«Кода чачи морось?» – кевкстимим весть вишка цёрынем. Сестэ мон толковия тензэ истя: «Улить ломанть, сынст лемест композиторт. Морось васня чачи сынст превсэ, ды мейле сёрмадсызь те моронть нота лангс».
Ансяк шкань ютазь карминь чарькодеме: морось чачи васня аволь превсэ-удемсэ, сон чачи седейсэ. Зярдо седеесь чаво, эйсэнзэ мезеськак а талновты, зярдо а мари лиянь сэредькст ды ризкст, се ломанесь илязо терявтне моронь сёрмадомо – мезеяк сонзэ а лиси. Улемс композиторокс – те маштомс эрямонть чарькодеме, мазычинть редямо, лиятнень туртов кенярксонь каземе. Те – улемс азорокс эсеть ойменть лангсо, чарькодемс лиятнень потмо ёжост, маштомс сыремтемс седейсэст эрямонтень вечкема ды кемема.
Эсь моросонзо машты
сыргозтеме мазый, лембе ды кенярксов ёжомарямот
Панжи, панжи лайме порась
Веле песа эрь тунда.
Ожу, ожу мазый мора
Порать колга ушедан.
Вай! Вай! Вай! Вай!
Порать колга ушедан.
Саты ансяк марямс вейкине те моронть ды эрьвась ёвтасы, кие сонзэ сёрмадыцясь. Те – Нина Васильевна Кошелева. Сон теевсь алкукс весе раськень (рузокс – «народной») композиторокс ды содасызь аволь ансяк минек республикасо, масторонок келес ды сонзэ томбальга. Содасызь ды вечксызь. Ды кода а вечкемс ломаненть, кона эсь моросонзо машты сыргозтеме истят мазый, лембе ды кенярксов ёжомарямот, кармавты стувтомо апаро ды стака мельтнень-арсематнень, кемеме эрямонтень ды эсь уцяскантень? Весе миненек эряви модас сюконямс тензэ се покш сюпавчинть кисэ, кодамо кандсь сон минек раськень культурантень. Ды, меремс, сонензэ а лотксить сюконямодо. Эрьва косо ёвтыть тензэ певтеме сюкпрят, шнамонь ды вечкемань валт, сондензэ секе-тев сёрмалить газетасо ды журналсо, невтнить телевизорсо. Весе эрямонзо, кода мерить, изызь-сокизь нучк-пачк. Эсь шкасто монгак терявтыя сёрмадомс те валдо ойме, виев ды кеме обуця авадонть.
Те композиторонть шкинеманзо марто васенцеде «эшкевинь» книганзо презентациясо, конань нолдызе Мордовиянь книгань издательствась 1994 иестэ. Лемезэ – «Марик монь мором». Содась-эзь Нина Васильевна сестэ: моронзо марязельть уш умок ды морсесть аволь ансяк ськамонь-ськамонь, морсесть столь экшсэ аштемстэяк, вейс пуромозьгак. Книгань презентациянть молемстэ, косо «Панжи лайме порась» моронть серьгедизе сонсь авторось, сонензэ лездась весе залось. Седеяк лембестэ вастозель А. Доронинэнь валонзо лангс «Лавсень морось». Тень эрявсь неемс ды марямс!
Мордовия Республикань гимнань сёрмадыця
Сестэ уш превезэнь сакшность истят мельть-арсемат: седе паро композитор минек республикасо арась. Шкань ютазь неть арсематне седеяк кемекстасть. Эно, меремс, лия композитортнэяк аволь аламо тейсть ды теить минек раськенть музыкальной искусстванзо сюпалгавтомга. Саемс Г. Сураевень-Королёвонь, Г. Вдовинэнь, Н. Митинэнь, М.Фоминэнь, В. Родионовонь ды лиятнень. Сынст ламо произведенияст пингеде-пингес совасть республикань музыкальной искусствань сырнень фондс. Ды ялатеке Нина Васильевна Кошелева, монень маряви, икельдинзе весень. Тень кемевтемга саты ледстямс 1995 иенть, зярдо республикань композитортнэ пелькстасть Мордовиянь Гимнанть уцясканзо кисэ. Вейксэ композитортнэнь ютксто изнясь Н. Кошелева (гимнань валтнэ С. В. Кинякинэнь).
