Пятница, октября 23, 2020
Важное

Аволь умок МР-нь Прявтонть Указонзо коряс райононь ракшань орматнень каршо бороцямонь коряс станциятне ютасть вейкине структурас – ракшань орматнень каршо бороцямонь коряс Мордовия Республикань ветеринарной станцияс, конань прявтсо Е.А. Рунков.

Тень коряс мезе арсить райононь станциянь прявт ветеринарной врачтне? – теде ды лиядо минек корреспондентэсь кортнесь Отяжелень райононь ракшань орматнень каршо бороцямонь коряс станциянь прявт ветеринарной врачонть Ю.Н. Егорцев марто.

Тешкстасынек, Юрий Николаевич Егорцев чачсь 1967 иестэ Отяжелень райононь Ламбаське велесэ. Тонавтнесь тесэнь школасо, мейле – Козловкань 13 № средней специальной профессиональной училищасо (СПТУ-со), конань прядызе пек парсте. 1985 иестэ, экзаментнэнь парсте максомадо мейле, кармась тонавтнеме Н.П. Огарёв лемсэ МГУ-со ветеринаронь специальностентень. Университетэнть прядомадо мейле сась важодеме Отяжелень райононь ракшань орматнень каршо бороцямонь станцияв.

– Юрий Николаевич, сестэ кие важодсь станциянь прявтокс?
– Сестэ станциянь прявтокс ульнесь Геннадий Степанович Балаев. Сон оймамонь а содыця. Тень вешсь мартонзо важодицятнень пельдеяк.
Зярыя иень ютазь карминь важодеме межрайонной ветеринарной лабораториянь прявтокс. Коллективесь аволь покшоль. Весемезэ косо-бути кеветее ломанть. Минь ванынек аволь ансяк минек райононь ракшатнень мельга, истя жо Покш Березникень, Дубенкань, Орданьбуень районтнэнь. Мерян, важодинек виевстэ, вейке омбоценень лездазь. Оймсемань апак сода. Чарькодинек, велетнесэ ракшатнень ламолгавтомась ашти ветеринарной врачтнень эйстэ.
Тешкстаса, сестэ, ютазь пингень кавксоньгеменце иетнестэ, районтнэсэ ракшатнеде ламольть. Мельгаст савсь ваномс кеместэ. Ванстынек апаро орматнеде ракшатнень ды те тенек удалась.
Лабораториясо важодицятнень эйстэ явовсть ветеринарной врачтне Н.О. Суняйкина, М.М. Колесникова, лиятне.

– Юрий Николаевич, важодемань эрьва коллективсэ улить ломанть, конатне лововить прявтонь кеме нежекс, мельспарокс. Тынк коллективсэ истятнэ кить?
– Неть трудонь ветерантнэ – Николай Александрович Барсуков, Мария Николаевна Балаева, Павел Валентинович Нуйкин, Галина Петровна Корчагина, Татьяна Ивановна Лазарева. Сынь весементь теить станциянть виевгавтомга.
Стака шкатнестэяк, зярдо шкастонзо эзь максневе зарплата, сынь паро эрямонь вешнеме эзть тукшно. Вечксть ды вечкить эсь тевест. Мельспарос, сынст ладсо важодеме тонавтнить одтнэяк. Неть – Анастасия Лумей, Ольга Степушкина.

– Кодат ветеринарной участкат совить Отяжелень райононь ракшань орматнень каршо бороцямонь коряс станциянтень?
– Эйзэнзэ совить Козловкань участкань ветеринарной лечебницась, конань прявтсо Татьяна Николаевна Петрушкина; Вечерлеень участкань ветеринарной лечебницась, конань прявтсо Василий Михайлович Козлов; Ботужелень участкань ветеринарной лечебницась, конань прявтсо Олег Иванович Демин; Сабанцелень участкань ветеринарной лечебницась, конань прявтсо Иван Александрович Михайлов. Ветеринариянь эрьва лабораториясо ули неень шкань оборудования марто автомашина. Специалисттнэ вастневить велень эрицятнень марто, лездыть тенст ракшатнень трямосо, вейсэ бороцить апаро орматнень а нолдамга: сибирской язванть, туберкулёзонть, тувонь африкань чуманть, ящуронть ды истя седе тов.

