва алонть лазовкстнэнь коряс: алонть вачкоить 144 молоткинеть. А вана уш крег-детектордонть мейле алось кучови онкстамотнень лангс, косо ваннови сталмось ды тень коряс ливтеви категориясь: высшей категориясь (СВ) – 75 г ды седе ламо, отборной алось (СО) – 65 саезь 74,9 г, васенце категориясь (С1) – 55 саезь 64,9 г, омбоце категориясь (С2) – 45 саезь 54,9г, колмоце категориясь (С3) – 35 саезь 44,9 г.

Седе мейле, кода алонть сталмозо онкставсь, сон юты маркировкас, косо лангозонзо тешкстави алонь категориясь.
Весе неть ёнкстнэнь ютазь, алтнэ явшевить линиятнева эсь категориятнень коряс ды теде мейле уш ютыть упаковкас.
– Предприятиясонть весе производственной важодемась автоматизировазь. Одкстомтозь оборудованиясь сонсь ливти колавозь алтнэнь, явши категориятнева ды пурны паргинетнес, – ёвтни Анастасия Макарова. – Весе те лезды аламолгавтомс кедьвийсэ важодеманть ды кирдемс нолдавт продукциянть вадрячинзэ.
Нама, производствань одкстомтомась ды важодемасо неень шкань технологиятнень тевс нолдамось теить ламонть, ансяк весементь прявтсо аштить эсь тевень содыця алкуксонь важодицятне. Истя, цехсэнть производственной весе тевтнень мельга домкасто ваны сортировальной машинань операторось. Те тевенть тесэ топавты эрзянь цёрась (чачома-касома тарказо – Отяжелень райононь Дюрькина велесь) Александр Николаевич Поняйкин. Сон компьютерэнть вельде ваны линиянть важодеманзо мельга, ливти асатыкстнэнь ды вити сынст. Истя жо операторось денестерс путы ячейкатнень ды паргинетнень, конатне пештявить алдо ды ютыть сортировщиктненень.

– Мон предприятиясонть роботан 2015 иестэ саезь, операторокс – кавто иеть, – ёвтни Александр Поняйкин. – Ушодокшнынь колбасань теема цехстэ слесарекс, мейле ютынь тей операторокс. Нама, оборудованиянть марто важодемантень васняяк эрявсь тонавтнемс ды, покш сюкпря икелень важодицянтень Виталий Разгуляевнень, сон весементь тень толковизе-ёвтнизе.

Эряви ёвтамс, сортировальной машинань эрьва линиянть экшсэ ашти важодиця. Вейкесь эйстэст – Екатерина Юрьевна Силантьева. Сонзэ тевтнестэ прявтокс ашти алтнэнь явшемась-пурнамось, эрявикс информациянть марто коробкатнес конёвтнень педявтомась, штамптнень путомась.
Нармунень фабрикасонть тейтерь-авась важоди малав кемень иеть, 2014 иестэ саезь. Весе те шканть перть роботы алонь складсонть.
– Важодемась тесэ монень мелень коряс. Фабрикась ашти кудонок маласо, ковгак ве ёнов ардтнемс а эряви, зарплатанть пандыть шкастонзо ды а берянь. Мекс бу а роботамс, – кемексты Екатерина Юрьевна.

А вана Любовь Алексеевна Залогова предприятиясонть топавты 2-це № складонь кладовщикень тевенть. Кода тешкстыть прявттнэ, саразтнэде ды алдонть соды весементь, алонь складонь важодеманть лади кода эряви.

– Фабрикасонть важодян кемзисемге иеть, меельце ниле иетнень перть те складсонть, – корты Любовь Алексеевна. – Ламо иень перть роботынь алонь сортировамо машинанть экшсэ, мейле ютынь кладовщикекс. Тевесь пек ответственной. Валске марто сат ды весе важодицятненень тешкстат чинь аравтлувонть: ёвтат, кодамо течи фасовкась, явшат этикеткатнень. Операторонтень истя жо толковасыть чинь тевтнень ды кодамо ячейкас пештяма алтнэнь.
Складсонть роботыть малав 30 ломанть. Ютксост важодицят, операторт, сталмонь кандтницят-усксицят. Любовь Залоговань вановт ало фасовкась, коробкатнень-упаковканть примамось, продукция мельга сыця машинатнень пурнамось-ильтямось. Ды эрьва чинь отчёттнэ: алонь зяро ячейкат ды паргинеть пурназь важодемань шканть перть. Кода тешксты авась, вановт ало тесэ эрьва алось.

– Минек предприятиясонть алтнэ пурнавить ячейкава ды паргинева. Ячейкасонть лововить 30 алт, паргинесэнть – 10. Неть ячейкатне ды паргинетне пештявить коробкас. Улить коробкат, косо лововить 360 алт (тесэ ячейкатне), лиятнесэ – 200 алт (паргинетне), – ёвтни Любовь Залогова. – Теке марто упаковкадонть, паргинетнеде неень шкане минек лововить зярыя. Лавкань эрьва сетенть эсензэ упаковказо. Ды штобу паргинетнень пурнамсто кияк мезеяк аволь тапа, весементь мельга ванома пштистэ.

Зярдо весе паргинетне-коробкатне пурназь паллетс, сталмонь усксицятне пачтить сынст анок продукциянь ванстома складс.
– Тесэ минек истя жо важоди неень шкань од оборудования, конань лемезэ «паллет-обмотчик». Лиякс меремс, коробкатнень марто паллеттнэ тесэ тапарявить плёнкасо. Машинась пек превей, эсь тевенть вадрясто теезь, лотки сонсь, – корты Анастасия Макарова. – Покш сюкпря минек прявтонтень Александр Валентиновичнень, сон ламо теи производстванть одкстомтомга ды трудий ломантнень тевест шождалгавтомга. Неень шкане те пек эрявикс!

Юлия Еремина
Фототне Эдуард Ретунскиень


Реклама. ОАО "Птицефабрика "Атемарская". ИНН: 1315487527. ERID: 4CQwVszH9pWvKCK3uoe

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».