Якшамковонь 23-це чистэ Мордовияв сась «Спутник V» вакцинань покш партиясь – 14850 комплектт. Регионось ульнесь анок препаратонть саемантень.
Эштё 2020 иестэ вакцинань ванстоманть туртов рамазель весе эрявикс оборудованиясь. Весемеде теде ды коронавирусонь кезовдонть ванстомань ливксэнь путомань башка ёнкстнэде неть читнестэ ютавтозь брифингсэнть ёвтнесть Мордовия Республикань Здравоохранениянь министрась Олег Маркин ды республикань Минздравонь Прявт внештатной эпидемиологось Михаил Чумаков.
«Течи минь уш ушодынек ливксэнь путоманть сазь партиянь вакцинасонть. Регионсонть важодить ливксэнь путомань 42 пунктт медицинань 25 организациясо. Кемекстазь прявт группатне. Неть: медицинасо важодицятне, тонавтыцятне, социальной сферань специалисттнэ ды истя жо сыре ломантне, конатнень кемекстазь седеень, тевелявонь орматне», – тешкстызе Олег Маркин.
Лиятненень эсь прянть мереви сёрмадстомс госуслугатнень порталсонть ды истя жо сёрмадстыть ливксэнь путомань кабинеттнэсэяк. Россиянь Здравоохранениянь министерстванть кармавтоманзо коряс коронавирусто ливксэсь а путови 18 иеде седе вишкинетненень.
Истя жо вастовоманть лувсо министрась толковизе ломантненень – ливксэнь путомадонть мезеяк берянь а ули. Вакцинанть юрсо вирус арась. Ливксэнть путомадо мейле жо иммунитетэнть кемекстамось редяви 42 чинь ютазь васень вакцинанть теемадо мейле.
Мордовиясо неень шкане лововить 18 иеде седе покш 656700 ломанть. Вейсэнь иммунитетэнть теемга ливксэнть путома 60 проценттнэнень – те республикань 394 тёжат эрицятне. «Ливксэсь а путови сеть ломантненень, кить сэредсть те ормасонть. Минек ловоманок коряс, те малав 61 тёжа ломанть. Лисни истя, што вейсэнь иммунитетэнть теемга ливксэнть путома малав 333 тёжат эрицятненень», – мерсь министрась.
Ливксэнь путомантень кодаткак покш анокстамот а эрявить. Васняяк, иляст уле гриппень эли ОРВИ-нь невтевкст, кавто-колмо чиде теде икеле ды мейле а эряви симемс иредстиця симемапельть. Ливксэнть теемадо икеле ломаненть ванносы врач, антителатнень коряс тестэнть теемс а эряви.
Ледстясынек, «Спутник V» васенце вакцинась Мордовияв сась эштё ожоковсто. Те шкастонть саезь сон теезь 2742 ломаннень, омбоцесь путозь зярс 1347 ломаннень. Седе ламот тесэ – медицинасо важодицят. Олег Маркин тешкстызе, ливксэнть путомадо мейле ёжонть пек берякадома эзь редяво, зярыянь кепетекшнесь аволь покш температура.
Вастовоманть шкасто Мордовия Республикань Здравоохранениянь министрась Олег Маркин ды республикань Минздравонь Прявт внештатной эпидемиологось Михаил Чумаков кемекстызь: вакцинась а канды кодамояк зыян. Сынь кавонест ливкст путовтсть. Министранть кемекставсь а вишкине титра – 18,7.
Вакцинань теицятне алтыть, сеть ломантнень, кинень путозь ливкс, тееви кавто иень иммунитет.
Юлия Еремина
Фотось Э.Ретунскиень