2021 иестэ «Эрзянь правда» газетась тешкстасы 100 иень юбилеензэ.
Кода уш пачтинек таштамковсто тиринь газетань лопатнесэ, сонзэ васенце номерэсь лиссь Московсо, 1921 иестэ. Лемезэль: «Якстере теште». Самай се шкастонть эрзянь кельсэ лисиця газетанть редакторокс ульнесь Мордовиянь государственностень кемекстыцясь, Мордовиянь окружной судонь васенце председателесь, эрзянь цёрась Тимофей Васильевич Васильев. Ламо вийть путсь сонзэ анокстамонтень ды нолдамонтень. Те ёнкссонть сонзэ путовксонтень пек стака максомс питне.
Те покш тевенть сонензэ прась уцяска топавтомс Московсо – РСФСР-нь ВЦИК-нь национальностень отделсэ важодемстэ.
Т.В. Васильевень эрямо кидензэ домкасто ды парсте ёвтнить «Жизнь в борьбе» книгасонть Мордовия Республикань заслуженной юристэсь, МР-нь Верховной судонь административной тевтнень коряс судебной коллегиянь составонь председателесь В.Н. Мартышкин, Н.П. Огарёв лемсэ МГУ-нь юридической факультетэнь деканось, Финнэнь-угрань регионъютконь центрань прявтось Ю.Н. Сушкова.
Кода пачтясь тенек Юлия Николаевна, Тимофей Васильевичень покш таликазо Мордовиянь государственностенть кемекстамосо. Эдь те кевкстеманть коряс ютавтовсть пшти пелькстамот. Ульнесть каршо ютыцяткак. Секскак те тевесь топавтовсь а шождасто.
Шкань ютазь, зярдо кемекстазель Мордовиянь автономиясь, Тимофей Васильевич аравтозель Мордовиянь окружной судонь председателекс. Самай сонзэ пингстэ судтнэ ютавтовсть ды приговортнэ ёвтавсть эрзянь ды мокшонь кельтнесэ. Те топавтовсь сеть ёнкстнэсэ, косо эрясть неть раськень ломантне. Те ульнесь дивань тевекс, сон лездась кастомс-кепетемс Мордовиянь автономиянь судопроизводстванть.
Тимофей Васильев ульнесь МАССР-нь Верховной Советэнь депутатокс. 1931 иестэ сонзэ ютавтызь важодеме Великобританияв – СССР-нь Торгпредствас. Сон ульнесь СССР-нть ды Великобританиянть ютксо торговой соглашениянь анокстыцятнестэ вейкекс. Те вейсэнь важодемадо соглашениясь топавтовсь ламо иень перть.
Омбо масторсо важодемстэ Тимофей Васильевич эзизе стувтне тиринь ёнксонзо, поладсь тевтееманзо Мордовиянь государственностенть кемекстамосо – сёрмадстниль тиринь кельсэ лисниця газетат, журналт ды книгат. Сон ульнесь Мордовской АССР-нь ЦИК-нь членэкс, секскак сеедьстэ сакшныль Лондонсто сессияв.
Тимофей Васильевич аволь ансяк редявикс юрист, общественной важодиця, истя жо исследователь. 1931 иестэ нолдась «Мордовия» книга. Эйсэнзэ ламо сёрмадсь Мордовиянь государственностенть кемекстамодо, те ёнкссонть уликс стакачитнеде. Домкасто ванкшнызе эрзятнень-мокшотнень юридической статусост – кезэрень шкатнестэ саезь советской властень иетнес.
Содазь, ютазь пингень 30-це иетнестэ масторонть келес репрессиянть алов понгсть интеллигенциянь ламот представительтне. Истя, 1937 иестэ чумондозель ды ледезель Тимофей Васильевич Васильевгак. Чумось лангстонзо каязель ансяк КПСС-нь ЦК-нь XX съездэнть ютавтомадо мейле.
Тешкстасынек, те иень сёксня, Конституциянь чистэнть, Мордовия Республикань Прявтось В.Д. Волков МР-нь Верховной судонь судьянтень В.Н. Мартышкиннэнь ды Н.П. Огарёв лемсэ МГУ-нь юридической факультетэнь деканонтень Ю.Н. Сушкованень «Жизнь в борьбе» (Т.В. Васильевде) книганть кисэ макссь МР-нь Государственной премиянь лауреатонь дипломт. Казнень саемань шкастонть каршо валсонть Юлия Николаевна ёвтась сюкпрянь валт те ине ломаненть семиянтень, васняяк Мордовской окружной судонь васенце председателенть тейтеренстэнь, эйкакшонь писательницантень Э.Т. Кузнецованень (сон чачсь 08.04.1932 иестэ Лондон ошсо) тетянзо коряс пек питней документтнэнь ванстомаст кисэ, конат теевсть юрокс сынст важодевкссэнть.
Теде башка, Ю.Н. Сушкова ёвтась пек паро арсема: Мордовиянь прявт ошсо, Саранскойсэ, Т.В. Васильевнень стявтомс кеврунго. Койсэнек, те арсемась пек паро. Кемтяно – топавтови!
Валентина ЮДИНА