Кода свал, сёксень меельце ковстонть, ноябрясто, минек республикасо тешкстави Велень хозяйствань ды перерабатывающей промышленностень важодицятнень чись. Кенярксчиденть икеле минь содавтынек Отяжелень райононь ды республикань велень хозяйствань прявт предприятиятнестэ вейкенть – «Мордовское агропромышленное объединение «Восток» ООО-нть.
Кодамо ульнесь те иесь велень тружениктнень туртов, изнявкстнэде ды сы шкантень арсематнеде кортынек предприятиянь прявтонть Александр Владимирович Трошинэнь ды тесэнь важодицятнень марто.
– Те иестэ «МАПО «Восток» ООО-со сюротнень ды лия культуратнень алов явозель малав 19 тёжат гектарт мода. Эряви меремс, иесь удалась, – ёвтни Александр Владимирович. – Сюрось чачсь пек вадря, урожайностесь покш. Истя, хозяйствань паксятнес видезь яровой товзюрось макссь 60 центнерт гектарсто, озимой товзюрось – 54 центнерт, шужось – 60 центнерт, кснавось – 45 центнерт.
Ней хозяйствасонть весе вийтне максозь ламбамо якстерькаенть Ромодановань сахаронь теема заводов пачтямонтень. Кода мерсь Александр Трошин, пеледензэ седе ламось уш ускозь. Истя жо молить анокстамот тундонь видемантень: анокставить-рамавить видьметне ды удобрениятне.
– Нама, те иестэнть сюротнень урожаесь кенярдовтымизь. Монь важодема иетнень перть истят невтемат эштё арасельть. Апаркстомты вейкесь – сюронть лангс питнетне пек вишкинеть, сынст видеманть-кастоманть коряс ютавтовкстнэ жо касыть иестэ иес, – корты Александр Трошин. – Мезеяк лангс апак вано, кемтяно, весемесь полавтови. Секскак сы шкантень аравтлувонок покшт, ули мезе лангсо важодемс. Сы иестэ ушодсынек строямо видьметнень ванстомань заводонть. Ней весе документтнэ анокстазь, экспертизатне ютазь. Арсеви, сы иень нуемантень заводось тееви. Истя жо малав анокставсть весе документтнэ Ламбаськесэ ракшань трямонь-кирдемань комплексэнть стявтоманзо коряс.
Эряви ёвтамс, течи «МАПО «Восток» ООО-со ракшатнень трямонтень явови башка мель. Сюракшов ракшатнеде 1,5 тёжат прят. Сынст эйстэ потявтовиця скалтнэде – 675. Хозяйствась ловсонть мии Саранск ошонь консервань теемань заводов.
– Кодат бу цифрат мон аволинь ёвта, кодат изнявксто аволинь корта, ансяк весементь лангсо прявтось – те минек ломантне, «Восток» МАПО-нь покш ды ояксчисэ эриця коллективесь. Сынтемест ковгак. Неень шкане хозяйствасонть важодить 225 ломанть. Эрьвась эйстэст – эсь тевсэ алкуксонь профессионал, – кемекстызе Александр Владимирович.
Трудий ломанть
Николай Иванович Слугин агрономокс важоди уш колоньгеменде ламо иеть. Эсь тевенть аволь ансяк пек парсте содасы, вечксыяк. Сонсь цёрась Ламбаське марто шабрацек аштиця Трокс Кужо велестэ. Тосо прядызе школанзо, тосто саекшнизь армияв. Николай Слугин служась Германиясо. Армиясо службанть ютамодо мейле велявтсь тиринь велев ды арсесь профессиядо. Документэнзэ максынзе Н. П. Огарёв лемсэ МГУ-в. Кочкизе велень хозяйствань факультетэнть. Николай Слугинэнь мельс пек тусь агрономонь тевесь.
– Университетсэ тонавтнемстэ производственной практикам ютыя тиринь велень колхозсо, – ледстни «МАПО «Восток» предприятиянь прявт агрономось. – 1988 иестэ, университетэнть прядомадо мейле, сынь важодеме тиринь велень Ленин лемсэ колхозов. Ды роботынь тосо 2007 иенть самс. Зярдо теезель «МАПО «Восток» велень хозяйствань предприятиясь, ютынь важодеме Ламбаськев. Куш Ламбаське велень модатнень содылинь, ялатеке савсь эштё сынст тонавтнемс, ладямс эсь важодеманть.
