Ютазь недлястонть Мордовиянь Прявтонь тевтнень топавтыцясь Артём Здунов якась Краснослободской ёнксов. Важодемань программанть ушодызе «Новокарьгинский» СХПК-стонть.
Тесэ важодить 100 ламо ломанть. Сон ваннызе ракшань ферманть, кортась важодицятнень марто ды кевкстнизе предприятиянь руководителенть Дмитрий Харитоновонь тундонь-паксянь тевтнень ютавтомадо.
Седе тов Артём Здунов теевсь содавиксэкс Краснослободскоень промышленной предприятиятнень марто. «Краснослободский радиозавод» ОАО-сь панжозь эштё 1979 иестэ кода радиоприёмникень ды магнитолань нолдыця. Ней тесэ нолдыть лия продукция, истя жо лембень счетчикть, пси ды кельме ведень счетчикть. Компаниянь представителесь толковизе, продукциясь микшневи республиканть томбале.
«Эсенек рынканть лангскак эряви нежедемс», – мерсь Артём Здунов.
Заводось истя жо нолды продукция автопромонть туртов, гардинань крючокт, пластмассань цецят. Предприятиясонть важодить 135 ломанть.
Омбоце предприятиясь – «Завод ПромМетИзделий» ООО-сь. Тевтеемань прявт ёнксось – строямонь кшнинь конструкциятнень нолдамось, истя жо кшнинь шкафт, стеллажт ды мебель.
А.А.Здунов кортась заводонь прявттнэнь марто предприятиянть загрузкадо ды продукциянь од видтнэнь нолдамодо.
Бобылёвские Выселки велесэнть Артём Здунов ваннызе спортонь комплексэнь строямонть. Те республикасонть спортонь вейкине объект, косо вейке латонть ало карми эень арена, эйкакштнень ды покштнень туртов бассейнат, тренажеронь ды фитнес-залт. Спортонь ламо функциянь сооружениясь стявтови зярыя районтнэнь туртов.
Спорткомплексэсь строяви «Комплексное развитие сельских территорий на 2020-2025 годы» Федеральной программанть лувсо. Спортонь сооружениядонть башка, проектэнтень совавтозь 134 модань участкас эрямо таркань строямонь туртов площадканть анокстамось.
Райононь прявтось Алексей Буйнов ёвтнесь, модань участкатнес ветязь ведь, газ, ванкшнови кевкстемась электричествань сеттнень коряс, тедеде прядови кинь теемась. Объектэнть арсеви максомс тедеде.
МР-нь Прявтонь тевтнень топавтыцясь истя жо якась велень хозяйствань кавто предприятиятнес: «Куликово» СХПК-в ды «Мокша» агропромышленной вейсэндявксонтень.
«Куликово» СХПК-сонть Артём Здунов ваннызе ракшань комплексэнть. 2020 иестэ предприятиясонть потявтозь 4 тёжат тоннат ловсо, эрьва скалось макссь 7 тёжат килот. Республикань Прявтонь тевтнень топавтыцянтень ёвтнесть, «Комплексное развитие сельских территорий» программанть лувсо СХПК-сь строи важодицянзо туртов эрямо таркат. Артём Алексеевич ваннызе Кирдяшкинтнэнь семиянть туртов кудонть. Виктор ды Ольга кастыть вете эйкакшт, тетясь важоди механизаторокс, авась – скалонь потявтыцякс. Покш тейтерентень 12 иеть, сехте вишкинентень – 11 ков. Мордовиянь Прявтонь тевтнень топавтыцясь казсь покш семиянтень казне, кевкстнесь, кода сынь эрить, кортась колмо иесэ Костя марто. «Каст шумбракс, превеекс ды ульть лездыцякс тетять-авать туртов!» – мерсь А.А.Здунов.
«Мокша» АПО-сонть потявтыть ловсо, кастыть сюро ды тикше. Хозяйствасонть важодить 329 ломанть.
Краснослободской ёнкссо улемстэ региононь руководителесь макссь зярыя кармавтомат муниципалитетэнь прявтонтень. Артём Алексеевич яволявтсь: васняяк кастома муниципалитетэнь доходтнэнь. Маласо шкастонть райононь властненень эряви ютавтомс райононь инвентаризациянть: муемс чавосто аштиця модатнень ды кадозь зданиятнень азортнэнь, тешкстамс бюджетэнь доходонь прявт статьятнень.
«Тесэ улить мельстуиця таркат, теке жо Сивинесь. Тесэ икеле ульнесть эйкакшонь лагерть ды санаторият. Эряви тешкстамс, мезе карматано тееме седе тов: поладомо те ёнксонть эли вешнеме мезе-бути од. Важодезэ модань эрьва пелькскесь!» – тешкстызе Мордовиянь Прявтонь тевтнень топавтыцясь.
Краснослободской ёнксонь прявтось Алексей Буйнов мерсь, тевтне сонензэ чарькодевикст ды шкань апак ёмавтне кунды сынст топавтомо. Истя жо сон ёвтнесь сыця чадыведентень райононть анокстамодо.