Пятница, марта 29, 2024
Важное

Николай Михайлович Симдяновонь чачома чистэ саезь 113 иетненень

 

Паро ялгась теевкшни седейпельксэкс. Николай Симдяновонь ульнесь ёрокчизэ муемс ялгат ды маштсь ялгаксчинть ванстомо.

Минь, неень шкань эрицятне, се шкадонть, се зыяндонть, конань савсь печтямс покштянок-бабанок туртов, содатано ансяк се шкань сёрмадовкстнэнь коряс. Войнань васенце читнестэ саезь ды прядовомазонзо фронтонь, армиянь ды весе лия газетатне ульнесть сонзэ летописенть сёрмадыцякс, минек боецтнэнь ине апелемачист невтицякс. 1942 иенть ушодовомсто лиснесть фронтонь 13, армиянь ды корпусонь 93 ды дивизиянь зярыя сядот газетат. Войнань теманть кепсесть содавикс писательтнеяк. Ловозь, фронтсо боецэкс, командирэкс, политроботникекс, военной корреспондентэкс, партизанонь отрядтнэсэ ульнесть 1500 ламо писательть. Мордовиясояк войнань шканть перть вейкеяк газета эзь лисне, косо бу авольть печатаво фронтсто кучозь статьят, стихть, кулят, очеркть. Сынст сёрмадсть эрзянь ды мокшонь писательтне. Печатавиця материалтнэсэ башка мель явовсь патриотонь ёжомарямонь кемекстамонтень.

Войнанть прядовомадо мейле минек журналисттнэ састь республикань, райононь ды заводонь газетатнес, книгань издательствас. Истятнэстэ ульнесь Николай Михайлович Симдяновгак. Сон чачсь 1918 иень ноябрянь 21-це чистэ Чаунза ёнксонь Чаунза велесэ. Школанть прядомадо мейле, 1937 иень июньстэ, сась важодеме «Ленинэнь киява» газетав, тестэ ушодовськак журналистэнь кизэ. Седе тов зярсыя важодсь «Пионерэнь вайгель» журналонь литературной редакторокс.

1939 иестэ Колянь саизь Якстере Армияв. Ульнесь политруконь лездыцякс, мейле кочказель частень комсомолонь комитетэнь секретарекс. Масторонок велькссэ сестэ пурнавкшность войнань чопода пельть. Симдянов уш умок анокстась прянзо масторонь ванстомо. Недлянь перть кавксть-колмоксть яксиль тирэв леднеме, стадионов эли Посопонь луга лангов гранатань ёртнеме, турниксэ рунгонзо кепсеме. Лиясто сайнилизе мартонзо Павел Любаев ялганзо.

Ноябрянь пиземе валскестэ Симдяновонь ильтизь армияв. Туемстэ Любаев ялганстэнь мерсь: «Паряк, Пашка, а сави васодемс. Седеем мари: карми улеме покш война. Керясамизь, эли, паряк, цидярдтано. Бути маштован, икелев а ризнан: кортыть, чачома масторонть кис куломась – часия. Ней жо карматано сёрмадомо вейкенек-вейкенек туртов сёрмат».

Симдяновонь саизь служамо Дальней Востоков, артиллериянь полкс. Служамонь стакачитнеде зярдояк эзь ёвтне, кортась ансяк: неть стакачитнень изнямс лездыть Суворовонь валонзо: «Стака тонавтнемстэ – шожда бойсэ».

1941 иестэ зэрькстась войнась, ансяк аволь чилисема ёндо. Войнав понгсь ансяк 1945 иестэ, зярдо Дальней Востоксо Япония марто ушодовсь войнась. Симдяновонь кучизь тов военной корреспондентэкс. Велявтсь мекев ансяк 1961 иестэ. Мештесэнзэ понгавтозельть Якстере Тештень кавто ордент ды зярыя медальть. Мейле макссть тензэ эштё Отечественной войнань 2-це степенень орден.

1937-1941 иетнестэ Николай Михайлович тевень апак кадо тонавтнесь. В. В. Воровский лемсэ Журналистикань Коммунистической институтсо (Ленинград). Войнадо мейле сон прядсь марксизмань-коммунизмань чокшнень университет. 1945 иестэ саезь 1961 иес важодсь СССР-нь Военно-воздушной вийтнень газетатнесэ специальной корреспондентэкс. 1959 иестэ совась Россиянь Журналистэнь союзс.

