Среда, февраля 28, 2024
Важное

Республикань агропромышленной комплекссэ важодицятне вадря невтевкс марто прядыть те иенть. Тедеде сынь сайсть 2 миллиондо ламо тоннат сюро. Кода тешкстызе Мордовиянь Прявтось Артём Здунов Велень хозяйствань ды перерабатывающей промышленностень важодицятненень алтазь кенярксчисэнть, те сехте вадря невтевкс ПФО-нь регионтнэнь ютксо. Эштё зярдояк республикань паксятнестэ эзть пурнакшно истямо сюпав норов. А мезть сёпомс, теньсэ покш таликаст республикань весе районтнэнь велень хозяйствань предприятиятнень.

 

Истятнэнь ютксо «Сабанчеевское» велень хозяйствань предприятиясь, конань прявтсо МР-нь Славань III степенень орденэнь кавалерэсь, МР-нь Государственной премиянь лауреатось, МР-нь велень хозяйствань заслуженной роботникесь Дмитрий Николаевич Игушкин.

Дмитрий Николаевич – алкуксонь прявт. Сон весе эрямонзо алтызе велень хозяйствантень ды тиринь Сабанцеле велентень.

Неть читнестэ минь содавтынек хозяйстванть ды кортынек важодицятнень марто те иень невтевкстнэде ды изнявкстнэде.

Кода тешкстызе «Сабанчеевское» ООО-нь растениеводствань коряс прявтонь полавтыцясь Вера Сергеевна Кочурина, меельце зярыя иетнень ваннозь, 2023 иесь велень хозяйствань важодицятнень туртов пек сюпав.

Бути кортамс видестэ, истямо урожай эзинек учо. Кадык видема шкась лембель, летькеськак модасонть сатышкаль, вегетациянь шкастонть пиземеть арасельть. Ды озимтнеяк васень шкастонть пряст невтсть аволь пек вадрясто, – корты Вера Кочурина. – Ансяк лиссь весемесь овсе лиякс. 6300 гектарс видезь сюротнестэ, вейсэ зёрнакс кукурузанть марто, минь саинек 28 тёжадо ламо тоннат норов. Средней невтематне – 47 центнерт гектарсто. Ламбамо якстерькаесь истя жо кенярдовты. Зярдо ансяк ушодынек сонзэ таргамо, урожайностесь ульнесь косо-бути 370 центнерт гектарсто, прядовомантень жо ютынек 450-с.  Течинь чине прядтано сонзэ ускоманть, кадовсь аламошка.

Эряви меремс, сюракшов ракшатнень туртов андомапельтнедеяк хозяйствась анокстась сатышка. Саты аволь вейке иес. Кода мерсь Вера Сергеевна, весемесь ульнесь теезь шкасто. Шкасто видевсть озимой сюротнеяк. Сынст алов хозяйствасонть явозь 2 тёжат гектарт. Лисевкстнэ а берянть, покш кемема, сынь вадрясто ванстовитькак. Истя жо хозяйствасонть анокстызь модатнень тундонь видематнень аловгак, васняяк ламбамо якстерькаенть (2 тёжат гектарт) ды кукурузанть алов (900 гектарт). Тундонь видемантень анокстазь видьметнеяк. Седе покш пельксэсь эйстэст карми эсензэ хозяйстванть, элитной видьметнень маласо шкастонть рамасызь.

Нама, лембе читне ды шкасто пиземетне велень хозяйстванть туртов эрявикс ёнкс. Ансяк кода мерсь Вера Кочурина, алкуксонь важодицявтомо мезеяк а тееви. Эрьва изнявксонть лангсо ашти трудий ломань. Самай истят роботыть «Сабанчеевское» ООО-со. Комбайнёртнэстэ сехте вадря невтевксэст тедеде А. Ю. Аньчковонь, В.П. Учеваткинэнь, А. Г. Чепухинэнь. Сынь нусть сехте ламо сюро. Сюронть усксемасо весень икельдизь М.М. Палькин, В. Г. Саврушкин, А.И. Кузоваткин, В. П. Федотов, П. В. Козин. Ды, нама, кода а тешкстама тинге лангсо важодицятнень: В. М. Слугинэнь, М. И. Кокуркинэнь ды И. П. Нестеровонь.

Те иенть вадрясто прядыть «Сабанчеевское» ООО-нь ловсонь-товарной фермань важодицятнеяк. Кода молить тевтне тосо, миненек ёвтнесь МТФ-нь прявтось Павел Иванович Учеваткин. Сонзэ вановт ало роботыть весемезэ ниленьгемень ломанть, кементне эйстэст – скалонь потявтыцят, эли, кода ней сынст лемдить, операторт. Истя жо улить вишка ваз мельга якицят, слесарть, ракшатнень мельга якицят.

