Понедельник, апреля 19, 2021
Важное
Овсе недлядо икеле весе масторось тешкстась Отечествань ванстыцянь чинть – виев, кеме обуця ды алкуксонь цёратнень кенярксчинть. Истятнэнь юткс апак кавтолдо кандовить полициянь уполномоченной участковойтне. Кадык сынст важодемаст, седе пек закононь а колыця ломантнень туртов, ламосо кадови а неявиксэкс, теке марто сынь эрьва чистэ ванстыть эсь участкатнесэ сэтьмечинть, теить весементь, штобу минек эрямонок улевель зыянтомо.


Участковоень службань явовтыця ёнкстнэде ды салавачитнеде минь кортнинек Внутренней тевень органтнэнь территориальной подразделениянь Саранскойсэ Россиянь МВД-нь Управлениянь 1 № ОП-нь (Саранск ошонь Октябрьской районось) полициянь старшей участковой уполномоченноенть Алексей Викторович Суюшов марто, кона вана уш кеветее иеть канды службанть Внутренней тевень органтнэсэ ды весе те шканть перть участковоень таркасонть.

Алексей Суюшов чачсь-кассь Орданьбуень райононь Колазелесэ. Ды уш вишка пингстэ саезь, кода ламот цёрынькатне, арсесь полициясо службадонть ды седе пек участковоень тевденть. Эдь сон сехте малавикс эрицятненень, сынст васень кунсолыцяст-лездыцяст. Секскак школанть прядомадо мейле Алексей тонавтнесь М.Е. Евсевьев лемсэ МГПИ-нь Историянь ды правань факультетсэ.

– Тонавтнеманть прядомадо мейле покш мелем ульнесь молемс важодеме тиринь Орданьбуев, – корты Алексей Суюшов. – Тосо весемесь эсенек, содавикс. Ды эрямо таркань коряскак мелявкст авольть уле. Ансяк Орданьбуесэ таркат сестэ арасельть, важодицят эзть эряво.

2006 иестэ институтонть прядомадо мейле эрзянь цёрась сеске кармась роботамо Саранск ошонь Октябрьской райононь ОВД-сэ сестэ эштё милициянь участковой уполномоченноекс. Те шкас ледстни васень тевензэ, конань коряс важодсь роботамо ансяк самодо мейле. Те ульнесь лавкасто саламонь тев. Эйкакшонь кудосо-интернатсо трявиця-кастовиця эйкакштне совасть лавкас ды саласть мезе ульнесь мелест. Зярдо полициянь важодицятне ды Суюшовгак ванность те тевенть ды кевкстнесть эйкакштнень, мекс сынь колызь закононть, тонат мерсть, келя, ярсамс ульнесь а мезе. Алексей Викторовичень сельме икеле течис неть эйкакштнень вановтост – чаво, чумочинь а мариця. Важодемань иетнень перть истят вановттнэде ламольть, ансяк вана неть эйкакштнень сон ульнесь мейсэ-бути явовикс. Паряк, сонсь эштё пек одоль, тевентень ансяк кундакшнось, ды эрямонтькак содылизе аволь истя парсте.

– Минек тевсэнть эряви улемс седе кемекс, бути весементь эсь седеенть пачк кармат нолдамо, кувать а цидярдат, – тешксты Алексей Суюшов. – Эдь минек прявт тевенек – сэтьмечинь ванстомась, закононь коламотнень ливтемась ды панжомась, эрицятнень марто важодемась. Весе кевкстематне, конат лиснить эрицятнень пельде, седе сеедьстэ решавить участковойтнень лезксэст вельде.

Теке марто участковоесь – кода универсальной солдат. Тон сыргить тердемань коряс, ютамсто редить: автомобилень азорось колы парковкань правилатнень, эряви весементь кемекстамс, тешкстамс протокол ды кучомс сонзэ ГИБДД-в. Седе тов ютат – эйкакшт озоровить. Ды тон а учат кемгавксово иеде седе вишкинетнень тевест коряс инспектортнэнь, тонсь кортат мартост, ваннат тевенть. Истя жо участковоесь лиясто топавты следователень тевентькак, лиякс меремс, сеске таркасо вети кевкстнеманть. Теке марто патрульно-постовой службань инспектортнэнь ладсо ютатано эсь территориянть, ваннотано сэтьмечинть. Весементь коряс, зярс ютат тердемань коряс, топавтат эрьва кодамо тевть.

Алексей Суюшов тешксты сеньгак, участковоентень эряви улемс куш кодамо тевсэ чарькодицякс, эряви парсте содамс законтнэнь. Секскак зярыя шкань перть участковоекс важодезь од цёрась сась мельс кастомс эсь содамочитнень ды мольсь тонавтнеме Юстициянь министерствань правовой академияв.

Савкшнось цёрантень кандомс службанть республиканть томбалеяк. Зярыя иеде икеле Суюшов ульнесь командировкасо Северной Кавказсо. Пельиень перть эсь коллегатнень марто сынь ванстсть тосонь эрицятнень сэтьмечинть.

Тосто цёрась велявтсь лия ёнов а молиця казне марто. Эсь семиянтень усксь псака ды колмо левкскеть, конатнень явшинзе ялгатненень-малавикстнэнень. Истямо казнеденть кортамсто Алексей тешксты, пек уш тюсозо тусь мельс, а вастневикс ды мазый.