– Неень шкань оборудования марто автомашинатнень раминк эсенк ярмак лангс?
– Виде, эсенек ярмак лангс. Видькстан, тень кувалма тенек савсь ламо «чийнемс» Саранск ошонь покш прявттнэнь кабинеттнэва.
– Тынк станциясо важодицятнень вановтост ало зяро крестьянонь-фермерэнь хозяйстват, велень хозяйствань предприятият?
– Отяжелень райононь ракшань орматнень каршо бороцямонь станциясо важодицятнень вановтост ало велень хозяйствань кеменде ламо предприятият, крестьянонь-фермерэнь кавксо хозяйстват. Общественной секторсо районсонть лововить 8 тёжат 841 скал, эйстэст 3854 – потявтовицят, 200 – сывелекс трявицят, 38082 тувот, 368 – реветь, 593689 саразт. Частной секторсо 1771 скал, эйстэст 287 – потявтовицят, 1724 – тувот, 1522 – реветь.
– Тынь, нама, покш мель явтадо аволь ансяк ракшатнень мельга ваномантень, истя жо пштистэ вантадо ярсамопельтнень качестванть мельгаяк?
– Нама, истя. Районсонть важодить «Атяшевский» перерабатывающей комплексэсь, «Маслодельный завод «Атяшевский» ОАО-сь, «Агро-Атяшево» ЗАО-нь нармунень хозяйствась. Сынст продукцияст ашти минек специалисттнэнь вановтост ало.
– Юрий Николаевич, республикань ламо районтнэсэ ульнинь, ванкшнынь ветеринарной лабораториятнень. Кодамо тынк лабораториясь неень шкасто, истямо эзинь некшне. Сонзэ кувать-аволь строиде?
– Колмошка иеть, паряк, ули. Ютавтынек малав кавто миллиондо ламо целковойть. Тесэ важодсь Отяжелень строителень бригада. Сынь полавтызь потолоконть, киякстнэнь…
Оборудованиянь рамамс ярмакт явокшнось МР-нь Правительствась, косо прявтокс Владимир Фёдорович Сушков. Истя, лабораториянть, кеместэ витнемадо мейле, панжинек 2018 иестэ.
– Школань тонавтницятнень ютксо профориентационной важодема ветятадо-арась?
– Кода эно. Ветятано. Кизна районной Культурань кудосо ютавтозель покш промкс, ков тердезельть аволь ансяк райононь школань прядыцятне, истя жо тетяст-аваст. Эйсэнзэ ульнинь монгак. Тосо ёвтнинь ветеринарной врачонь тевенть а ёвтавияк кодамо питнейчидензэ. А мезть сёпомс, райононтень ветеринарной врачт эрявить. Ансяк «Атяшевский» МПК-нтень эрявить кото ветеринарной врачт.
– Течи кодат тевть топавттадо?
– Неень шкасто минек станциянь специалисттнэ покш мель явить ракшатнень чипированиянтень. Тень пингстэ ракшатне совавтовить системас, косо карми тешкстазь эрьва ракшанть, бути истя можна меремс, эрямо кизэ: зярдо вазыясь, кодат тензэ теезь ливкст, мезде ярсась ды истя седе тов. Ульнинек «МАПО «Восток», «Агрофирма «Искра», «Сабанчеевское» ды велень хозяйствань лия предприятиятнесэ.
Видькстан, мон эштё топавтан Орданьбуень райононь ракшань орматнень каршо бороцямонь коряс станциянь прявтонь тевтненьгак.
Эзинек стувтне сетненьгак, кить кирдить мекшть. Районсонок истятнэде 83 ломанть. Кирдевить 1024 семият. Эйзэст чипированиянть ютавтынек бойкасто ды парсте.
Тешкстаса, кинь картань коряскак районсонть чипированиясь прядови ноябрянь 1-це чинтень. Весемесь, мезе эряви тень туртов, минек ули.
Орданьбуень районсояк тевтне молить вадрясто. Тосояк, Отяжелесэяк парсте ладязь «Меркурий» системась. Сетненень, кить микшнить сывель, ловсосто продукция, максневить эрявикс документт. Вана Отяжелень ветстанциясо те тевенть топавтыть Татьяна Лазарева, Николай Барсуков, Евгений Бояркин.
– Юрий Николаевич, арсян тыненк ды тынк коллективенть туртов кеме шумбрачи, свал вадря ёжомарямо, важодемасо од изнявкст, икелепелевгак тевенк молест вадрясто!

Кортамонть сёрмадызе
Пётр Зиновьев. Фототне Э.Ретунскиень
Отяжелень район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».