Нина Васильевнань мельс сеедьстэ ледни Казанень консерваториясо тонавтыцязо Б.Н. Трубин. Композитор, профессор, СССР-нь народной артист – те ломанесь сонензэ ульнесь сехте малавикс оякс, кона тонавтсь эйсэнзэ аволь ансяк нотань содамо ды моронь ладсеме. Тонавтсь эрямосо стакачитнень цидярдомояк. Эрямось – аволь тантей калаця, конадо ярсат ды а пешкедят. Лиясто кирьгапарезэть ёртыть истямо апаро сэпе – а сельгемс сонзэ, а нилемс. «Ульть анок цидярдомс эрьва мезенть», – кортась тонавтыцязо. Ды Нина Васильевна эрямонзо перть снартни а нолдтнемс кедть, а максомс пря натой сестэяк, зярдо эрямось лепштясы истя, маряви, вийтькак тензэ а косто саемс.
Васенце моронзо алтызе тиринь аванстэнь
Эрямо кинзэ а ловсак шождакс. Пирявкстнэ-стакачитне вастневсть икелензэ, маряви, эрьва эскельксэнть теемстэ. Ой ды велькс потсо эзь саво тензэ «экшелямс» эйкакшпингестэяк ды мейлеяк.
Сон чачсь Сыре Шайговань Вертелим (Вертельма) велесэ. Аванзо сисем эйкакштнень ютксто сон ветецель. Велень вишкине ды олгосо вельтязь кудост свал пешксель эйкакшонь вайгельде. Ней Нина Васильевнанень эстензэяк стака ёвтамс, кода сестэ кеменнест (мартост эрясь бабазо) кельгсть кудозост, косо ульнесь ансяк вейке чувтонь коник. Тосо удсесть тетязо-авазо. Эйкакштнень удома таркаст – каштом лангось ды кияксось. Васенцеде чевте тарка лангс Нина Васильевна мадсь Саранскоень школасо-интернатсо, ков авазо ускизе тонавтнеме. Те сон, Евгения Гурьяновна, васенцекс редизе тейтерьсэнзэ морамонь ёрокчинть.
Саранскоев самось Нинань туртов васня марявсь ёвксонь кондямокс. Ошось, косо весемесь ульнесь аволь истя, кода эсензэ велесэ, дивавтнесь ды секе шкане тандавтнесь эйсэнзэ. Ёвксось прядовсь, зярдо авазо кадызе ськамонзо, – тусь кудов. Нина, теке вирьстэ кундазь нумолнэ, кувать эзь тонадо интернатсо эрямонтень. Читькак, ветькак сон тердсь аванзо. Тодовось эзь коськенекшне сельведтнеде. Свал мельсэнзэль тиринь кудост, патянзо-ялаксонзо ды авазо, конанень алтызе васенце произведениянзо. Сёрмадызе сонзэ нилеце классо тонавтнемстэ ды лемдизе «Авай». Сестэ аванстэнь ульнесть 82 иеть. Нина Васильевнань седейсэнзэ нейгак эри тейтерень вечкемась. А стяко эсь моросонзояк, конат алтавсть «тядянстэнь-панчфкянстэнь», путсь весе седей лембензэ, вечкеманзо:
Авай, авай, авинем,
Чивалдынем, ойминем,
Чевте таркань ацыйнем,
Валдо ононь сёлминем.
С. Кинякинэнь валонзо вельде пшкалесь сон аванстэнь ды видькстась: «Тон весемеде мазыйнем».
А стувтни сон тетядонзояк. Василий Емельянович фронтовикель. Ютазь войнасо ятонть каршо тюремстэ ранязель ды, кудов велявтозь, эрямонзо перть важодсь колхозсо.
