Саранскойсэ ветецеде ютась «Штурм-13» военизированной кроссось. Патриотической мероприятиясь алтазель Россиянь ДОСААФ-нь теемань 94 иетненень.
Якшамонть лангс апак вано, военной кенярксчинтень пурнавкшность участникть республикань келес.
«Штурм-13» военизированной кроссось ютавтовсь высшей ды средней профессиональной учебной заведениятнень, Мордовия Республикасо уликс Оборонань министерствань организациятнень ды войсковой часттнень комсь командатнень ютксо.
Региононь военной комиссарось Игорь Тихомиров панжинзе пелькстамотнень ды арсесь участниктненень изнявкст.
Пелькстамотнень участниктне ды инжетне ванызь неень шкань вооружениянть, военнослужащейтнень экипировканть, невтизь содамочист военно-патриотической викторинатнесэ, чийнемасо, пневматической винтовкасо леднемасо, ютызь препятствиянь полосанть ды ярсасть солдатонь алкуксонь кашадо.
Военизированной кроссонь изницятне казевсть грамотасо ды питней казнесэ.
Фототне Эдуард Ретунскиень