Хозяйствань Сабанцелень отделениясонть течинь чине кирдевить 650 сюракшов ракшат, сынст эйстэ 340 – потявтовиця скалт, – ёвтни Павел Учеваткин. – Эрьва скалсто чизэнзэ потявтовить 20–22 литрат ловсо. Сонзэ минек кедьстэ рами Ицялонь сырань теема заводось. Эрьва чистэ тов ильтятано кото тоннат ловсо.

Наталья Григорьевна Башкайкина «Сабанчеевское» ООО-со важоди ваз мельга якицякс. Хозяйствасонть вана уш 37 иеть. Важодема кинзэ ушодокшнызе промкомбинатсонть, сисем иеть тосо роботась. Мейле ульнесь звеньевоекс, столовойсэ пидицякс-паницякс ды вана сисемшка иеть уш тесэ. Сонзэ вановт ало вишка вазнэтне. Кода кемень чисэ сынст тусызь, ды аватне якить мельгаст пельиес. Сынь эйсэст симдить-андыть, ванстыть шумбрачист.

 А вана Светлана Александровна Сорокинань тевезэ сюлмавозь фермань сехте вишкине эрицятнень марто. Сон яки ансяк вазыязь вазнэтнень мельга. Кода корты сонсь авась, роботы чачтома кудосо.

Светлана Александровнань колхозсо важодема кизэ ушодовсь овсе эйкакш порасто. Тесэ весе пингест перть важодсть тетязо-авазо – Александр Иванович ды Мария Яковлевна Слугинтнэ.

Истя, эштё овсе тейтерькакс васня авань марто лездыцякс сакшнылинь, мейле монськак карминь колхозсо роботамо скалонь потявтыцякс, – ёвтни Светлана Сорокина. – Мейле ютавтымизь вишка вазнэтнень мельга якамо. Тесэ вазыязь скалтнэяк кирдевить. Сынст колмоксть потявттано ды ловсонть симдтяно вазнэтненень. Сынь тесэ кирдевить комсь чить, мейле лияв сайсызь.

Фермасо оборудованиянть вадрясто важодеманть мельга ваны Анатолий Михайлович Учеваткин. Сонстемензэ хозяйствасонть ковгак. Анатолий Михайлович пштистэ ваны сень мельга, штобу потявтомань ды ловсонь ванстомань оборудованиясь роботаволь свал ды вадрясто. Эд тень эйстэ ашти ловсонть ваньксчизэ ды вадрячизэ. 

Улить хозяйствасонть од специалисткак. Вейкесь эйстэст – ракшатнень мельга якицясь Иван Андреевич Пучкин. Сон тесэ важоди малав вете иеть. Сась Отяжелень аграрной колледженть прядомадо мейле. Алкукс жо, велень хозяйствасо уш эйкакш шкасто саезь. Зярыя иень перть кизэнь каникулатнестэ ульнесь стадань ваныцянь лездыцякс. Истя велесэ кадовськак. Од цёрась стакачитнень а реди, а эдь ракшатнень мельга якицянть тевензэ пек ламо – андомапельтнень явшема, ферматнесэ скалонь алкстнэнь ды ютамо таркатнень свалшкане кирдема ваньксчисэ. Сонзэ важодеманть шныть. Кода мерсь Павел Учеваткин, цёрась роботы пек парсте.

Вана истят простой эрзянь цёрат ды ават ванстыть ды кирдить минек масторонть продовольственной безопасностензэ.

Мельвановикс ялгат! Ёвтан тенк седейшкавань поздоровт тынк профессиональной кенярксчинк коряс – Велень хозяйствань ды перерабатывающей промышленностень важодицянь чи марто!

Тынк эйстэ ламосо ашти минек республиканть ды целанек масторонть вандынь чизэ. Тынь тейтядо покш ды эрявикс тев. Арсян тыненк ды тынк малавиксэнк туртов кеме шумбрачи, уцяска, вадря тевть ды покш изнявкст! Уледе кемевикст эсь кочказь тевентень!

Д. Н. Игушкин,

«Сабанчеевское» ООО-нь прявт.

Юлия Еремина

Фототне

Эдуард Ретунскиень

Реклама. ООО "Сабанчеевское". ИНН: 1303069116. ERID: 4CQwVszH9pWuK6TiibJ

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».