Те ледстневиця датантень алтавсь оргкомитетэнь покш промксось, конань Республикань Кудосо ветясь МР-нь Прявтось В.Д.Волков. Ледстясынек, Россиянь Президентэнть В.В.Путинэнь Указонзо коряс 2020 иесь яволявтозь Ледстнемань ды славань иекс.
– Минек васень тевенек – парсте ютавтомс Ине Изнямонь 75 иетнень топодемантень алтазь тевтнень, явомс мель эрьва ветеранонтень, ютавтомс истят мероприятият, конат кадовить весенень ледстневицякс, – мерсь В.Д.Волков. – Те аволь ансяк покш ответственность властень органтнэнь ёндо, истя жо эрьванть юткстонок. Те событиянтень алтазь тевтнень ютавтомат мелень путозь, седейшкава. Кортамось моли раськень кенярксчиде, масторонть ды республиканть туртов сехте эрявикс тевде. Тень ловозь, саемат мельс обществанть ёндо ёвтазь мельтнень-арсематнень, лездамс патриотической организациятненень, волонтёртнэнень, краеведтнэнень, поисковиктненень. Кунсоломат сынст мелест-арсемаст, те тевентень тердемс одтнэнь, весе сетнень, кинь ули мелезэ теемс путовкс.
Седе тов МР-нь Прявтось покш мель явсь велетнень ды оштнень те кенярксчинтень анокстамонтень, эрязасто сынст ванськавтомантень. Тенень мерсь тердемс республикань весе предприятиятнень ды организациятнень, башка предпринимательтнень ды вишка бизнесэнь ветицятнень. Ловонть соламодо мейле седе пштистэ кармавтсь ваномс а маштовикс китнень мельга.
Кода мерсь В.Д.Волков, васень таркас эряви аравтомс ветерантнэде мелявксонть, сындест республикасо 7400. Неть: войнань инвалидтнэ ды участниктне, тылэнь тружениктне, блокадасо улезтне, концлагерень аволь совершеннолетней узниктне, маштовозтнень доватне.
– Ризксэнтень, эрьва недлясто, эрьва чистэ сынст эйстэ кадовить яла седе аламо, – мерсь МР-нь Прявтось. – Правительствань социальной блоконтень, райононь ды поселениянь прявттнэнень содама эрьва ветеранонть мелявксонзо ды васняяк витемат сынст стакачист. Улезэ те ярмаконь лезксэнь эли надобиянь пачтямось, медицинань эли социальной обслуживаниясь, диспансеризациясь ды санаторно-курортной шумбрачинь витемась, льготань максомась, кудоютконь тевень топавтомась.
МР-нь Прявтось пачтясь, Мордовиясь масторсонть васенцекс топавтызе РФ-нь Президентэнть В.В.Путинэнь Указонзо коряс ветерантнэнень эрямо таркань явомань программанть. Республикань войнань весе участниктненень ды инвалидтнэнень, кинень эряви паролгавтомс эрямонь условияст, максозельть эрямо таркат. Весемезэ эйстэст 6,5 тёжат ломанть.
Россиянь Президентэнть кармавтоманзо (Указонзо) коряс тедеде весе ветерантнэнень ды те категориянтень вейсэндязтнэнень карми пандовомо 75 тёжат целковойть, тылэнь тружениктненень – 50 тёжат целковойть. Арсеви сынст максомс чадыковонь (апрелень) пенсиянть марто вейсэ. Неень шкане республикань весе районтнэсэ ютавтовить юбилейной медальсэ казематне, эйстэст 80 уш явозь.
МР-нь Прявтось башка мель явсь Ине Отечественной войнасо маштовозтненень алтазь кеврунготнень витнемантень.
– Те тевесь аволь ансяк государстванть, истя жо эрьва ломаненть, кие эри минек масторсо, – мерсь В.Д.Волков. – Арсян, минек ёнкссо чачозтне, Мордовиянь икелень эрицятне, кить ней сонзэ томбалеть, вейсэндявить тенек, ледстясызь тиринь ёнксост, косо калмазь покштяст-бабаст.
Седе тов кортамо ульнесь од ломантнеде, кить тердевить эрязасто важодеме те ине тевенть коряс. Седе, кода республикасонок юты анокстамось маень 9-це чинтень, пурнавозтненень пачтясь МР-нь Правительствань Председателень полавтыцясь Г.А.Лотванова.
МР-нь Прявтонь Администрациянь руководителень полавтыцясь Д.М.Борисов пачтясь «1941-1945 иетнень Ине Отечественной войнасо Изнямонь 75 иетненень» юбилейной медальтнень максомадо.
МР-нь военной комиссарось И.В.Тихомиров ёвтнесь Россиянь Миноборонань «Дорога памяти» проектэнть ды «Эшелон Победы» акциянть ютавтомадост.
МР-нь Госсобраниянь Председателесь, «Единая Россия» партиянь Мордовиянь региононь отделениянь Секретаресь В.В.Чибиркин пачтясь Ине Изнямонь чинтень партиянть ёндо анокстамодо.
Меельцекс МР-нь Прявтось оргкомитетэнтень кармавтсь те кенярксчинтень анокстамонть коряс важодемс эрьва чистэ, маласо шкасто организационной комитетэнь промкст ютавтомс республикань весе районтнэсэ.
Валентина ЮДИНА