Войнадо мейле сеске Николай Михайловичнень савкшнось вастневемс Германиянь журналисттнэнь марто, конат важодсть «Новая Германия» газетасо. Сонсь Н. Симдянов ульнесь Лейпцигсэ СССР-нь Военно-воздушной вийтнень специальной корреспондентэкс.

Зярдо велявтсь Саранскоев, саизь важодеме «Эрзянь правда» газетав. 1962 иень июньстэ сонзэ аравтызь партийной эрямонь отделэнь прявтокс. Кода ледстнить журналистт-ялганзо, Николай Михайлович эрясь свал войнань шкань вешематнень коряс. Максозь эрьва тевенть топавтылизе шкастонзо, маштсь эсензэ пельде кевкстеме, текень вешсь мартонзо важодицятнень пельдеяк. Шкань ютазь тень кис весе тензэ ёвтыльть сюкпря. Се, мезентень тонавтсь од журналисттнэнь Николай Михайлович, мейле пек маштовсь тенст эрямосо.

Сёрмадсь сон свал ламо, корреспонденциянзо, статьянзо, зарисовканзо алтавсть партиянь темантень. Теде башка, Николай Михайлович покш мель явсь фронтовиктненень. Эрямонзо перть сон сёрмадсь сядот очеркть ды зарисовкат тиринь масторонь ванстыцятнеде, бажась лембе валсо эждемс войнасо томбазь седейтнень. Пек мелявтсь сень коряскак, кодамокс касыть войнадо мейлень эйкакштне, секс, нать, ламо материалонзо алтазь од ломантнесэ патриотизмань ёнкстнэнь кемекстамонтень. «Токшесь» нравственной лия проблематкак, эсензэ сёрмадовкстнэсэ тердсь од ломантнень бажамс седе ламонь содамо, улемс анококс тиринь масторонть ванстомо.

Весе, кинень савкшнось важодемс Николай Михайлович марто, эйстэнзэ ледстнить пек лембестэ. Сон маштсь муеме вейсэнь валт эрьва марто, содась, кинь марто мезде ды кода кортамс. Секскак журналистэнть сёрмадовксонзо явовтыльть мель, сынст ловность мельспаросо.

«Эрзянь правдасо» ламо иеть важодеманзо перть сёрмадсь а вейке тёжа материалт – очеркть, статьят, репортажт, фельетонт ды лият. Военно-патриотической темась ды неень шкань эрзянь велесь – вана кодамо ёнкс кирдсь творчествасонзо. Кучнесь сёрмат минек масторонь областень ды региононь военкоматтнэс, войнань архивтнес, вешнесь Мордовиясто саезь воинтнэнь, конат кулявтомо ёмасть войнасонть. Н. Симдяновонь важодеманзо вельде «Эрзянь правдась» аволь весть ульнесь военно-патриотической тематикань коряс Всесоюзной творческой конкурсонь лауреатокс. Пек паро статьят сёрмалесь велень ломантнеде, сынст а шожда тевдест ды эрямодост.

Николай Михайлович Симдянов од шкава ютызе малав весе минек масторонть, пек ламо несь. Вастневсь партизанонь отрядонь содавикс командирэнть Сидор Евстигнеевич Ковпак марто, учёноенть Отто Юлианович Шмидт, немецень сёрмадыцянть Анна Зегерс марто. Мордовиянтькак ютызе нучк-пачк. Эрьва командировкасто ускиль зярыя материалт, фотографият, снимсесь сонськак. Лиясто сонзэ корреспонденциятне ульнесть пек пштить, корязост примсевсть решеният, витевсть асатыкст. Се шкань журналистикась самай тенень бажаськак: лездась паро койтнень эрямос совавтомантень, зыянов ёнкстнэнь изнямонтень.

1971 иестэ Н. М. Симдяновнень максозель МАССР-нь культурань заслуженной роботникень лемесь.

Седе тов, журналисттнэнь ды писательтнень ютксо яволявтозель пелькстамо военной темас очеркень сёрмадомань коряс. Н.Симдянов сёрмадсь ламо ды покш материалт. 1994 иестэ самай те цикланть кис Н. М. Симдяновнень максозель Мордовия Республикань Госпремия.

Тешкстама седеяк, Симдяновонь кедьсэ сёрмадозесь течияк ловнови истя, прок буто ансяк сёрмадозь.

Н. Симдянов кулось 1998 иень августонь 11-це чистэ.

Г. Евстигнеева,

А. И. Полежаев лемсэ

музеень важодиця.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».