МР-нь Госсобраниянь депутаттнэ пурнавкшность 6-це тердемань 26-це сессиязост. Тосо ульнесь МР-нь Прявтось В.Д.Волков. Сессиянть панжизе ды ветясь МР-нь Госсобраниянь Председателень полавтыцясь В.В.Алехин. Чинь повесткас совавтозельть вете кевкстемат, ванкшномадост икеле ледстязельть аволь умок республикасо кочкамотнень ютавтомаст. Вайгелень максомань вейкине чинь итогтнень ванкшномадо мейле ёвтазель МР-нь Госсобранияс В.В.Руженковонь кочкамодо кулясь. Сессиянть ушодовомсто сонензэ ёвтасть поздоровт ды макссть депутатонь удостоверения.
Чинь повесткань васенце кевкстемасонть «Мордовия Республикасо промышленной политикадонть» МР-нь законопроектэнтень полавтоматнень совавтомадо проекттэнть пачтясь МР-нь Правительствань Председателень полавтыцясь – МР-нь Промышленностень, наукань ды од технологиятнень министрась А.И.Седов.
Седе тов кортамось мольсь «Мордовия Республикасо эриця башка категориянь ломантненень социальной лезксэнь максомань мератнеде» МР-нь закононтень полавтоматнень совавтомадо кевкстемадонть. Те теманть чинь повесткас ливтизь сессиянь МР-нь Госсобраниянь 26 депутаттнэ, конат совить «Единая Россия» партиянь депутатонь фракциянтень. Сонзэ коряс толковамот васняяк тейсь те фракциянь прявтось В.В.Якуба. Сон пачтясь пурнавозтненень: РФ-нь Президентэнть В.В.Путинэнь Россиянь граждантнэнень пенсиянь законодательстванть полавтоманзо коряс пшкадемастонзо кармавтоматнень топавтомга, «Единая Россия» партиянь Генсоветэнь Президиумось региононь законодательствань органтнэсэ мерсь партиянь фракциятненень анокстамс ды совавтомс региононь парламентэнь законопроекттнэс социальной лезксэнь максомадо правань ванстомань региононь мератнень, кода нейгак, аватнень туртов 55 иень топодемадо мейле, цёратнень – 60.
МР-нь Госсобраниянь Социальной политикань комитетэнь прявтось Р.З.Аширов те закононтень полавтоматнень совавтоманть коряс кортамонть поладомга мерсь, тень вельде максови возможность пандомс региононь мератнень коряс социальной лезксэнть, конась кемекстазь пенсионертнэнень, трудонь, войнань ды военной службань ветерантнэнень, тейтерь-аватненень, кинень 55, ды цёратненень 60 иетнень топодемстэ. Неень шкане пенсияс лисемстэ улить праваст истямо социальной лезксэс:
– пенсионертнэнь – общественной транспортсо ардомань кис 144 целковоень покшолмасо ЕДВ (ковозонзо ошонь транспортсо питневтеме ардомга социальной проездной картань рамамс);
– трудонь, военной службань ветерантнэнь – 290 целковоень покшолмасо ЕДВ (ковозонзо ошонь транспортсо питневтеме ардомга социальной проездной картань рамамс), эрьва ковсто ярмаконь компенсация (50%) эрямо таркань ды коммунальной услугань пандомс.
Сессиясонть истя жо толковазельть сеть ломантнень праваст, кить кодамо-бути тувталонь коряс ёмавтызь трицяст, ды сеть граждантнэнь, кинь ули праваст шкадо икеле получамс сыредемань коряс страховой пенсиянть. Сынст юткс совавтовить эйкакшонь учреждениясо 25 иень перть тонавтыцякс важодицятне, истямо жо шка велесэ здравоохранениянь учреждениясо важодицятне, театрасо налксицятне ды Васоло Северсэ важодицятне.
МР-нь Прявтось В.Д.Волков пенсиянь законодательствас полавтоматнень совавтомадо мелензэ-арсеманзо ёвтамсто ледстинзе Россиянь Президентэнть валонзо седе, В.В.Путин апак арсе зярдояк решеният а прими. Ды те разнэяк Президентэсь арсеманзо ёвтынзе масторсонть парсте те кевкстеманть тонавтнемадо ды регионтнэсэ пенсиянь законодательствадонть эрицятнень мелест кунсоломадо мейле, ютксост республикань ломантнень арсемасткак. Президентэнть пачтямосо весе ёвтазесь чевтелгавты пенсиянь реформанть. Сессиясонть ванкшновсть лия кевкстематкак.
В.Юдина