Четверг, марта 28, 2024
Важное

Сентябрянь 8-12-це читнестэ Саранскойсэ ютась «Од профессионалт» Национальной Х-це чемпионатонь финалось. Тей пелькстамо сакшность профессиональной образовательной учреждениянь малав 280 студентт, конатненень 16-25 иеть.

Истя жо ульнесть юниорт, кить 16 иеде седе одт. Сынь пелькстасть 25 компетенциянь коряс. Мельгаст вансть 200 экспертт. Малав 700 од ломанть пелькстасть дистанционной лувсо.

Теде башка, тедеде Нацфиналонть лувсо ютась Евразийской чемпионатось. Пелькстамо сакшность омбо масторонь од ломантне, пелькстасть дистанционной лувсояк.

«Од профессионалт» чемпионатось панжовсь Советской площадьсэ. Тесэ ютась алкуксонь кенярксчи. Яволявтозельть 69 регионтнэ ды 14 мастортнэ, кить састь пелькстамо, сынь ютасть флаг марто. Панжомасонть ульнесть покш инжеть – ПФО-со Россиянь Президентэнь полномочной представителесь Игорь Комаров, Мордовиянь Прявтось Артём Здунов, Федерациянь Советэнь Наукань, образованиянь ды культурань коряс комитетэнь председателесь Лилия Гумерова, Навыкень ды профессиятнень кастомань-кепетемань агентствань генеральной директорось Роберт Уразов. Шумбракстнемань валт кучсть РФ-нь Федеральной Собраниянь Федерациянь Советэнь Председателесь Валентина Матвиенко, РФ-нь Правительствань Председателесь Михаил Мишустин ды РФ-нь Просвещениянь министрась Сергей Кравцов. 

– Эсест регионтнэсэ пелькстамодо мейле од специалисттнэ састь Саранскоев «Молодые профессионалы» Национальной чемпионатонь финалонтень. Тынк туртов те покш тев, конантень анокстамсто неень шкань условиятнесэ миненек савсь ламосо полавтомс важодеманть. Топавтынек тень, ды течи участниктнень ды Агентствань эксперттнэнь марто вейсэ ютатано минек масторонь технологической суверенитетэнтень, топавттано Президентэнть В. В. Путинэнь кармавтоманзо. Минь пшкадтяно анокстыцятненень: ускозь оборудованиясь кадовозо тонавтнемань заведениятнес, сон од, неень шкань, мельстуиця. Лезды СПО-нь организациятнень профессиональной ёрокчинь кастомантень, – кортась МР-нь Прявтось Артём Здунов.

Вал сайнесь Навыкень ды профессиятнень кастомань-кепетемань агентствань генеральной директорось, Стратегической инициативатнень агентствань (АСИ) «Кадровый потенциал» дивизиононь прявтось Роберт Уразов:

– Течи Мордовиясь, Равчирень федеральной округось ютавтыть лия ёнов а молиця, Х-це Национальной чемпионатонь финал. Те аволь шожда иестэнть миненек лездасть партнёртнэ – 56 компаниятне, ютксост ламотне – Россиянь производительть. Вейсэ минь лездатано масторонь экономикантень ды виевгавттано эсенек технологиятнень. Тедеде истя жо ютавттано раськеютконь первенства – Евразийской чемпионат, конантень састь пелькстыцят, экспертт ды делегатт кемнилее масторсто. Течи тейтяно вейсэнь важодемань сюлмот ды ули меленек: эрьва ие неть сюлмотне кадык ансяк кемекстыть ды виевгадыть.

Чемпионатонь омбоце чистэ Н.П. Огарёв лемсэ МГУ-со ютась деловой программа марто пленарной промкс. Видеосюлмавома вельде инжетненень пшкадсь РФ-нь Правительствань Председателень полавтыцясь Татьяна Голикова. Сон ёвтась сюкпря МР-нь Прявтонтень Артём Здуновнень профессиональной ёрокчинь движениянтень мелень явоманть кисэ.

Навыкень ды профессиятнень кастомань-кепетемань агентствань прявтось Роберт Уразов ёвтнесь, мейстэ ушодовсь движениясь ды кодат изнявкст саезь те шканть перть:

– Аволь весе кемсть: движениясь карми важодеме ды виевгадомо. Ламо ломантнень вельде, конат кемезевсть те мелентень-арсемантень, те лиссь. Ды ней апак кавтолдо мерян, лия мастортнэнь коряс минь машттано тееме седеяк вадрясто. Муинек эсенек, лия ёнов а молиця вариантт, кода важодемс профессиональной мастерстванть марто.

