Апрелень 19-це чистэ Самарань областень Народтнэнь ояксчинь кудосо ютась «От народных игр – к олимпийским победам» кругловой столь ды алтазель СССР-нь заслуженной тренерэнть, спортонь мастерэнть, минек земляконть Михаил Андреевич Аношкинэнь лемензэ ледстнемга.
Кругловой столень участникекс ульнесть заслуженной тренерэнть воспитанникензэ, малавиксэнзэ. Сынст ютксо – Самара ошонь почётной эрицясь Ростислав Ерастович Хугаев, «Тюштя» финнэнь-угрань бороцямотнень вельмевтемань клубонь прявтось Павел Валерьевич Мигунов, Самарань областень Самбонь федерациянь вице-президентэсь Александр Петрович Коновалов ды лият. Эсь мелест-арсемаст, ледстнемаст Михаил Андреевичте ёвтызь СССР-нь самбонь спортонь мастерэсь Николай Фёдорович Петров, самбонь коряс тренерэсь Валерий Николаевич Горшенин, Пензасто дзюдонь коряс тренерэсь Николай Васильевич Барашкин ды весе сеть, кить содылизь Михаил Андреевичень.