Участковоень тевденть ёвтнемстэ жо тешкстызе, роботась тензэ пек вечкеви, свал ломань ютксат, важодемань эрьва чись лия ёнов а молиця, свал эйсэть учи мезеяк од. Алексей Суюшовонь участкась аволь вишкине, сонзэ вановт ало ашти Озёрной посёлкась. Ды кода тешксты сонсь участковоесь, велетнесэ стакачитне васняяк сюлмавозь территориянть покшолманзо марто. Эдь сеске эрьва ков а кенерят. Тесэ участковоесь – закононь ломань, кона лезды лисиця кевкстематнень решамосо. Теке марто велетнесэ пек лездыть сынсь ломантнеяк, седе пек сыретне, конат а менстить мезеяк ды редить весементь, мезе лиси.

Кода тешксты Алексей Викторович, эрицятне седе сеедьстэ пшкалить семиясо сёвномань, шабратнень беряньстэ прянь ветямонь, саламонь тевтнень коряс. Участковоенть валонзо коряс, саламотне свал ульнесть ды кармить седе товгак. Тесэ эрицятненень эстест эряви улемс седе превейкс. Эсь ули-паронть мельга ваномс седе парсте. Неень шкане минек подъездтнэсэ мезе ансяк арась: велосипедт, коляскат, сокст, нурдынеть. Совак ды сайть мезе мелеть, кияк а лоткавтанзат.
Меельце шкастонть пек сеедьстэ пшкалить телефононь ды Интернет вельде манчемань тевтнень коряскак.

– Течи эдь эрьванть ули банконь картазо, сынь кеместэ совасть минек эрямос. Сонзэ вельде паро пандомс рамавкстнэнь, маряви, ярмактне а беряньстэ ванстовить, эдь пин-кодонть содасак ансяк тонсь. Теке марто манчицятне тесэяк содыть карточкатнестэ ярмаконь саламонь эрьва кодат ёнкст.

Нама, минь важодтяно эрицятнень марто, ёвтнетяно манчемань-саламонь ёнкстнэде, явшетяно памяткат, ансяк ломантне ялатеке манявить. Тагояк пшкадян эрицятненень. Илинк максо прянк манямс! Зярдояк илядо нолда эсь кудос а содавикс ломанть. Бути сыцятне ёвтыть пряст социальной службань эли жо лия ведомствань важодицякс – ванынк сынст удостоверенияст ды гайневтеде те службантень. Зярдояк илядо максо истят сыцятненень ярмакт, илядо кеме кодамояк акцияс. Теке марто илядо кеме телефонсо гайневтиця «малавикстнэнень», конат вешить кедьстэнк ярмакт. Кевкстеде, кие тынк марто корты, кода фамилиязо, лемезэ, зяро иензэ, содасынзе-арась тынк малавиксэнк, ялганк. Истят кевкстематне талакавтсызь манчицянть, сон карми човорявомо ды лоткавтсы телефононть.

Илядо кеме сеть гайневтематненень, косо алтыть ярмаконь компенсация, бути тынь путтадо зярыя ярмакт расчётной счётс. Илядо гайневте сеть номертнэс, конат гайневтсть тыненк ды лоткавтызь телефононть. Истят номертнэс гайневтемстэ тынк телефонсто саевить ярмакт. Зярдояк илядо гайневте сеть номертнэс, косто сыть пачтямот, што тынк картанк блокировазь. Сюлмаводо банконть марто «пси линиянь» телефонганть, кона тешкстазь тынк карточканть удало.

Операторонть марто кортамсто картань пароленть, реквизиттнэнь, эсь персональной даннойтнень зярдояк илядо ёвтне: банконь важодицятнень ули весе эрявикс информацияст. Башка пшкадян сыре ломантнень малавиксэст туртов. Кортадо эсь тетятнень-аватнень, покштятнень-бабатнень марто, ёвтнеде манчемань ёнкстнэде, илядо мере тенст кортамс а содавикс ломантнень марто. Ванстынк эсь малавиксэнк манчемань-саламонь тевтнеде! – кемексты Алексей Викторович.

Ёвтнесь Алексей Суюшов коронавирусонь кезовонть шкасто важодемадонтькак. Сон тешкстызе, пек покш полавтомат сынст важодемасонть те шкастонть арасть.

– Эрицятнень мелявксост улить куш кодамо шкасто, сынь гайневтить, кевкстнить ды сакшныть участкав. Кортатано ды вастневтяно мартост. Нама, те шкантень весе кармавтоматнень кирдезь, – тешксты участковоесь.

– Кода жо муема эсь участковоенть?

– Совадо эсь райононь, косо эрятадо, полициянь отделэнь сайтс. Тосо тешкстазь кода дежурной частень, истя участковоень телефононь номертнэ. Истя жо мереви гайневтемс 02 эли 112 номертнэва ды вешемс тынк участковоенть телефононзо. Тосо ёвтасызь.

Алексей Викторович Суюшов марто кортамсто мон сынь мельс, улемс участковоекс – те призвания. Те важодемась улезэ мелень ды седеень коряс. Мельде-валдо участковойтне а роботыть. Эдь сыненст пшкалить лезкс мельга ды кемить, сынь лездыть.

Юлия Еремина
Фотось Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».