Аволь умок Ярославль ошсо ютавтозельть ветерантнэнь ютксо шожда атлетикань коряс Россиянь Кубоконть кисэ пелькстамотне. Эйсэст Мордовиянть пельде ульнесть Покш Березникень эрицясь Пётр Семёнович Прокин, Саранскоень эрицятне Татьяна Ныркова ды Елена Забродина. Сеске мертяно, сынь пелькстасть виевстэ, састь сырнень медаль марто.
Пелькстамотне ютавтозельть «Шинник» стадионсо ды эйсэст эсест ёрокчист невтизь Россиянь 47 регионсто спортсмент.
– Мон пелькстынь 5 вайгельбень чиемасонть, – ёвтни ветеранось Пётр Прокин. – Тень савсь чиемс 12,5 кругт. Эрьванть кувалмозо – 400 метрат. Ды невтинь сехте вадря шка – 21 минута 21 секунда. Ныркова чийсь 400 ды 600 метрат. Елена Забродина – 100 ды 200 метрат. Пелькстасть виевстэ. Мордовияв велявтынек вете сырнень медаль марто.
Маныть Пётр Прокин кармась изницякс ветерантнэнь ютксо шожда атлетикань коряс панжадо чемпионатсо. Пелькстамотне ютасть Санкт-Петербургсо. Сынь ютавтовить уш колоньгеменде ламо иень перть. Вейс пурнавить эрьва кодамо регионсто, ошсто, мик омбо масторстояк ветерант. Санкт-Петербургонь чемпионатось алтазель Ленинградонь блокадань каямонь 74 иетненень. 1500 метратнень чиемасо Пётр Прокин сехте виевель.
Иетнень лангс апак вано, спортонь ветеранось тевсэ. Сонзэ ушодксонзо коряс Покш Березниксэ теезель эйкакшонь-юношеской спортивной школа (ДЮСШ). Те школась эйкакштненень кенкшензэ панжинзе 2011 иестэ. Школасонть эсь спортонь ёрокчист эрьва кодамо видэнь коряс кастыть-кемекстыть малав колмосядт эйкакшт.
– Тедеде кувать витнемадо мейле эрицятнень туртов эсь кенкшензэ панжинзе Покш Березник велень Культурань кудось, – ёвтни П.С.Прокин. – Эйсэнзэ спортивной зал явозь минек туртовгак. Сон валдо, покш. Эйсэнзэ неень шкань спортивной тренажёрт-мезть.
Тешкстасынек, ДЮСШ-нть секциянзо важодить райононь велетневаяк. Вана Шугурова велесэ эйкакштне покш мельсэ сакшныть волейболсо налксемань секцияв, конань вети физкультурань тонавтыцясь Николай Манин. Рузонь Найман велесэ эрямос кеместэ совасть футболсо ды волейболсо налксематне, столь лангсо теннисэсь, Починкасо – шожда атлетикась ды сокссо чийнематне. Марьяновкасо эйкакштне вечксызь волейболсо налксеманть. Покш Березник велень эйкакштне парсте налксить шахматсо. Теньсэ, нама, покш таликазо 1 № средней школань директоронть И.А.Кулагинэнь. Шахматсо налксемань секциянть вети малав эрьва чистэ. Тень кувалма Покш Березникень шахматисттнэ – республикань эрьва кодамо пелькстамонь изницят.
Покш Березник велень 2 № средней школасо эйкакштне покш мельсэ якить сокссо чийнемань ды шожда атлетикань секциятнес.
– Меельце иетнестэ райононь школатнесэ покш мель кармасть явомо физкультурантень ды спортонтень, – ёвтни спортонь ветеранось П.С.Прокин. – Те, нама, пек вечкеви шумбра эрямо коень ветицятненень. Минь весементь тейтяно, кода седе ламо од ломанть ояксчисэ эрявольть спортонть ды физкультуранть марто.
Сонсь Пётр Семёнович Прокин физкультурантень ды спортонтень покш мель кармась явомо 1956 иестэ, зярдо тонавтнесь Низовкань сисем иень школасо, кона Отяжелень районсо. Сон ёрокчинзэ невтизе икелень Козловкань райононть кисэ пелькстамосонть ды лиссь изницякс.
П.С.Прокин чачсь 1946 иестэ Отяжелень райононь Вере Чукало эрзянь велесэ.
– 8-10 класстнэсэ тонавтнинь Ламбаське велень средней школасо, – ледстни Пётр Семёнович. – Тесэ карминь чийнеме, вечкеме сокстнэнь. Тенень монь тердсь физкультурань тонавтыцясь Михаил Васильевич Сироткин. 9-це классо тонавтнемстэ ульнинь чийнемань ды сокссо кирякстнемань коряс Отяжелень райононь чемпионокс.
Пётр Семёнович Прокин Ламбаське велень средней школанть прядомадо мейле сась тонавтнеме Саранскоев. Документэнзэ максынзе Ламповой заводонть юрсо важодиця технической училищав. Училищанть прядызе парсте.
– Тетям, Семён Алексеевич, чачсь 1917 иестэ. Сон ульнесь Ине Отечественной войнань участникекс. Эсь шкасто прядызе Козловкань педучилищанть, – ледстни Пётр Семёнович. – Тень мерекшнесь: «Поладык тонавтнеманть Мордовской пединститутсо».
