Течи Печатень Кудосо ютавтовсь пресс-конференция Мордовиянь Правительствань Председателень полавтыцянть Галина Лотвановань, Мордовиянь здравоохранениянь министранть Олег Маркинэнь ды МР-ва Роспотребнадзоронь прявтонть Татьяна Харитоновань марто. Кортамось мольсь республикасонть коронавирусонь инфекциянть марто сюлмавозь тевтнеде.

Галина Лотванова тешкстызе, весемезэ республикасонть редязь коронавирусссо 2 360 сэредицят. 1225 ломантне лецявсть. Евтызе, ормалгадозетнень ютксо ламо 65 иеде седе сыре ломанть, кинень васняяк эряви аштемс кудосо.

Течинь чинтень Мордовиясо ютавтозь коронавирусонь коряс 72 519 ванкшномат. Анализт саезь 63 304 ломантнень пельде.

"Минек учить колмо оймсема чить. Сень эйстэ, кода карматанок топавтомо весе вешематнень, кармить аштеме республикасонть молиця тевтне, - мерсь Галина Алексеевна. - Нейтядо, кода полавтовить тевтне Московсо. Тосо эдь весемесь ушодовсь колмо недлядо седе икеле. Течи весемесь ашти эсенек эйстэ".

Олег Маркин мерсь, Мордовиясо коронавируссо сэредицятнень лецямост туртов теезь 1957 таркат. Меельце читнестэ од таркат панжозь Рузаевкань ды Комсомольскоень больницятнесэ, истя жо республикань офтальмологической больницясонть.

Олег Маркин пачтясь, Мордовиянь 223 медработниктне ормалгадсть коронавируссо, ламотнень ежост пек стака.

Пурнавозетне пачтясь, республикась аноксты топавтомс ограничениятнень каямонь васенце пельксэнть аштемковонь прядовомсто. Тень туртов эряви топавтомс весе вешематнень ды кармавтоматнень.