Зярдояк эзизе стувтне вечкевикс тевензэ
Школанть-интернатонть прядомадо мейле Нина поладызе тонавтнеманзо Л. П. Кирюков лемсэ музыкальной училищасо. Тесэ ушодовсь сехте мазый шказо – одкспорась, конась, кода тундоськак, свал канды талномат, кеняркст, лиясто сельведтькак. Нина тесэ васенцеде кармась марямо прянзо од тейтерекс. Чова рунго, сон мольсь цеця ёнов, конань ансяк-ансяк кармасть панжомо лопинензэ. Зярдо сравтылинзе товзюро тюсонь черензэ, сынь сатыльть карксамонзо видьс. Вейкеяк цёра а ютыль ваксканзо, ёнонзо апак варшта ды мизолксонь апак казе.
Сонсь Нина Васильевна визди ды а вечки ёвтнеме, кодамоль од порасто. Тень таркас теде парсте кортыть фотографиятне. Эйсэст Нина теке од килейне. Иетне, чарькодеви, эсензэ саить. Ды ялатеке Нина Васильевнань сынь аволь пек полавтызь. Мизолксозо чевте, молевксэзэ шожда. Ансяк сельмесэнзэ кармасть редявомо сиземань сулейть. Стакачитне-мелявкстнэ, нать, а ютыть стяко, сынь кадыть тешкст чачосояк, сельметнесэяк.
Сестэ, одпорасто, Нина эзь арсе мездеяк. Седейсэнть тундоль. Сон тердсь ялга юткс, киштема-морамо таркав. Нина, кода весе тейтертне, яксесь эрьва ков. Ансяк зярдояк эзизе стувтне музыканть. Тонавтнесь седямо фортепьянасо, сёрмадсь эсензэ произведеният, конатнень налксесь училищасо-косо ютавтневиця концерттнэсэ. Юткошкасто вечкиль ловномо книгат. Покш мель кармась явомо эрзянь-мокшонь фольклоронтень. Мейле те пек лездась тензэ шкинемань кинзэ ладямсто.
Покш шкинемантень кись панжозель Казанень консерваториясо тонавтнемстэ
Кавто иеть макссь Сыре Шайговань музыкальной школантень, косо тонавтсь музыкань чарькодеме пакшат ды тонавтнесь сонськак. Юткошкасто морсесь авань ансамблясо ды яксесь киштемань кужов. Мелесь туемс тонавтнеме Казанень консерваторияв сась аволь апак учо. Нина чарькодсь: се, мезе макссть тензэ музыкальной училищасо, а саты теевемс паро композиторокс.
Казанень консерваториясо тонавтнемадонзо Нина Васильевна ледстни покш мельсэ.
– Те ульнесь алкуксонь школа, косо тонавтсть эсь тевень содыця ломанть. Весемеде ламо мартон озясь Борис Николаевич Трубин. Валсояк, тевсэяк тень лездась консерваториянь се шкань ректорось Назиб Гаязович Жиганов.
Тевтне тусть. Ансяк, виде, а истя шождасто. А лиси паро композитор се ломаненть эйстэ, кона а машты марямо моронь гайть леень шольнемастонть, увны вармастонть, тошксиця чувтотнестэ ды вень менельсэ налксиця тештетнестэ. Бути а марясы, кода чикорды пильге ало ловось ды кольгить тунда солыця эйзюротне. Нинанень те максозель, улема, Пазонть пельде. Сон вишкинестэяк, покшсто касозьгак мезе мариль – путылизе превс. Кармась варчнеме-терявтнеме шкинемань виензэ. Ушодсь кезэрень моротнестэ, кармась сынст «ванськавтомо-валакавтнеме». Вана косо сюпавчись! Минек покштятне-бабатне содасть, кодашка ине вий канды морось, секс явсть тензэ покш мель ды ванстсть эйсэнзэ, кода эсест сельмест. Кода кшивтеме арась эрямо, истя моровтомояк. Сон чачськак ломаненть марто вешкасто ды свал ульнесь тензэ паро оякс. Стака шкатнестэ макснесь вийть, оймавтнесь ризкстнэнь-мелявкстнэнь эйстэ, эждясь паро ды шожда читнестэ, казнесь тензэ кеняркст. Моронть питнейчизэ а ёми зярдояк. Шкань ютазь Нина Васильевна сёрмады «Мокшонь свадьбантень» музыка. Сёрмадомс сёрмадсь, путомс ульнесь а кинень – арасель эсенек оркестранок. Кувать сонзэ кияк эзизе морсе. Эйстэнзэ ансяк кой-кона пелькстнэ совавтозельть «Умарина» ансамблянть репертуарс.
