Пятница, марта 29, 2024
Важное

Кундамс те материалонть сёрмадомо кармавтымим «Тюштя» вейсэндявксонь прявтось П. В. Мигунов. Содазь, Павел Валерьевич ламо иень перть топавты тев, кона сюлмавозь спортонть марто. Сон весе виензэ путы сень туртов, кода бу одс велявтомс ды эрямос совавтомс сеть койтнень, кодат ульнесть седикеле финнэнь-угрань раськетнень эрямосо од ломантнень шумбракс ды виевекс кастомань коряс.

Мигунов тень теи аволь ансяк Мордовиясо. Маряви, Россиянть келес арась истямо тарка, косо а эрить эрзят ды мокшот, ды тов аволь пачколе те ломанесь. Бути ансяк арасель васоло омбо мастортнэсэ. Саемга, Австралиясо, косо, маринек, истя жо эрить эрзят ды эйстэст аволь аламо. Ламо таркава яказь, од ломантнень марто вастневезь, Павел Валерьевич редизе, кода аламо минь, сехте пек од ломантне, содатано эсенек раськень ине ломантнеде, кить покш путовкс тейсть спортонть кемекстамосо. Теньсэ чумондынзе журналисттнэньгак сень кис, мекс аламо ёвтнетяно сеть содавикс ломантнеде, кить лиссть эрзянь раськестэ.

Эряви видькстамс, Мигуновонь чумондоматне ламосо видеть. Алкукскак, аламо сёрмадтано минек раськестэ лисезь спортсментнэде. Секс, паряк, ловныцятнеяк аламо мезе содыть сындест. Саемс Вячеслав Барашкинэнь. А содан, ламо-аволь ломанть муевить эрзятнень ютксто, кить марсизь те лементь ды аштить мельспаросо минек раськестэ лисезь те ломаненть кувалма? А вана зярыя иеде икеле Вячеслав Барашкинэнь лемесь гайгсь весе Россиянть келес.  Весемеде пек содылизь ды нейгак содасызь Пензань ёнкссо, косо чачсь спортсменэсь, косо весе виензэ путызе минек масторсо спортонь кемекстамонтень. Сонзэ ушодксонзо коряс Пензасо кармасть панжовомо дзюдонь коряс секцият, ков, цёрынетнеде башка, кармасть сакшномо тейтернетькак. Истя теезельть васенце эскелькстнэ тейтерь-аватнень ютксо дзюдонь спортонтень.

Арсян, истят ломантнеде эряви седе сеедьстэ ды апак лотксе сёрмадомс ды ёвтнемс минек газетатнесэ.

 

Вячеслав Барашкин –

СССР-нь спортонь мастер

Вячеслав Васильевич Барашкин чачсь 1957 иень панжиковонь (маень) 19-це чистэ. Школанть прядомадо мейле тонавтнеманзо поладызе Пензань приборостроительной техникумсо. Тусь армияв. Служась Москов ошсо Дзержинский лемсэ дивизиясо. Парсте служамонть кис сонензэ максозель «Отличник боевой и политической подготовки» лемесь ды кучозель делегатокс ВЛКСМ-нь ЦК-нь промксов, кона ютась Москов ошонь Кремлянь Дворецсэ.

Вячеслав Барашкинэнь весе эрямозо сюлмавозь спортонть марто. Весемеде покш мель явсь самбонь, дзюдонь коряс пелькстамотненень. Армиясо дзюдонь коряс Весероссиянь XIX турнирсэ, кона ютась Московсо, сон лиссь самбонь ды дзюдонь коряс изницякс.

Армиядо мейле аволь весть тердтнесть эйсэнзэ СССР-нь КГБ-нь высшей школав. Вячеслав мель сайсь молемс тонавтнеме В.Г. Белинский лемсэ Пензань государственной педагогической институтов, косо тонавтнемадо башка ламо шка явсь вечкевикс тевентень – спортонтень. Курок кармась СССР-нь спортонь мастерэкс. Институтонть прядомадо мейле кармась тренерэкс-тонавтыцякс «Богатырь» од ломанень спортивной клубсо, Пенза ошсо васенцекс кундась авань дзюдонть виевгавтомантень. Сонзэ кедьсэ тонавтницятне секе-тев лиснесть изницякс масторлангонь пелькстамотнесэ, сынст совавтсть дзюдонь коряс СССР-нь вейсэнь командас. Вейкесь эйстэст, Надежда Грязнова, дзюдонь коряс СССР-нь чемпионатсо сайсь колмоце тарка. Теде башка, тейтересь варчнесь виензэ каратесэ ды лиснесь изницякс масторлангонь чемпионатсо.

Вячеслав Васильевич Барашкин тейсь покштояк покш путовкс Пензань ёнкссо дзюдонть кемекстамонтень. Сон ульнесь судьякс бороцямонь коряс Советской Союзонь, Россиянь первенстватнесэ.

