Неть читнестэ «Мордовия Арена» стадиононь конференциянь залсо ютавтовсь вастовома. Сон алтазель ВМХ-велоспортонь коряс Россиянь Чемпионатонь ды Первенствань ютавтомантень, конась карми минек республикасо июлень 25-27-це читнестэ. Пелькстамотне ушодовить масторсонть вейкине «Суперкросс» олимпийской уровнянь 8 метрань сэрьсэ трассасонть, конась регионсонть панжозель ютазь иестэ. Пелькстамонь участникекс яволявтозь РФ-нь 16 субъекттнэстэ малав 120 ардтницят.

 Пресс-конференциясонть ульнесть МР-нь спортонь министрась Никита Ларьков, ВМХ-нь гонкатнень коряс Россиянь сборной командань прявт тренерэсь Павел Костюков, МР-нь Велоспортонь коряс СШОР-нь прявтось Виталий Бояров ды раськеютконь классонь спортонь мастерэсь, ВМХ-рейсэнь велоспортонь коряс Мордовиянь сборной командань членэсь Наталья Суворова ды минек региононь велосипедсэ ардтницятне.

Эсензэ кортамосонзо Никита Николаевич тешкстась, сыця шкастонть эйсэнек учи покш мероприятия, конась вейсэндясынзе масторонь велоспортонь коряс виев спортсментнэнь.

– Сюкпря ёвтан РФ-нь спортонь Министерствантень ды Велоспортонь федерациянтень, те Чемпионатонть минек республикасо ютавтоманть кис. Содадо, тень кувалма Мордовиясь ашти покш каштанчисэ. Тешкстаса, минек региононь велоспортонь школась масторлангсонть ловови виевтнестэ вейкекс, – кортась Никита Ларьков.

Седе тов кортамонть поладызе Павел   Костюков. Сон ёвтась сюкпрянь валт МР-нь Прявтонтень  Артём Здуновнень те спортонтень лездамонть кис. Истя жо тешкстась, Мордовиясь ловови  велосипедной спортонть тиринь масторокс. Эдь самай Саранскойсэ весемесь ушодовськак. Меельцекс  спортсменэнть туртов ёвтась мелень кепедиця валт ды лембе поздоровт сыця Чемпионатонть марто.

Виталий Бояров тешкстась, тедедень Чемпионатось карми ютавтовмо пек келейстэ, анокстазь покш программа, тердезь ламо спортсмент ды инжеть.

 – Эряви меремс,  минек спортсментнэ анокт, иень перть сынь пурнасть ламо вийть ды ёрокчи. Арсян, инжетненень ули мезень кис мелявтомс, – мизолдозь кортась Виталий Васильевич.

Алёна Артемьева