П.С.Прокин арсезевсь: «Мекс эсь вийтнень а варчамс?» Ды мольсь тонавтнеме педагогической институтов. Кочкизе химиянь-биологиянь факультетэнть. Те ульнесь 1964 иестэ. Пётр Прокин ёмсиль аволь ансяк пединститутонь библиотекасо, истя жо спортивной залсояк. Пек вечкилизе шожда атлетиканть. Тенень сонзэ тонавтсь А.В.Коровин. Од цёрась малав кавто иес таштась чийнемань коряс вадря результатт. Мордовиянь первенствасонть саизе 1-це тарканть 10 вайгельбетнень чиемстэ ды 2-це тарканть – 5 вайгельбетнень чиемстэ.
Сонзэ невтевкстнэнь рединзе 50 вайгельбес спортонь якамонь коряс Олимпиадань сиянь призёрось Е.И.Маскинсков. Сон Пётр Семёнович Прокинэнь совавтызе Мордовиянь сборной командас. Ды ушодовсть Россиянь пелькстамотнес анокстамотне. Ардтнесь Кисловодскоев. Тосо ульнесь котоцекс. Мордовиянть ды Россиянть спортонь честензэ идесь эрьва кодат пелькстамотнесэ. Пётр Прокин спортонь ёрокчинзэ невтизе Весесоюзонь студентэнь пелькстамотнесэ, конат ютавтозельть Московсо. Тесэ сон сехте эрязасто чиинзе 20 вайгельбетнень.
– 1968 иестэ виевстэ анокстынь Олимпийской налксематнес, совавтозелинь Олимпийской сборной командас кандидатокс, – ёвтни Пётр Семёнович. – Ормалгадынь ды командас эзинь понго. Тень кувалма пек эзинь мелявто.
П.С.Прокинэнь эрямонзо перть уцяскась ков ансяк эзизе пачтне, спортонть ды физической воспитаниянть эзизе кадно. Чийнесь ды чийни.
М.Е.Евсевьев лемсэ пединститутонть прядомадо мейле П.С.Прокин сы важодеме Покш Березникень районов. Сестэнь РОНО-нь прявтось Н.И.Кеняйкин Пётр Семёновичень кучизе важодеме Рузонь Найман велень средней школав.
– Апак учне сась тень сёрма райононь военкоматсто, – ледстни Пётр Семёнович. – Тердить служамо Советской Армияв. Тосояк невтия эсень ёрокчинть. Свал участвовинь спортивной пелькстамотнесэ. Ульнинь полконь, дивизиянь Дальневосточной округонь чемпионокс.
П.С.Прокинэнь валонзо коряс, сонзэ пек кадсть служамо седе товгак. Алтасть тензэ «сырнень пандт». Арась, од цёрась велявтсь тиринь ёнксов. Важодеманзо поладызе Рузонь Найман велесэ.
Пётр Семёнович Прокин косо ансяк эзь важоде! Ульнесь КПСС-нь райкомонь инструкторокс, Покш Березникень 2 № средней школань директорокс, завучокс… Спортонть марто свал эри ояксчисэ!
2016 иестэ П.С.Прокин участвовась Россиянь чемпионатсонть, кона ютавтозель Московсо ЦСКА-нь физкультурань-шумбрачинь витемань комплекссэнть. Тесэ Пётр Семёнович весементь тейсь, штобу невтемс вадря результатт. 3 вайгельбетнень чиинзе весемеде эрязасто ды лиссь изницякс. Омбоцекс ульнесь 800 метратнень чиемстэ.
2017 иестэ Прокин лиссь Россиянь чемпионокс. Сон весемеде вадря результат невтсь 10 вайгельбетнень чиемстэ. 800 метратнень чиемстэ сайсь «сия», 5 вайгельбетнень – «бронза».
Спортсменэнть валонзо коряс, маныть Пензасо ютавтозель ветерантнэнь ютксо Россиянь чемпионатось, ков сакшность Россиянь 62 регионтнэстэ. Тосо эсь ёрокчист невтизь минек республикань «Мордва» спортклубонь спортсментнэ. Ютксост – Пётр Семёновичкак. Истя, сон саизе 1-це тарканть 800 метратнень чиемстэ, 1500 метратнень – «бронзанть». Неть изнявкстнэнь экшсэ, нама, спортсменэнть виевдеяк виев анокстамось, эрьва чинь тренировкатне.
– Эрьва кодамо пелькстамотнес молемс косто ярмакт сайнетядо, кить спонсоронк? – кевкстинек спортонь ветеранонть П.С.Прокинэнь.
– Республикань томбале пелькстамотнес пачкодемс тень лездыть райононь Администрациянь прявтось Иван Иванович Игонов, Мордовиянь Госсобраниянь депутатось Виктор Александрович Кипаев, «Агрофирма «Кировская» велень хозяйствань предприятиянь прявтось Михаил Владимирович Струёнков. Ялатеке седе пек кеман ансяк эсень лангс, эсень пенсиянть лангс, – каршо валсо мерсь Пётр Семёнович.
… Рана валске Покш Березникень эрицятне эштё удыть. Ансяк Пётр Семёнович Прокин пильге лангсо. Сон топавты валскень чиеманть.
Пётр ЗИНОВЬЕВ.
Покш Березникень район