Теке шкастонть «Саранск Аренасо» ды «Мордовия Аренасо» мольсть пси пелькстамот. Ёвтнетяно зырыя ёнкстнэде. Од ломантне пелькстасть мобильной робототехникасо, промышленной робототехникасо, ламо квартирань кудонь эксплуатациясо ды обслуживаниясо, сваркасо, физической культурасо ды спортсо, велень хозяйствань машинатнень эксплуатациясо, кшинь панемасо, парикмахерэнь тевсэ ды ламо-ламо лиясо. Сынст мельга пштистэ вансть эксперттнэ.

– «Плотникень тев» ёнксонть коряс пелькстамо састь Томскоень, Архангельскоень, Московонь ёнкстнэстэ, Московсто, Татарстансто. Весе сынь региональной этапонь изницят. Минек покш масторонь сехте виев, превей ды машты кедь ломантне. Весемезэ плотникень тевсэнть пелькстыть кавксо ломанть. Колмо читнень перть сынь теить садпирень эземнеть ды столь. Маряви, мезе тесэ стакась, тееви. Ансяк заданиятне истят – эряви весе ловомс миллиметрань пес. Эрьва пелькстыцясь сонсь кочки эрявикс инструмент ды теемань технологиянть, – ёвтни Саранскоень строительной техникумонь столярной мастерскоень прявтось, тонавтыцясь (тесэ сонзэ лемдить наставник) Е. В. Максутов.

Дмитрий Чапурин чачсь Ицялсо. Сон тонавтни Саранскоень строительной техникумсо столярокс-плотникекс, 3-це курссо. Школасо тонавтнемстэ саезь тензэ пек вечкевсь чувтосто керсемась ды лаксемась, те тевенть сынь тейсть трудонь уроктнесэ. Секскак школанть прядомадо мейле мольсь тонавтнеме строительной техникумов.

– Истямо покш пелькстамосо мон васенцеде. Заданиятне лия ёнов а молицят. Эряви арсемс, ловомс, чарькодемс математикасо, муемс виде уголонть. Нама, эряви практика. Пелькстан од ломантнень марто, кить уш аволь васенцеде невтить пряст истямо покш тевсэ. Сеске редявить сынст ёрокчист. Колмо читнень перть эряви теемс тенек эзем, столень основания, щит. Мейле уш киньгак марто вейсэнь композиция – кавто эземть ды столь. «Од профессионалт» чемпионатось покш ды мельстуиця. Те тарка, косо эсь виест ды маштомачист невтить минек од ломантне, – корты Дмитрий.

Строительной техникумонь эштё вейке тонавтниця – Виталий Николаев – пелькстась «столяронь тев» компетенциянть коряс. Саранскоень автомеханической техникумонь тонавтницясь Роман Максимов пелькстась легковой автомобилень витнемасо. Кемлянь аграрной колледжень студентэсь Максим Муромцев ёрокчинзэ невтсь велень хозяйствань машинатнень эксплуатациянь коряс.

Дарья Дирвялите тонавтни Саранскоень политехнической техникумонь 4-це курссо. Тедеде тейтересь сайсь васенце тарка республикань этапсо. Тесэ сон пельксты «Парикмахерэнь искусства» ёнксонть коряс.

– Парикмахерэнь профессиясь неень шкане вешевикс, ламот сонзэ кочкить эрямонь тевекс. Вана монгак тонавтнян ды уш важодянгак. Вечкеви. Чемпионатось пек мельстуиця. Мартонок пелькстыть эрьва кодамо ёнксонь од ломанть. Заданиятне стакат, эрявить теемс зярыя причёскат, нарамс, артомс прячерть, максыть тенень шка. Мон зярыя ковонь перть анокстынь, арсян, весемесь изняви-топавтови, – пачтясь тейтересь.

Мезе парось, «Од профессионалт» чемпионатсонть весе читнень перть важодсть кеветее профориентационной зонат. Тей сакшность республикань 5-11-це классонь школань тонавтницятне. Малав часонь перть сынст туртов ютасть экскурсият. Ды кодат мельстуицят! Васня тонавтницятне ютасть профессиональной интересэнь муемань онлайн-диагностика, мейле – экскурсия, седе тов – эсь виень варчамот площадкатнесэ. Зяро кецнемат ды пейдемат ульнесть! Саемга, Сыре Шайговань средней общеобразовательной школань тонавтницятне ульнесть «Парикмахерэнь тев» – «Физической культура ды спорт» площадкатнесэ. Кой-кить ульнесть «Маляронь ды декоративной важодематнесэ», «Электромонтажсо», «Ветеринариясо», «Компьютерной налксемань 3D моделированиясо» ды лиясо.

«Од профессионалт» Национальной чемпионатонь финалонть ютавтызь Россиянь Минпросвещениясь, Навыкень ды профессиятнень кастомань-кепетемань агентствась ды Стратегической инициативатнень агентствась, МР-нь Правительствась.

         Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».