Ютазь иень меельце читнестэ Республикань Кудосо ютавтовсь МР-нь Государственной Собраниянь сисемеце тердемань 44-це сессиясь. Сонзэ важодемасо ульнесь Мордовия Республикань Прявтось Артём Здунов. Сессиянть панжизе ды ветясь МР-нь Госсобраниянь Председателесь Владимир Чибиркин. Чинь повесткас совавтозельть 19 кевкстемат.
Депутаттнэ сехте покш мель явсть маласо колмо иетнес бюджетэнть кемекстамонтень. Тешкстазель эрьва иестэ доходтнэнь кастомаст. Истя, 2021 иестэ саезь республикань эсь доходтнэ кассть 1,5-ксть. Бюджетэнь 60 миллиардто ламо целковойть арсеви нолдамс государственной колоньгемень программатнень топавтоманть лангс. Республиканской бюджетэсь кемекставсь национальной проекттнэнь мельс саезь, косо васень таркас аравтовить эрямонь социальной ёнкстнэ. Ярмактнень эйстэ седе покш пельксэсь карми ютавтовомо образованиянь, здравоохранениянь ды социальной политикань коряс тевтнень витемс.
Ютазь иень итогтнень ёвтамсто, высшей законодательной органонь представительтнень тевдест кортамсто Мордовия Республикань Прявтось Артём Здунов путсь покш питне депутаттнэнь важодемазост. Башка мель явсь весе фракциятнень велувсо тевтнень топавтомантень. Ёвтась сюкпрянь валт ютазь иестэ парсте важодеманть, республикань эрямонть эйстэ ве ёно а аштеманть, СВО-нь участниктненень ды сынст семиятненень лезксэнь максоманть кисэ.
– Бюджетэнть кемекстамодо мейле кармась парсте чарькодевеме, кодат минек васень мелявксонок. Прявт тевенек – минь парсте прядынек финансовой иенть. Икелепелев путовксонок вадрят, сынст эрявить ванстомс. Арсян, минь виде килангсотано. Санкциятнень ды лепштямотнень, рынкатнень свал пекстамост лангс апак вано, невтевксэнек паролгавтовсть. Те васняяк редяви сень коряс, зяро предпринимательть сыть минек республикав. Истя жо поладтано раськеютконь вейсэнь важодеманть, – мерсь Артём Здунов.
МР-нь Прявтось башка мель явсь промышленной производствань индексэнтень, Мордовиясо сон кармась 108%, масторсонок жо те невтевксэсь 104 %.
– Минек уликс базанть ды вийтнень пингстэ те невтевксэнть а полавтома. Весень кармавтан тердеме тенек инвестициятнень, – мерсь Артём Алексеевич.
Республикань государственной долконть эрьва иестэ киртямодо законопроекттэнть кортамсто тешкстазель, ушодовсь федеральной бюджетстэ максозь бюджетэнь кредиттнэнь коряс 2/3 долконь максомань программасонть Мордовиянть участиязо.
– Неень шкань доходтнэнь вельде минек сатыть виенек пандомс коммерческой долконть. 2020 иенть прядовомсто банктнень икеле региононть долкозо ульнесь 22,8 млрд целковойть – те 90 % собственной доходтнэнь эйстэ. Ней коммерческой банктнень икеле региононть весе долкось пандовсь шкадо икеле. Од иентень, Мордовиясо васенцеде, 2008 иестэ саезь, ютынек коммерческой долктомо. Те пек эрявикс тев, эдь бути лиякс, иенть ушодовомсто тенек саволь пандомс миллиардт целковойть кредит. Минь мутано тарка, ков явомс неть ванстозь ярмактнень, – мерсь МР-нь Прявтось.
2025 иес ды планонь коряс 2026-2027 иетнес Мордовиянь бюджетэнть шнызь весе фракциятнень представительтне. Те кевкстеманть коряс мелензэ-арсеманзо ёвтызе МР-нь Государственной Собраниясо «Единая Россия» фракциянь руководителесь Наталья Долматова. Сон тешкстась, те документэсь кемекстави экономикань коряс аволь шожда шкасто, тень лангс апак вано, ванстовсть социальной весе ёнкстнэ.
КПРФ-нь фракциянь прявтось Дмитрий Кузякин кирдизе Наталья Владимировнань меленть.
– Те сехте паро бюджет, конань минь кемекстатано те тердемастонть (созывстэнть), сындест жо ульнесть ниле, – мерсь Дмитрий Кузякин.
Седе тов кортамонть поладызь МР-нь Госсобраниясо ЛДПР-нь фракциянь прявтось Евгений Тюрин ды «Справедливая Россия – Патриоты – За правду» фракциянь прявтось Тимур Гераськин. Сынст пачтямост коряс, региононь од бюджетэсь виевгавтсы экономиканть.
Седе тов МР-нь Госсобраниянь депутаттнэ кортасть специальной военной операциянь участниктненень ды сынст семиятненень лезксэнь максомадо. Истят кевкстематнень ютксо ульнесь транспортонь налогонть эйстэ сынст олякстомтомась. Мельс саевсь ютазь 2024 иесь, сонзэ коряс пандоматне кармить улеме 2025 иестэ. Истя жо СВО-нь боецтнэнень ды сынст семиятненень мереви максомс вирень делянкатнестэ питневтеме чувтот.
Куш ней ушосо теле, ялатеке кортазель виртнень ды пертьпельксэнь сюпавчитнень кирвазематнеде ванстомадо. Те кевкстеманть коряс толковамот макссь МР-нь прокурорось Сергей Лапин. Кемекстазь закононть коряс кизэнь пси шкастонть ломантненень овсе а мереви улемс вирьсэ. Икеле тень кисэ кияк эзь чумондово, ней жо колыцятне кармить пандомо штраф.
Депутаттнэ вемельсэ максызь вайгелест Мордовиянь прявт ошонтень «Город трудовой доблести» почётонь лементь максоманзо кисэ. Истямо арсема марто Саранск ошонь округонь Администрациясь пшкадсь федеральной органтнэс. Ине Изнямонь чинтень «войнань эйкакштненень» седе покшолгавтовсь ярмаконь пособиясь.
Меельцекс пурнавозтненень сюкпрянь вал марто пшкадсь МР-нь Госсобраниянь Председателесь Владимир Чибиркин. Сон тешкстась, 2024 иесь сюпаволь эрьва кодамо политической событиясо. Васняяк, нама, те РФ-нь Президентэнь кочкамотне, косо изнясь Владимир Владимирович Путин.
– Минь кемекстынек ламо законт, сынь лездыть топавтомс социально-экономической задачатнень, конат аштить республиканть икеле. Минек тевенек – поладомс важодеманть республикань эрицятнень лезэс, – мерсь Владимир Васильевич.
Сессиясонть ванкшновсть лия кевкстематкак.
Валентина Юдина