Четверг, марта 28, 2024
Важное


Таштамковонь 17, 18, 19-це читнестэ масторонь келес ютавтозельть кочкамот. Минек республикань эрицятне колмо чинь перть макссть вайгелест РФ-нь Государственной Думас депутаттнэнь, Мордовия Республикань Прявтонть, МР-нь Госсобраниянь депутаттнэнь, Саранск ошонь округонь советэнь депутаттнэнь ды местной самоуправлениянь органонь депутаттнэнь кисэ.

Россиянь келес од лувсо, колмо чинь перть вайгелень максомась теезель васенцеде. Тенень тувталось – коронавирусонь апаро ормадонть эрицятнень ванстомась, санитарно-эпидемиологиянь вешематнень ды общественной безопасностенть кирдемась.
Неть колмо читнестэ Мордовиянь келес панжозельть ды важодсть 774 кочкамонь участкат.

Минек республикань кочкамонь участкатнесэ ульнесть малав 4 тёжат ваныцят (наблюдательть). Сынст ульнесь праваст ваномс кочкамотнень, кочкицятнень вайгелест ловоманть ды кочкамонь комиссиятнень важодемаст мельга.
Текенень поладсынек, Мордовиясо теезь ды панжозь Общественной наблюдениянь центра, косо колмо чинь перть важодсть Мордовия Республикань Общественной палатас совицятне, политической партиянь представительтне ды киньгак эйстэ а аштиця ваныцятне.
Россиянь келес кочкамотнень видестэ ютавтоманть мельга ваномга ладязельть 100 000 камерат, Мордовиясо сындест ульнесь малав 1 тёжа. Кода мерсь МР-нь ЦИК-нь Председателесь Александр Косов, Саранскойсэ ды республикань муниципальной районтнэсэ онлайн-лувсо кочкамотнень мельга видеонаблюдениясь ветявсь 236 участкатнесэ, эштё 538 видеорегистраторт аравтозельть 538 участкатнесэ.

Мордовиянь кочкамонь весе участкатнесэ свалшкане ютавтовсть дезинфекциянь средства марто помещениятнень ванськавтомань тевть.
Мордовия Республикань Прявтонь тевтнень топавтыцясь Артём Здунов вайгелензэ максызе сентябрянь 19-це чистэ Саранск ошонь Советской куросо Государственной рузонь драмань театрань зданиясо, косо се шкане важодсь кочкамонь 547 номер комиссиясь.
Теке жо таркасонть вайгелест максызь Мордовия Республикань Государственной Собраниянь Председателесь Владимир Чибиркин, Саранск ошонь округонь прявтось Пётр Тултаев. Саранск ошонь 20 № гимназиясо гражданской долгонзо топавтызе МР-нь Правительствань Председателень тевтнень топавтыцясь Владимир Сидоров. Сон ульнесь тосо недлячистэ васенце сыцятнень ютксо.
Виде, Саранск ошонь кочкамонь комиссиятнестэ сехте ламотне ульнесть общеобразовательной школатнесэ. Невтемакс, Саранскоень башка предметэнь седе домкасто тонавтнемань 38 № школасонть теезельть кавто кочкамонь комиссият.

Зданияс совамсто минек вастымизь мельспаросо, онкстызь температуранок ды невтизь вайгелень максомань тарканть, конась ульнесь те зданиянь омбоце этажсонть. Тосояк тевтне ветявсть санитарно-эпидемиологиянь вешематнень топавтозь.
Весе сыцятнень паро ёжосо вастсь 640 номер кочкамонь участковой комиссиянь прявтось Алла Максимкина. Алла Анатольевна марто кортамсто, карминек содамо, сон те тевенть топавты аволь васенцеде, ютавты нилеце кочкамонь кампания, икелень иетнестэ ульнесь членэкс ды прявтонь тевень топавтыцякс.

