Тедедень сентябрянь 17-18-це читнестэ Саранскойсэ Мордовэкспоцентранть юрсо карми «Тев» раськень промыслань ды ремеслань регионъютконь фестивалесь. Сон алтави Россиясо Раськень культурань сюпавчитнень иентень.
Фестиваленть шкасто кармить важодеме зярыя площадкат: раськень промыслатнень ды ремеслатнень выставкась, кедьчелькевтнень пельде мастер-класст, «Поет село родное» велетнень фольклорной коллективтнень фестиваль-пелькстамо, «Национальный костюм на подиуме» оршамопелень пелькстамо-невтема, «Цёмарат» раськень ярсамопельтнень невтема, «Добрых рук мастерство» книгань регионъютконь выставка, «Народные художественные промыслы: перспективы развития» морга экшсэ кортамо.
Мордовэкспоцентрань скверэсь карми вадря оймсема таркакс покштнень ды вишкинетнень туртов. Эйкакштнень туртов арсевить «Народные игры и забавы» налксематне.
Раськень промыслань ярмункасонть эсь ёрокчист невтьсызь Равчирень 14 субъектэнь, Мордовия Республикань муниципальной 22 райононь ды Саранск ошонь кедьчелькевтне. Фестивальсэнть кармить раськень оршамот, пухсто теевкст, чувто ланга артома ды керсема, коцтсто теевкст ды някат, илёвсто, гигерьстэ, ленгестэ теевкст ды ламо лия мезе, косо эрьва регионось невтьсынзе эсь промыслатнень ды ремеслатнень, конатнесэ пачтяви эсь тиринь ёнксонь лия ёнов а молиця культурань сюпавчись.
Тешкстасынек, Мордовия Республикань Ояксчинь кудонь «Тев» раськень промыслань ды культурань регионъютконь фестиваль» проектэсь лиссь изницякс Россиянь Культурань фондонь грантонь пелькстамосо. Ды тевс нолдави «Культура» национальной проектэнь «Творческие люди» федеральной проектэнть лувсо.
Проектэнть топавтомасо лездыцятне – МР-нь Культурань, раськень политикань ды архивень тевень министерствась, МР-нь Раськень творчествань кудось, Финнэнь-угрань раськетнень Равчирень куншкакурось.