 Пазялго велесэ чачозь-кастозь маралят

Те – нурькинестэ. Варштындерятано Вячеслав Барашкинэнь эрямонзо потс седе домкасто, карматано содамо: сонзэ кудораськесь эрямопингензэ ушодызе эрзянь велесэ. Те – Пазялго велесь, кона ашти Бессоновской буесэ. Те велесь содавикс аволь ансяк Пензань ёнкссо, парсте содасызь Мордовиясояк. Тосо эрить мазый чачо, валдо ойме, панжадо седей ды виев обуця марто ломанть. Виев обуцядост корты ламось. Васняяк, се: ламо пингень перть ве ёно эрязь, сынь эзизь ёмавто эрзянь оймест. Васолга срадозь эрзянь велетнесэ аламо косо ванстовсть раськень койтне. Те велесэнтькак ламо мезесь ёмавтозель. Тосонь эрицятне шкастонзо «сыргозсть» ды кармасть одс вельмевтеме кезэрень койтнень. Текень кис эрьва иестэ кармасть ютавтнеме покш ила, конань лемдизь «Покш Эрзянь чикс». Ды эрьва иестэ тов сакшныть ломанть аволь ансяк эсест ды шабра велетнестэ ды Пензань ёнксонь буестэ, но лия регионтнэстэяк.

Виевекс, ламос бажицякс ды стакачиде а пелицякс кассть Василий Степанович ды Пелагея Филипповна Барашкинтнэнь колмонест Николай, Вячеслав ды Игорь цёрасткак.  Сынст вишка пингест ютась чачома велесэ. Кода весе эйкакштне, вечксть чийнеме, сокссо кирякстнеме, налксеме ды, нама, эзть орголе физкультурань уроктнедеяк. Те весе седеяк кемекстынзе обуцяст. Истя лиссь, сыненст савсь туемс Пазялго велестэ лия таркав. Шкань ютазь кармасть эрямо Пенза ошсо. Школасо тонавтнемстэ лелят-ялакст покш мель кармасть явомо спортонь истят пелькстнэнень, кода самбось ды дзюдось. Эряви меремс, Пензань ёнкссо бороцямонь коряс школа панжозель 50 ламо иеде теде икеле, кона те шканть перть анокстась 60 ламо спортонь мастерт, СССР-нь, Россиянь чемпионт ды масторлангонь кубоконь кис изницят.

1976 иестэ панжозель эйкакшонь «Дзюдо» вейсэндявксось, ков кармасть сакшномо эйкакшт 6 иестэ саезь 18 иес. Ды аволь ансяк цёрынеть, ламот ютксост ульнесть тейтернетькак. Ламотне тонавтнесть Вячеслав Васильевич Барашкинэнь кедьсэ. Эйстэст пурнавкшность 100 ды ламо тейтерькат. Сынст ютксто ламот мейле теевсть покш спортсменкакс, кода, сайсынек, Россиянь чемпионкась Надежда Грязнова, дзюдонь коряс масторонь сборноев совицясь Алевтина Григорьева ды лият.

Вячеслав Васильевич Барашкин эрясь аволь кувать. Эрямозо сезевсь, зярдо тензэ топодсть ансяк 39 иеть. Калмазь чачома велесэ, тетянзо-аванзо вакссо. 

 

Вячеслав Барашкинэнь лемензэ ледстнемга

Нурька эрямонзо лангс апак вано, Вячеслав Барашкин тейсь покштояк покш путовкс Пензань ёнкссо дзюдонть кемекстамонтень.

Пензасо ней эрьва иестэ (1991 иестэ саезь) ютавтневи дзюдонь коряс Весероссиянь турнир, кона алтазь Вячеслав Барашкинэнь лемензэ ледстнемга. Сонзэ ютавтыцятнестэ вейкесь – Вячеслав Барашкинэнь лелязо Николай Васильевич Барашкин. Те ломанесь – Пензань ёнксонь Дзюдонь федерациянь президент, Россиянь боевой искусствань заслуженной наставник, народной просвещениянь отличник, пародояк паро тонавтыця.

Неть пелькстамотнесэ эсест виест варчнеме сакшныть дзюдоистт Россиянь эрьва ёндо. Сындест пурнавкшныть 300 ды седеяк ламо. Сакшныть ламо спортсмент Мордовиястояк. Сынст ютксо од ломанть, кить яксить виень таштамо «Тюштя» клубов, косо прявтокс П. Мигунов. Пелькстамотнеде башка Павел Валерьевич мукшны шка невтнемс мастер-класст эрзянь-мокшонь раськень пелькстамотнень коряс. Тень пингстэ зярдояк а стувтни ледстнемс сеть спортсментнэнь лемест, кить лиссть минек раськестэ ды кадсть неявикс тешкс эсест мельга. Ютксост Вячеслав Барашкингак, кинь лемезэ кеместэ совась Россиянь содавикс спортсментнэнь юткс.

В. Барашкинэнь лемензэ ледстнемга пелькстамотне ютавтневить якшамковсто. Кемтяно, сынст ютавтомантень мезеськак а карми улеме пирявксокс.

Раиса Щанкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».