– Минек важодеманок те иестэ седе пек шождалгавтызе КОИБ-тнень тевс нолдамось, те од лувось кочкамонь участкасонок тевс нолдавсь васенцеде, – мерсь Алла Анатольевна. – Кочкамотнеде икеле васняяк тонавтынек эйсэнзэ важодеме кочкамонь участковой комиссиянь члентнэнь, кить мейле макссть лезкс вайгелень максыцятненень. Сындест те участкасонть весемезэ ульнесть 2 782 кочкицят.
Алла Максимкина тешкстась, кочкицятнеде ламо кода од ломанть, истя сыретькак. Ламот сыть семиянек, покштне тонавтыть эйкакшост вайгелень максомо, сы шкань гражданской долгост топавтомо.
Школань зданиянь омбоце пелькссэнть ульнесь 624 номер кочкамонь участковой комиссиясь, конань прявтсо Елена Федотова. Сонзэ туртов кочкамонь ютавтомась юбилейной: топодсть вете иеть, кода сон топавты общественной те тевенть. Неть кочкамотнестэ лиякстоматнеде ды одонть эйстэ кортамсто, сон тешкстынзе бюллетентнень ламочист. Те иестэ эйстэдест мик сисем ды сынст комиссиянтень совить эрьва кодат партиятнень пельде важодицят.

Кочкамонь участкатнесэ кортазевинек вайгелень максыцятнень марто. Вейкесь юткстост – Наталья Гатилина. Сон мерсь:
– Мон вайгелем максыя эсень ды нуцькатнень вандынь чинть, республиканть, Саранск ошонть, вечкевикс Пролетарской райононть кисэ! Эдь седе, кодамо кочкамо эйстэнек эрьвась неень шкане теи, истя карматано эрямояк.

Тешкстасынек, Мордовия Республикань Центризбиркомонь икелепелень пачтямотнень коряс, МР-нь Прявтонь тевтнень топавтыцянть Артём Здуновонь кисэ («Единая Россия») вайгелест максызь 78,26 % кочкицятнестэ. Омбоце тарканть саизе Дмитрий Кузякин («Коммунистическая партия Российской Федерации»). Сонзэ – 11,48 % вайгельть.
Колмоце таркас лиссь Евгений Тюрин («Либерально-демократическая партия России») – 6,21 % вайгельть. Нилеце таркась Александр Лемкинэнь кедьсэ («Российская партия пенсионеров за социальную справедливость») – 2,64 % вайгельть.

РФ-нь Государственной Думас Мордовиянь вейкемандатонь кочкамонь округсонть тевтне аштить истя: Юлия Оглоблина («Единая Россия») – 57,44 %, Дмитрий Кузякин («Коммунистическая партия Российской Федерации») – 13,45%, Евгений Тюрин («Либерально-демократическая партия России») – 8,68 %, Тимур Гераськин («Справедливая Россия – Патриоты – За правду») – 6,30 %, Сергей Белов («Российская партия пенсионеров за социальную справедливость») – 4,10 %, Максим Зинин («Новые люди») – 3,99 %, Александр Топорков («Коммунистическая партия коммунисты России») – 3,41%.

РФ-нь Государственной Думас федеральной кочкамонь округонь коряс васенце тарканть саизе «Единая Россия» партиясь – 66,00% вайгельть, омбоце тарканть – «Коммунистическая партия Российской Федерации» – 12,99 %, колмоце тарканть – «Либерально-демократическая партия России» – 7,75 %, нилеце тарканть – «Справедливая Россия – Патриоты – За правду» – 4,30 %, ветеце тарканть – «Новые люди» партиясь – 2,99%.

Мордовия Республикань Государственной Собранияс депутатонь кочкамотнесэ партиянь спискатнень коряс васенце тарканть саизе «Единая Россия» – 67,21 %, омбоце тарканть – «Коммунистическая партия Российской Федерации» –14,19 %, колмоце тарканть – «Либерально-демократическая партия России» – 9,85 %, нилеце тарканть – «Справедливая Россия – Патриоты – За правду» – 6,77 %.

Валентина Юдина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».