Велень ава… Сон важодицяяк, кудазораваяк, аваяк. Сон а учи шнамот ды покш казнеть. Велень авась сэтьме ды важодиця, эдь велесэ эрямось нузякст а вечки.
Монь евтнемам вейке истямо авадонть – Валентина Николаевна Дединадо. Сонзэ весе эрямозо сюлмавозь тиринь енксонть марто: тесэ чачсь-кассь, важодсь ды эри весе пингензэ перть. Сонензэ ули мезде ледстнемс, мезде евтнемс.
Эйкакшчись
Валентина чачсь-кассь Отяжелень райононь Пумбра велесэ, конась течи допрок вейсэндявсь Сабанцелентень. Вишкинестэ уш варчизе велесэ эрямонть танстензэ – тевтнеде кудонть перька свал ульнесть ламо. Сонзэ тетянзо-аванзо – Николай Степанович ды Анастасия Васильевна Волосновтнень, эйкакштнеде ульнесть колмо – церыне ды кавто тейтерькат.
Волосновтне, кода велень лия эрицятнеяк, свал кирдсть ракшат: скал, вазт, тувот, саразт. Ды вишка шкасто саезь кудонть перька тевтнень сеедьстэ топавтсть эйкакштне. Тетяст-аваст роботасть колхозсо – туильть валске марто ранаяк, кудов жо сыльть уш позда чокшне.
Кода лия эйкакштнеяк, Валентина зярдояк а молиль тетянзо-аванзо каршо, топавтыль весе кармавтоматнень. Велесэ сеть шкатнестэ весе истя эрильть ды мезекскак берянекс те а лововиль.
– Эйкакш шкасто течинь чис ледстнемакс кадовсь, кода минь – покшнек-вишкиненек, весе роботылинек колхозонь паксятнесэ ламбамо якстерькай лангсо – мотыжинек, рединек сонзэ, таргинек. Школасто само а кенерилить, куроксто паксяв чиилить роботамо, – евтни Валентина Николаевна.
Школанть прядомадо мейле тейтересь ялганзо марто вейсэ Саратовав сезонной робочейкс важодеме ардтнесь. Тосо сынь эмеж мельга якицякс ульнесть. Истя, ве ено роботазь, арсизе, мекс бу а молемс тонавтнеме. Ялганзо марто кандызь документэст Орданьбуень бухгалтерэнь училищав. Макссть тенст бухгалтерэнь профессия, ансяк вана те тевсэнть роботамс эзь саво, тарка эзь лисе.
– Прядынек училищанть ды малавикс сазором марто молинек Отяжелень администрацияв важодема таркань коряс, – евтни Валентина Дедина. – Тосо вастынек Николай Михайлович Бариновонь. Икеле сон Сабанцелесэ колхозонь председателекс ульнесь, од школантькак тосо сон стявтызе. Мейле роботась Трокс Кужо велесэ, Целпановасо. Неимизь минек ды мери: «Адядо, мон сайтядызь Трокс Кужов роботамо». Минь жо те веледенть эзинек марсеяк. Ялатеке сыргинек. Ульнесь кизэнь ушодкс. Монь учетчицакс саимизь, Валя сазором – сталмонь онкстницякс.
Трокс Кужо велесь Валентина Волоснованень сеске кода-бути эзь вечкеве – пандот-латкот. Ков пель марто роботась ды пурнась туеме. Предколхозось тензэ мери, келя, иля туе, цера ялга муят, венчат. Тейтересь жо текеде пельськак – венчи, велентень кадови. Ды тусь.
Кармась роботамо Отяжелень Госстрахсо, эсь тиринь Сабанцелев оймсема читнестэ ардтнесь. Валя сазорозо жо роботась тоско – Трокс Кужосо. Вастневсть мартонзо сеедьстэ. Ульнесть цера ялгасткак. Вант, киньгак чачома чи вейсэ тешкстыть, лия кодамояк кенярксчи. Валентина кармась вастневеме цера марто ды иень ютазь венчась Трокс Кужо велень цера экшс.
– Мезде пелинь, текесь лисськак. Кода кортыть, уцяскадонть а оргодят. Орголемскак а эряви, ве чияк эзинь янксе мирдень экшс лисемадонть. Валя сазоромгак маласо, сон Целпановас венчась.
Семиясь ды уцяскась
Анатолий мирдензэ марто Валентина содавиксэкс теевсь сеске, кода ансяк сась роботамо Трокс Кужо велень колхозов. Церась роботась комбайнасо, тракторсо, тейтересь – учетчицакс. Колхозонь учетчицанть вановт ало весе паксятне-модатне ульнесть. А паксятне вельть кувакальть, саженсэ жо онкстнемс весе эрявсть. Якамс вельть ламо тарка, пильге лангсто прат. Анатолиень жо ульнесь «Урал» мотоциклазо ды вейсэ сынь весе паксятнень ардтнилизьгак.
