ВИЕВ, КЕМЕ ОБУЦЯ, ЧАРЬКОДИЦЯ, ЭРЬВА ЛОМАНЕНТЬ МАРТО КЕЛЬ-ВАЛОНЬ МУИЦЯ – ИСТЯМОКС ЛАМОНЬ ТУРТОВ НЕЯВИ АЛКУКСОНЬ УЧАСТКОВОЕСЬ. ПРАВОПОРЯДКАНЬ ДЫ ВЛАСТЕНЬ ОРГАНТНЭСЭ ВАЖОДИЦЯТНЕНЬ ЭЙСТЭ УЧАСТКОВОЙ УПОЛНОМОЧЕННОЕСЬ АШТИ СЕХТЕ МАЛАВИКСЭКС ЛОМАНТНЕНЕНЬ, СВАЛ БАЖИ КИРДЕМС ВИДЕЧИНТЬ ДЫ СНАРТНИ А НОЛДАМС ЗЫЯНОНТЬ ДЫ, НАМА, СВАЛШКАНЕ АНОК ЛЕЗДАМС.
Россиянь МВД-нь «Ардатовский» ММО-нь участковойтнень коллективесь виев ды вадрясто важодиця, дисциплинась тесэ васенце таркасо, ламо иень перть важодицятне свал весемесэ лездыть одтнэнень. Коллективенть прявтсо ашти участковой уполномоченнойтнень ды ПДН-нь отделэнь прявтось полициянь майорось Сергей Борисович БЕЗРУКОВ. Сергей Борисович комсьветее иеде ламо канды службанть правоохранительной органтнэсэ, ульнесь УБЭП-нь оперуполномоченноекс, важодсь уголовной розысксэ, дознаниянь группасо ды меельце зярыя иетнень перть участковойтнень марто. Эсь службанть лови эрявиксэкс, эдь лездамс лиятненень – паро тев.
Сергей Безруков чачсь-кассь Орданьбуень Куцян велесэ. Тесэ тонавтнесь школасо ды уш вишка шкасто пек бажась эсь эрямонть сюлмамс сестэ эштё милициясо службанть марто. Прясонзо свал арсиль кодаткак зыянов тевть ды вешниль сынст витемань кить-янт.
– Средней школанть прядыя 1992 иестэ, ды самай сестэ Внутренней тевень министерствась яволявтсь васенце набор Милициянь высшей школас. МВД-нь системасо панжовсь тонавтнемань васенце заведения, козонь примасть средней школанть прядомадо мейле. Эдь икеле милициянь школав сайсть ансяк армиядо мейле, эли сетнень, кить уш роботасть. Истя карминь тонавтнеме Нижней Новгородонь Милициянь школасо, – ёвтни Сергей Безруков.
Эряви меремс, тонавтнеме понгсь стакачивтеме. Весе экзаментнэнь максынзе шождасто. Ды анокстаськак тенень, мерть, школасо тонавтнемань весе иетнень перть – эрьва валске ды чокшне чийнесь, тейнесь физической эрьва кодат упражненият. Ламо вийть макссь спортонтень, эдь Милициянь школасо те ёнксонтень явовсь башка мель. Тень коряс эрявсь кирдемс пек а шожда экзамен, конась ламонень ульнесь аволь виень коряс. Сергей Безруков жо спортонть вечкилизе, секскак стакачикс эзь лово.
Милициянь школасо тонавтнемань иетне ливтясть, эзть марявояк. Ды 1996 иестэ Школанть вадрясто прядомадо диплом марто од ломаненть кучизь важодеме эсенек республикань Инсар ошов. Тосо цёрась важодсь овсе аволь кувать, весемезэ ие, ды ютавтызе прянзо Чаунзань районов. Чаунзасо роботась колмо иеть ды 2000 иестэ сась тиринь ёнксов – Орданьбуев, косо важоди течинь чис.
– Чаунзасо аламос ульнинь УБЭП-нь оперуполномоченноень таркасонть ды уш Орданьбуев самодо икеле карминь важодеме уголовной розысксэ, мезенть поладыя од таркасонтькак. Те тевсэнть ульнинь 2009 иес. Мейле зярыя иень перть топавтынь дознаниянь группань прявтонь тевенть, ды 2016 иень мартсто аравтымизь участковой уполномоченнойтнень ды ПДН-нь отделэнь прявтокс, – корты Сергей Борисович. – Кодамо таркасо бу аволинь важоде, системась вейке – МВД-сь. УБЭП-сэ важодеманть шкасто панжинек экономикань ёнкссо закононь коламотнень, уголовной розысксэ ванкшнынек лия зыянов тевтнень. Ды, эряви меремс, уголовной розысксэ важодемантень максынь сехте ламо виень. Важодемаськак ульнесь мелень витиця, тевтнедеяк ваннынек эрьва кодат. Эрьвась эсь койсэ явовиця, эрьванть ванкшнома лиякс. Бути кортамс дознаниянь группасо важодемадонть, тесэ важодемась таго лия. Мон ней вана лиясто арсян, эдь весе закононь коламотнень, конатнень панжинь уголовной розысксэ важодемань шкастонть, мейле савсь одс ванномс дознавателекс улемстэ. Тесэ, монь койсэ, важодемась седе пек моли кабинетсэ. Ванкшнат уголовной тевтнень, тонавтнят, вешнят чумондомань ёнкстнэнь. Тесэ ильведевкст иляст нолдаво, тесэ ваннови уголовной тев, конань коряс ломанесь ёвтави чумокс. Удалов велявтома а карми, ламосо тонь эйстэ ашти кинь-бути уцясказо.
