Июнень 14-це чистэ Мордовия Республикань Кудосо ютавтовсь МР-нь Госсобраниянь 37-це сессиясь. Тов пурнавкшность МР-нь Прявтось Артём Здунов, региононь Правительствань члентнэ, властень исполнительной органонь ды местной самоуправлениянь органонь прявттнэ, силовой структурань ды лия ведомствань ответственной руководительтне.
Сессиянть панжизе ды ветясь МР-нь Госсобраниянь Председателесь Владимир Чибиркин. Чинь повесткасо ульнесть 14 кевкстемат.
Депутаттнэ кемекстызь истят законтнэнь, кода «Об исполнении республиканского бюджета РМ за 2023 год» ды «Об исполнении бюджета Территориального фонда обязательного медстрахования РМ за 2023 год».
Сынь совавтсть полавтомат сеть законопроекттнэс, конатнесэ кортави льготань категориянь граждантнэде, кинь ули праваст питневтеме саемс модань участкат. Истятнэнь юткс совавтовить ламо эйкакшонь триця семиятне.
Истя жо полавтомат теевсть кой-кона законтнэс, косо тешкстави республикасо гражданской ды муниципальной службань стажонть ловомась. Те лезды совавтомс стажс эсь олясо лезксэнь максомань задачатнень топавтомань шканть, конатне путозь РФ-нь ВС-нть эли национальной гвардиянь войскатнень лангс (контрактонь сёрмадстоманть лувсо). Те законось вансты СВО-нь участниктнень, конатне контрактонь кемекстамодо икеле арасельть государственной гражданской эли муниципальной службасо.
Мордовия Республикань Прявтось Артём Здунов сессиясонть яволявтызе МР-нь Правительствань Председателень Васенце полавтыцякс Наталья Таркаевань аравтоманть. Региононь Прявтось тешкстась, Наталья Александровна парсте важоди экономикань, ули-паронь комплексэнь, финансонь ды инвестициянь кевкстематнень коряс.
Седе тов МР-нь прокуроронть ушодксонзо коряс «Об обязательных требованиях нормативных правовых актов Республики Мордовия» республикань Законось теевсь ладицякс федеральной законодательствантень.
«Од полавтоматне лездыть шождалгавтомс предпринимательтнень лангс путозь административной сталмонть ды теемс седе паро условият бизнесэнть виевгавтомасо», – мерсь Сергей Лапин.
Депутаттнэ кемекстасть мировой судьят ды ванкшность лия кевкстематкак.
Валентина Юдина