Иень ютазь од ломантне урьвакстсть-венчасть. Тейтересь велявтсь Трокс Кужов. Шкань ютазь чачсь васенце тейтерест – Елена. Декретэнть прядовомадо мейле Валентина Николаевна кармась роботамо эйдень кужосо эйде мельга якицякс. Анатолий Николаевич мирдезэ истя жо роботась колхозсо, свал икеле молицятнень ютксоль. Иетне ютасть. Дединтнэнь чачсь омбоце тейтерест – Светлана. Семиясь покшолгадсь, эйкакштнень эрявсь кастомс-тонавтомс.
– Зярдо эсенек велесэ колхоз ульнесь, роботаткак ульнесть. Мейле мирдем кармась ардтнеме ве енга, пандсть аволь свал, эрямс жо кодаяк эрявсь. Кавто эйкакштнень трямс эрявсть. Секскак свал кирдилинек ламо ракшат, кардазонок чаво а эрсиль, – евтни Валентина Дедина.
Эйдень кужосо Валентина Николаевна роботась аволь пек кувать, а вана школань котельноень операторокс ульнесь комсь иеть. Тевесь те, эряви меремс, седе пек – церань, ансяк велесэ чачозь-касозь тейтерьаванть туртов стакакс овсе эзь маряво. Тосо сон роботась пенсияс лисемазонзо. Паряк, важодевель седе товгак, ансяк секе иестэнть школантькак пекстызь. Теке марто, пенсияс лисезьгак, Валентина Николаевна ве чияк эзь аште тевтеме. Дединтнэ нейгак кирдить покш хозяйства, кастыть эмежть. Анатолий Николаевич полады важодеме. Сон водитель.
– Кода лисинь мирденень, кавто иеть ававт-атявт марто эринь. Николай Владимирович ды Анастасия Семеновна ломантне ульнесть вадрят, чевтеть, ловсть эйсэнь теке эсь тейтерекс. Ававтом ульнесь сокор, мартонок эште веженсь цераст эрясь. Мейле минь колхозонь квартирас туинек, аламонь-аламонь ладинек эсь эрямонть: вадрялгавтынек кудонть, пурнынек хозяйства. Шкань ютазь вана те кудонть тенек максызь. Мейле ававтом кулось ды атявтом ськамонзо кадовсь. Сон Ине Отечественной войнань участникель, ранявоматне вакска эзизь юта. Пильгезэ сэредеме кармась, гангрена лиссь, вейке пильгенть керизь. Эйкакшост ульнесть сисем. Вант, вейкень кедьсэ аламос эрясь, омбоценть… Сась миненек, зярс-бути эрясь омбоце пильгентькак керизь. Мейле тейтерезэ саизе эстензэ ды шкань ютазь сон кулось. Покш сюкпря тенст, лездасть тенек пильге лангс стямс, – корты Валентина Николаевна.
Кода евтынек седе вере, Дединтнэнь кавто эйкакшост – кавто тейтерест. Елена ды Светлана прядызь М.Е. Евсевьев лемсэ МГПИ-нть (ней – университет), макссть тенст тонавтыцянь профессият. Ней семияст марто эрить ошсо: Елена – Саранскойсэ, Светлана – Московсо.
Сынсь жо, мирдть-нить: Анатолий Николаевич ды Валентина Николаевна, вана уш 41 ие ванстыть эсь уцясканть, эрить вечкемасо, вейке-вейкень чарькодезь ды мелень ванозь.
Валентина Николаевна аволь ансяк вечкиця ни ды ава. Сон эсь велень койтнень-кирдатнень ванстыця, культурань кепедиця, конась ютко шканзояк ютавты мелень коряс. Сон вана уш 40 иеть морси «Ойме» велень ансамблясо. Сынь аволь ансяк эсь ды шабра велень кенярксчитнень мазылгавтыть, истя жо свал ерокчист невтнить Отяжелень райононь ды республикань эрьва кодамо мероприятиятнесэ. Аватне сеедьстэ морсить Отяжелень «Родные просторы» ансамблянть юрсояк. Аволь весть ульнесть «Шумбрат, Мордовия!» фестивальсэнть. Репертуарсост седе ламо эрзянь кезэрень морот. Кода тешксты Валентина Дедина, сон пек вечки морамо эрзякс. Те сонензэ седе малавикс, седе чарькодевикс. Эште тешкставлинек, сон минек «Эрзянь правдань» свалшкань сермадстыця. Эдь сон алкуксонь эрзянь ава!
Юлия Еремина
Фототне саезь Валентина Дединань семиянь архивстэ.