Неть читнестэ МР-нь Государственной Собраниянь депутаттнэ пурнавкшность котоце тердемань 27-це сессиянтень. Важодемасонть ульнесть МР-нь Прявтось В.Д.Волков, МР-нь Правительствань Председателесь В.Ф.Сушков, муниципальной районтнэнь, республикань министерстватнень ды ведомстватнень прявттнэ, правань ванстомань органонь важодицятне ды лият. Сессиянть панжизе ды ветясь МР-нь Госсобраниянь Председателень полавтыцясь В.В.Алёхин. Важодеманть ушодовомадо икеле сон ловнынзе МР-нь Госсобраниянь Председателенть В.В.Чибиркинэнь поздоровонзо Мордовия Республикань Конституциянь чинть кувалма, конась примазь 1995 иень сентябрянь 21-це чистэ.
Сессиянь прявт кевкстемакс кармась «2018 иес ды аравтлувонть мельс саезь 2019 ды 2020 иетнес Мордовия Республикань бюджетс полавтоматнень совавтомадо» МР-нь законопроектэсь. МР-нь Правительствань Председателень полавтыцянть – Финансонь министранть А.Ю.Симоновонь валонзо коряс, республикань бюджетс полавтоматнень совавтомась сюлмавозь федеральной бюджетстэ ярмактнень явомаст марто – те 130 млн. целковойть. Неть ярмактне явовить Рузаевка ёнксонь Левжа велесэ ды Теньгушева ёнксонь Барашева посёлкасонть школадо икеле тонавтомань инфраструктуранть виевгавтомантень, истя жо велесэ эриця специалисттнэнь эрямонь условияст вадрялгавтомантень.
Теке кевкстеманть коряс кортамонть поладызе МР-нь Госсобраниянь Бюджетэнь, финансонь ды налогонь коряс комитетэнь прявтось С.Е.Киселева.
Сессиясонть кирдезель «О внесении изменений в статьи 391 и 407 части второй Налогового кодекса Российской Федерации» 544565-7 № федеральной законопроектэсь (физической лицятнень туртов ули-паронь налогтнень коряс федеральной льготатнень ванстомадост, бути сынь совавтозь пенсиянь ладямонть туртов Россиянь Федерациянь законодательствантень, конась ульнесь вийсэ 2018 иень декабрянь 31-це чинть самс). Законопроектэнть РФ-нь Государственной Думас совавтызе Россиянь Президентэсь.
Ванкшновсть лия кевкстематкак.
Т.Аксенова