Теде икеле сон сёрмадызе сехте покш произведениянзо – те «Алёна Арзамасская» балетэнь сюитась, конань коряс идизе дипломонзо. Сёрмадомазо а шождаль. Алёна Арзамасская авась кадык содавикс (сон Степан Разин марто тюрсь урексчинть каршо ды Жанна д Арк ладсо пултазель толбандя лангсо), ялатеке невтемс обуцянзо музыка вельде Кошелевадо икеле эзь ушоле кияк.
Те сюитадонть башка Казанень консерваториясо тонавтнема шкасто Нина кенерсь сёрмадомо ламо лия произведеният: скрипкань туртов квартет, оркестра марто кларнетэнь туртов концерт (колмо пельксстэ) ды лия морот. Покш шкинемантень кись панжозель. Ней ансяк мольть ды мольть эзганзо.
Шкинемань паргозо потмакстомо
Ды Нина сыргась. Апак эрязкале, эскельксэнь эскелькс сон мольсь эсензэ тёкшонтень. Иестэ иес яла келейгадыль ды сюпалгадыль сонзэ шкинемань паргозо. Сёрмады морот, фортепьянань пьесат, театральной спектаклятнень туртов музыка, кантатат, ораторият, ськамост морыцятнень туртов фонограммат. Ды истя – чистэ чис.
Ней творчествань паргосонзо таштавсть а лововитькак зяро морот. Ды аволь кодаткак, конатнень весть марясыть ды стувтсыть. Сынь теке эрексиянь кондямо ванькс ведь, конадо ков седе ламо симат, тов седеяк а яви симемат. Седеень апак тално а кунсоловить истят моронзо, кода «Вирь», «Шуди Мокшась», «Кода кельгононькшнень», «Маень вальс». Неть ды ламо лия моротне сёрмадозь кассета лангс. Сынст морсить Мордовиянь содавикс морыцятне Н. Спиркина, Н.Маркова, А. Атласова, Г. Макшева, И.Учватова, С. Плодухин, Л. Ганина ды лият.
Композиторось ламо теи национальной театранть туртовгак. Сёрмадсь музыка ламо спектаклятненень. Пек парсте вастозель «Песнь о воинской славе» ораториясто «Тетядо лайшемась», кона ловозель раськень коень-кирдань моротнестэ сехте неявиксэкс ды сехте питнеекс, кода «Минек масторсо» триптихеськак.
Мезе илязо сёрмадо, музыканзо а човорясак лиятнень марто: артозь эсензэ тюссо, эйсэнзэ марявить ансяк эстензэ ладиця гайтть.
Бажамонзо певтеметь
Нина Васильевнань бажамонзо певтеметь. Сон а стувтни одтнэдеяк. Кода иля корта, од ломантнень эсест морост. Сынст оймест ней а рамасыть кезэрень лужаня моросо, а кармавтсыть кунсоломо натой истят покш композитортнэнь произведениясткак, кода Л. Бетховен, В. Моцарт, Ф. Шуберт, Дж. Верди, Ф. Лист ды лият. Кода сыремтемс од ломантнень седейсэ тиринь келентень вечкеманть, бути сынь чистэ кунсолыть некеть моротнень, косто «ай лав ю» ды «гуд бай, май френд, гуд бай» валтнэде башка превезэст мезеяк а озы? Весе чарькодить, эрявить эсенек морот, конатне туильть од ломантнень ды эйкакштнень мельс. Меельцетнень туртов Нина Васильевна сёрмадсь зярыя морот В. Мишанинань, Г. Гребенцовонь, А.Доронинэнь, А. Араповонь, А. Ежовонь ды лия поэттнэнь валморост лангс. Вешнемс ды муемс моронь жанрат, конатне вечкевельть од ломантненень, седе стака. Астяко минек композитортнэ аволь пек сеедьстэ кенярдовтыть истямо моросо. Нина Васильевна бажи витемс те асатыксэнть.
