Июнень 8-це чистэ Мордовиянь прявтошсо, Саранскойсэ, учови футболонь кенярксчи. «Мордовия-Арена» стадионсо Европань футболонь чемпионатонь кочкамонь турнирсэнть вастовить Россиянь ды Сан-Маринонь сборной командатне. Россиянь сборноенть туртов те васенце налксема эсь стадионсо.
Карадо-каршо налксеме неть командатне понгсть жеребеень коряс. Сан-Маринось – Италиянть куншкасо вишкине башка мастор. ФИФА-нь рейтингсэнть командась саи ансяк 211-це тарка. Седе икеле Италиянь флагонть кис командась эзь налксекшне. Россиянь футболонь вечкицятненень Сан-Маринонь командась ледстневи сеньсэ, кода ламоксть каршо командатне пельнекшнизь ортаст.
Истя, Германиянь сборноенть марто налксемстэ оскась ортатненень совавтозель 13-ксть, Германиянсетненень вейкеяк гол эзть чавокшно. 10:0 счёт марто Сан-Маринонь команданть изнякшнызь Норвегиянь футболисттнэ. Россиянь сборноенть марто Сан-Маринось налксекшнесь 1996 иестэ. Сестэ минек налксицятне изнякшнызь сынст 7:0 счёт марто. Се шкастонть саезь ламось полавтовсь. Полавтневсь а весть командатнень составоськак. Стадиононь кассатнесэ седе ламо билеттнэ уш миезь. Кинь ули мелезэ кенеремс, билеттнэ эштё улить. Кодамо карми налксемась, невтьсы вастовомась зярыя чинь ютазь.
Николай Евдокимов