Россиясо ушодовсь эрицятненень коронавирусонь кезовдонть ванстомань ливксэнь путомась. Сонензэ анок Мордовияськак. Аволь умок республикав сась «Спутник V» вакцинань покш партиясь.

Республикань эрицятненень коронавирусонть каршо ливксэнть путовтомо эсь прянть мереви сёрмадстомс поликлиникасо эли Госуслугань порталсонть.Тень туртов эряви совамс личной кабинетс.
Прявт менюсонть муемс «Услуги» сёрмадовксонть, теде мейле лепштямс «Мое здоровье», седе тов «Запись к врачу» ды «Записаться» плаштинетнень.

Кочкамс эсенк региононть, сёрмадомс ОМС-нь полисэнь номерэнть, чачома иенть, ковонть, чинть. Мейле экранонтень лисить лецямонь-профилактикань учреждениятне. Эйстэст пек ламо, эрявикс поликлиниканть муемс ули седе шожда, бути лепштямс лупань артовксонть лангс ды сёрмадомс «Процедурный кабинет» валтнэнь.

Теде мейле кочкамс эрявикс Тенк поликлиникасонть процедурной кабинетэнть. Седе тов – «Выберите медицинскую услугу». Кочкасынк: «Вакцинация от COVID-19». Меельце эскельксэсь – «Выберите врача».

Кочкатано: «Кабинет вакцинации от COVID-19». Ды теде мейле панжови «Выберите удобную дату и время приема» сёрмадовксось. Невтевить читне, зярдо мереви сёрмадстовомс, ды кочкамс эрявикс шканть. Теде мейле кадови лепштямс «Да, подтверждаю».

Ливксэнь путовтомо мереви сёрмадстовомс Мордовиянь эрицятненень, кинень топодсть 18 иеть.
Кода толковизь Мордовиянь Здравоохранениянь министерствасонть, ливксэсь а путови, бути ломанесь сэреди гриппсэ эли ОРВИ-сэ, печти аллергиянь пшти фаза, истя жо химио- ды лучевой терапиянь шкасто. Зярс ливксэсь а путови сетненень, кить уш сэредсть коронавируссо.
Ливксэнь путомадо икеле ломаненть ванносы врач, антителатнень коряс тестэнть теемс а эряви.

«Спутник V» васенце ливксэнть теемадо мейле 21 чинь ютазь путови омбоцесь. Одс эсь прянть сёрмадстомс а эряви, те тевенть топавтсы системась. Бути тешкстазь шкастонть ломанесь а сави, сёрмадстомась кандови лия чис.

Ливксэнть путомадо мейле иммунитетэнть кемекстамось редяви 42 чинь ютазь васень вакцинанть теемадо мейле ды ванстови кавто иеть.