Лиясто пеняцить лангозонзо, келя, седе ламо сёрмады морот мокшонь кельсэ валморо лангс. Паряк, истяяк. Сон – мокшава, ды эсензэ келесь тензэ седе малавикс. Рузонь, эрзянь кельтнесэяк моронзо улить ды сындест аволь аламо. Сынсткак Нина Васильевна сёрмады покш мельсэ. Лиясто стака муемс паро валморот. Савкшны эстензэ пшкалемс поэттнэнень. Сестэяк чуросто-зярдо марясызь пшкадеманзо.
Нина Васильевна кенерькшни тееме ламо лия тевтькак. Васняяк лезды од морыцятненень, композитортнэнень. Кеме ояксчисэ эри А. С. Пушкин лемсэ раськень библиотеканть ды ламо лия организациятнень марто. Эсь шкасто ламо яксесь велева, школава. Ульнекшнесь ламо таркава, пачколесь зярыя омбо масторовгак. Сеть якамотне макссть тензэ «кши» од моронь сёрмадоманть туртов. Кудов велявтозь, композиторось сеске озыль сынст сёрмадомо. Нота лангс путозь од морось – те зярс аволь моро. Сон карми морокс сестэ, зярдо марясызь кунсолыцятне. Тень туртов эряви васняяк муемс паро морыця, гармониясо-баянсо седиця. Бути арсят моронтень максомс седе кувака эрямо, сонензэ васня эряви теемс аранжировка, сёрмадомс кассета эли видеоплёнка лангс. Седеяк паро ули – нолдамс книга. Кода тень теемс, зярдо минек свал яла арасть ярмаконок. Косто сынст саемс? Нина Васильевна Кошелеванень, Мордовиянь Гимнань сёрмадыцянтень, Д. Шостакович лемсэ конкурсонь ды Россиянь Композиторонь союзонь лауреатонтень, МР-нь искусствань заслуженной деятелентень, МР-нь народной артисткантень сеедьстэ эстензэ савкшны вешнемс спонсорт ды сынст ярмак лангс ютавтнемс шкинемань чокшнеть, презентацият, сёрмадомс кассетат, нолдамс моронь пусмот («Марик монь мором», «Вирень моро»).
Чачсь весемеде валдосто палыця теште ало
Вана истя эри те авась ды карми эрямо свал. Сон а машты лиякс. Кундат тевс – теик парсте ды педе-пев, – истямо эрямонь коезэ. Мезесь а лиси, кадсы мейлес, шкань ютазь таго кунды эйзэнзэ. Озны Пазонтень сень кис, вакссонзо паро мирде, кона лезды изнямс весе стакачитнень. Мирдезэ Николай Васильевич Немечкин алкукс паро, мелень ваныця, оймень витиця. Сондензэ лади сёрмадомс очерк ды аволь вейкеяк. Медицинань наукань кандидат, весе эрямонзо алтызе лецямонь тевентень. Сон – эрзянь цёра, чачсь Пенза ёнксонь Шемышейской буень Захарвелесэ. Школанзо прядомадо мейле (прядызе медаль марто) сась тонавтнеме Саранскоев, косо ансяк-ансяк панжизь медицинань факультетэнть. Н. В. Немечкин – хирург.
Пазось, нать, мерсь вастовомс мокшонь стирентень ды эрзянь цёрантень ды вейсэндямс уцяскаст. Сынь вейсэ малав 50 иеть. Ды нейгак пшкалить вейкест-вейкест туртов ансяк чевте валсо, нейгак сельмесэст редясак се вечкеманть, конась а кулы зярдояк. Трясть-кастсть кавто эйкакшт, ней седей лембест максыть нуцькаст туртов.
…Кортыть, эрьва ломанесь чачи эсензэ теште ало. Кодамо тештесь, истямо ломанеськак. Бути тештесь чеввалдо ладсо типельди менель чамасонть, сонзэ ало чачозь ломанеськак эри ансяк эсензэ кисэ – а лезэ пельдензэ, а кеняркст.
Лия тештетне палозь палыть, валдосост мазылгавтыть весе пертьпельксэнть ды тол лембесэст эждить вакссост эрицятненьгак. Сынст ало чачозь ломантне теить эрямонок седе валдокс ды мазыекс. Нина Кошелевань тештезэ весемеде валдосто палыця тештетнень ютксо.
Раиса Щанкина