Республикань Кудосо казевсть здравоохранениянь, санитарно-эпидемической сэтьмечинь службань важодицятне, специалисттнэ ды волонтёртнэ, кить бороцясть коронавирусонь инфекциянть каршо. Пурнавозтненень поздоровонь лембе валт ёвтась Мордовиянь Прявтось Владимир Волков.
Пурнавозтненень пшкадемстэ, региононь руководителесь тешкстызе, уш малав пельие Мордовиясь эри покш анокчинь лувсонть. «Неень шкань эпидситуациясь а мери медицинань ды санитарной контролень органонь важодицятненень лавшомгалемс. Коронавирусонь инфекциянть лангсо изнямодонть кортамс рана. Зярс арась вакцина, вирусось кадови мартонок. Теке марто тевтнень стакалгавты гриппень ды ОРВИ-нь коряс од эпидсезонось. Ансяк редяви, вейсэнь бажамотнень ды, нама, тынк героической важодеманть вельде минь кармавтынек эпидемиянть аламодо потамс».
Весе стакачитнень лангс апак вано, республикань здравоохранениянь системась цидярдынзе испытаниятнень. Больницятнесэ теезельть малав 2 тёжат таркат, те ветексть седе ламо икелень арсематнень коряс.
Мордовиянь эрьва колмоце больницясь теезель «ковидэнь» госпиталекс. Те республикань пелест ёнкстнэсэ лецямонь 18 учрежденият. Пек ламо тевть савсь топавтомс врачтненень-реаниматологтненень ды Медицинань лезксэнь куроксто явомань станциянь бригадатненень. Чинек-венек важодсть специалисттнэ, конат ютавтсть КТ-нь ванкшномат, башка тешкстазель Республиканской 5 № больницянь поликлиникась.
Пандемиянть шкасто коронавируссо сэредицятненень теезь кементь операцият. Владимир Волков тешкстынзе Республиканской клинической больницянь, Катков лемсэ больницянь ды Республиканской эйкакшонь больницянь врачтнень-хирургтнень вадря важодемаст, покш ответственность путозель Рузаевкань райононь больницянь важодицятнень лангс, сынсь лездасть чачтомс коронавируссо сэредиця аватненень.
«Ёвтан сюкпря эрьвантень эйстэнк пек вадря важодеманть кисэ! Пандемиянть шкасто «ковидэнь» госпитальтнесэ важодсть 118 студентт ды ординаторт. Сюкпря апелемачинть ды сы шкань профессиянтень кемевиксчинть кисэ», – мерсь В.Д. Волков.
Владимир Волков тешкстызе, минек медучреждениятне тейсть лекарствань, оборудованиянь ды ванстомань средствань вадря анокставкс. Тенень лездасть «Фармациянь» специалисттнэ. Саранскойсэ, «Биохимик» заводсонть, медучреждениятнень ды Мордовиянь университетэнть лезксэст вельде анокстазь ды нолдазь коронавирусонь лецямонь од препарат. Россиянь Минздравось совавтызе «Арепливирэнть» коронавирусонь лецямонть туртов официальной спискантень. «Азитромицин» антибиотикенть марто, конась истя жо нолдави «Биохимиксэ».
Региононь руководителесь макссь покш питне медицинань вейсэндявксонть ды властень органтнэнь вейсэнь важодемантень: «Минздравонтень савсь топавтомс аволь шожда тевть, конат сюлмавозь лецямонь учреждениятнень анокстамост, оборудованиянть, лекарстватнень, ванстомань средстватнень рамамост, медроботниктненень стимулирующей ярмактнень пандомаст, кадратнень анокстамост, врачонь специализированной бригадатнень пурнамост марто. Весе кевкстематне витевсть куроксто.
Тень истя жо тешкстызь пульмонологиянь коряс Россиянь содавикс специалисттнэ, конат сакшность республикантень консультациянь максомо. Московонь специалисттнэ мерсть, минек врачтнень ды медучреждениятнень важодемаст лади неень шкань вешематненень».
Владимир Волков ёвтась седеймарямонь валт весенень, кить ёмавтызь малавиксэст, мартост важодицятнень ды ялгаст: «Сынь алкуксонь геройть. Минек тевенек – ванстомс сынст лемест ды тевест, лездамс семияст туртов. Ды, нама, теемс весементь медицинань сеть важодицятнень ванстомга, кить течи поладыть те бороцямонть».
Те чистэнть покш казнеть максозь здравоохранениянь, санитарно-эпидемической сэтьмечинь службань важодицятненень, специалисттнэнень ды волонтёртнэнень, кить бороцясть коронавирусонь инфекциянть каршо.