Неень шкане, 2016 иестэ саезь, С. Б. Безруков топавты Россиянь МВД-нь «Ардатовский» ММО-нь участковой уполномоченнойтнень ды ПДН-нь отделэнь прявтонь тевенть. Сонзэ прявтсо важодить кемень участковойть, ПДН-нь кавто роботыцят ды специалист, кона топавты административной ванноманть. Кода мерсь Сергей Безруков, Орданьбуень районсо лововить кемень административной участкат ды эрьванть ули эсь участковоезэ.
– Участковойтнень важодемаст мельстуиця ды сюлмавозь эрямонь весе ёнкстнэнь марто. Свал ломань ютксат, важодемань эрьва чись лия ёнов а молиця, свал эйсэть учи мезяк од. А стяко кортыть, участковоенть 101 тевезэ, – тешксты Сергей Борисович. – Эрьва чинек ушодови планёркасто, косо толковави важодемань чись ды ушодови материалтнэнь, пшкадематнень, яволявтоматнень лангсо важодемась. Седе ламо важодтяно эрицятнень яволявтомаст, пшкадемаст ды пачтямост коряс. Участковойтне вастневить эрицятнень марто, кить пряст ветить а видестэ. Эрьва чистэ содавтнить сетнень, кить аштить учётсо. Лиякс меремс, важодить сень коряс, мезе мелявтовты эрицятнень. Эдь а стяко участковоесь – правоохранительной органтнэсэ важодицятнестэ сехте малавикс эрицятненень.
Участковоень тевденть кортамсто жо тешкстызе, сынст отделэнть вановт ало аволь ансяк Орданьбуе ошось, райононь весе велетнеяк. Истя, велетнесэ стакачитне, васняяк, сюлмавозь территориянть покшолманзо марто. Эдь сеске эрьва ков а кенерят. Тесэ участковоесь – закононь ломань, кона лезды лисиця кевкстематнень решамосо. Теке марто велетнесэ пек лездыть сынсь ломантнеяк, седе пек сыретне, конат а менстить мезеяк ды редить весементь, мезе лиси.
Кода тешксты Сергей Борисович, седе сеедьстэ эрицятне пшкалить семиясо сёвномань, шабратнень беряньстэ прянь ветямонь, саламонь тевтнень коряс. Меельце шкастонть улить пшкадемат телефононь ды Интернет вельде манчемань тевтнень коряскак.
– Течи эдь эрьванть ули банконь картазо, сынь кеместэ совасть минек эрямос. Сонзэ вельде паро пандомс рамавкстнэнь кис, маряви, ярмактне а беряньстэ ванстовить, эдь пин-кодонть содасак ансяк тон, – тешксты Сергей Борисович. – Теке марто манчицятне тесэяк содыть карточкатнестэ ярмаконь саламонь эрьва кодат ёнкст. Нама, минь важодтяно эрицятнень марто, ёвтнетяно манчемань-саламонь ёнкстнэде, явшетяно памяткат, ансяк ломантне ялатеке манявить. Тагояк пшкадян эрицятненень. Илинк максо прянк манямс! Зярдояк илядо нолда эсь кудос а содавикс ломанть!
Сергей Безруковонь прявтсо отделэсь истя жо важоди кемгавксово иеде седе вишкинетнень тевест коряс. ПДН-нь отделэнть важодемазо пек келей ды ответственной – тесэ школатнесэ правань коламотне, тетятнень-аватнень ды эсест эйкакштнень марто кортамось, учётсо аштиця семиятнень марто важодемась. Сергей Борисович корты, свалшкане сёвномс эйкакшонть эйсэ – те а виде. Эряви лездамс тензэ школадо мейле эсь шканть арсемасо, штобу аволь уле шка ды мельть теемс берянь тевть. Сехте эрявиксэсь – эйкакшось явоволь мель кодамояк тевс, невтемга, спортонтень. Штобу урокто мейле тевтеме аволь яка ушова. Нама, аволь свал весемесь ладяви видестэ.
Кемгавксово иеде вишкинетнень марто важодицятнень прявт тевест – ванстомс эйкакштнень праваст. Зярыя иеде икеле од ломантнень ютксо ульнесть ламо зыянов тевть, закононь коламот. Шкась ютась, тевесь полавтовсь вадря ёнов. Внутренней тевень органтнэсэ важодицятнень вийсэ эйкакштнень ютксо теевиця зыянов тевтнень ламочись валгсь, течи истятнэде кармасть ков седе аламо.
Кода а нолдамс шканть, кода кастомс вадря ломань? Истямо кевкстема седе сеедьстэ максыть ПДН-нь важодицятненень. «Эряви вечкемс эсь эйкакштнень, явомс мель сынст эрямонтень, содамс, мезе вечки эйкакшось, ладямс эсь ютксо эрямо лувонть», – тешксты Сергей Безруков. Ды неть валтнэ пек видеть. Сеедьстэ эйкакштнень зыянс понгомасо чумот сынсь тетятне-аватне, конат эсь эйкакшонтень овсе а явить мель, конат седе ламо арсить ансяк эсь прядост.
– Закононь коламотне ды зыянов тевтне киньгак эштё парос эзизь пачтя. Секскак эряви улемс алкуксонь ломанекс ды истямокс кастомс эсь эйкакштненьгак, – кемекстызе Сергей Безруков.
Виев, кеме обуця ды алкуксонь цёратне – масторонть нежезэ ды кемемазо. Истятнэнь юткс апак кавтолдо кандовить полициянь уполномоченной участковойтне. Кадык важодемаст, седе пек закононь а колыця ломантнень туртов, ламосо кадови а неявиксэкс, теке марто сынь эрьва чистэ ванстыть эсь участкатнесэ сэтьмечинть, теить весементь эрямонок зыянтомо улемга.
Юлия ЕРЕМИНА