Ёроков агрономонть те лиссь а беряньстэ. Сон а ашти ве таркасо, сюронь урожаенть кастомга важодемасо нолды од ёнкстнэнь ды технологиятнень. Ды те весемесь лезды.
Эряви ёвтамс, «МАПО «Восток» ООО-со важодить аволь аламо од специалисткак. Сынст ютксо од агрономтне Андрей Слугин (Николай Ивановичень цёразо. Кода тетязояк, кочкизе велень хозяйствасо важодеманть) ды Николай Соломкин. Цёратне прядызь Н. П. Огарёв лемсэ МГУ-нть, ней тонавтнить аспирантурасо. Андрей агрономонь ёнксонть коряс, Николай жо тонавтни зоотехниянть. Ялатеке агрономокс важодемась тензэ седе мелень коряс. Сынь Николай Ивановичень туртов васень лездыцят.
– Мезес-бути мон сынст тонавтан, лиянтень – сынь монь, – ёвтни Николай Слугин. – Сынь куроксто весементь чарькодить, вадрясто содасызь важодемасо нолдавиця од технологиятнень. Ды те видеяк, эдь сынь од ломанть. Велень хозяйствасо од специалисттэме течи ковгак!
А вана «МАПО «Восток» ООО-нь весе техникась ашти прявт инженерэнть Сергей Вячеславович Шубинэнь пшти вановт ало.
Сонзэ колмо высшей образованиянзо, ансяк те тевсэнть эрявкшность Н. П. Огарёв лемсэ МГУ-нь Механикань ды энергетикань институтонь содамочитне.
Важодемань иетнень перть Сергей Шубин роботакшнось водителекс, Чаунзасо «Мордовцементсэ» ульнесь механикекс. А ней уш вете иеть «Восток» МАПО-со. Сергей Вячеславовичень вановт ало 54 механизаторт, 25 водительть, 3 механикть, мастерскойтнень ды токарной цехень прявтт.
– Велень хозяйствасо сехте пси шкатне – тундосто саезь сёксес, ансяк мелявкстнэде тельняяк сатокшныть. Ламот трактортнэ важодить фермасо, лиятне – китнень ды велетнень куротнень ловонть эйстэ урядамосо. Теке марто теленть перть молить анокстамот тундонтень – механизатортнэ витнить-теить эсь техниканть, – ёвтни Сергей Шубин. – Техникадонть – а те тракторт, комбайнат, КамАЗ-т, погрузчикть ды эрьва кодат агрегатт – минек ламо. Теке марто паркось свалшкане одкстомтови. Те иестэ раминек «Полесье» фирмань кавто комбайнат, прицеп марто кавто КамАЗ-т, погрузчик. Неень шкане хозяйствасонть лововить кемнилее покш тракторт. Сы иестэ арсеви рамамс эштё кавто комбайнат ды КамАЗ-манипулятор. Эряви тешкстамс, весе техникась минек сюлмавозь Глонасс марто, мезень коряс парсте неяви, кие косо роботы ды кода моли важодемась.
Кода мерсь прявт инженерэсь, механизатортнэнь ютксо истя жо улить зярыя од специалистт. Вейкесь эйстэст Андрей Вергизов. Сон зярс тонавтни Отяжелесэ агроколледжсэ, ансяк уш невтизе прянзо сюротнень нуема шкасто. Кизэнь перть роботась МТЗ-1221 тракторсо ды нейгак лезды ламбамо якстерькаень усксемасо.
Тешкстазельть Максим Никонов, Василий Жегалин, конатне роботыть тракторсо ды комбайнасо. Цёратне тескень, Ламбаськень. Предприятиясонть сынст лангс покш кемемат.
ПОЗДОРОВТ
– Минек республикасо ладявсь паро кой – сёксенть прядовомсто тешкстамс велень хозяйствань важодицятнень. Сёксесь – сюпав шка. Шка ёвтамс иень цётамотнень ды кемекстамс аравтлув сы иентень. Тедеде невтематне вадрят, арсематнеде ламо. «Восток» МАПО-нь весе важодицятненень ды минек ялгатненень ёвтан лембе поздоровт профессиональной кенярксчинть кувалма! Арсян тенк шумбрачи, уцяска ды од изнявкст минек а шожда тевсэнть!
Александр Владимирович ТРОШИН,
«МАПО «Восток» ООО-нь прявт.
Юлия Еремина
Фототне Эдуард РЕТУНСКИЕНЬ
Реклама. ООО "Мапо "Восток". ИНН: 1326200261
Erid: 4CQwVszH9pWuJkt5XTh