Саранскоень Эень дворецсэ ютавтовсть конькасо синхронной кирякстнемань коряс Россиянь Чемпионатось ды Первенствась. Тесэ пелькстасть 22 командат – 500 участникть Россиянь кемгавтово регионсто. Пелькстамотнень итогтнень коряс пурнавить кавто виев командат 2021 иень Масторлангонь чемпионатонтень.
Спортонь покш мероприятиянть панжомсто инжетненень ды участниктненень пшкадсть Мордовиянь Прявтонь тевтнень топавтыцясь Артём Здунов ды Россиянь Фигурной кирякстнемань коряс федерациянь президентэсь Александр Горшков.
Александр Георгиевич ёвтась сюкпря республикань руководствантень лембе вастоманть, фигурной кирякстнемантень лездамонть кисэ. Тешкстызе, Мордовиясо пек вадрясто анокставить спортонь весе мероприятиятне, истя жо раськеютконсетне.
Журналисттнэнь кевкстемаст лангс, мекс неть пелькстамотне омбоцеде ютавтовить Саранскойсэ, Артём Здунов мерсь: «Омбоцеде ды седе товгак Саранскоесь карми вастомо фигуристтнэнь покш мель марто!» Теде башка, сон тешкстызе, регионсонть улить площадкат, конат вешематнень коряс ладить Россиянь ды раськеютконь пелькстамотнень ютавтомс. «Мазый мероприятиятне свал мельс тукшныть, конькасо фигурной ды синхронной кирякстнеманть лован спортонь телень видтнэстэ сехте мазыекс!» – мерсь Артём Здунов.
Конькасо синхронной кирякстнемань коряс Россиянь Чемпионатонь ды Первенствань изницятнень каземань церемониясь ютавтовсь якшамковонь 28-це чистэ.
Изницятненень поздоровт ёвтасть Мордовиянь Прявтонь тевтнень топавтыцясь Артём Здунов ды Россиянь Фигурной кирякстнемань коряс федерациянь президентэсь Александр Горшков.
Спортонь мастерэкс кандидаттнэнь разрядсонть Россиянь Первенствасонть 1-це тарканть саизе «Юность» командась (Свердловской область), 2-це – «Кристалл Айс Джуниор» (Москов ош), 3-це – «Санрайз-1» командась (Санкт-Петербург ош).
Конькасо синхронной кирякстнемань коряс Россиянь Чемпионатонь изницякс кармасть: 1-це таркасонть – Санкт-Петербургсто «Парадиз» командась, 2-це таркасонть – Московсто «Кристалл Айс», 3-це таркасонть –Татарстан Республикасто «Татарстан» командась.
Весе изницятненень казевсть медальть ды дипломт, истя жо чевте налкшке-ривезьке – Саранскоень тешксэсь. Ды, нама, мельстуиця, мазый фотографият Мордовиянь прявт ошонь эенть лангсо.