Четверг, марта 28, 2024
Важное

Сундерьковонь 17-це чистэ профессиональной кенярксчист тешкстызь участковойтне. Сынст тевест покш ды эрявикс, сынь кеме сюлмот кирдить эрицятнень марто ды весементь содыть эсь участкань эрьва ломанденть, эрьва семиядонть. Ды миньгак, эрицятне, лисиця эрьва зыянов тевстэнть пшкадтяно сыненст, участковойтненень.



Полициянь майорось Сергей Надин внутренней тевень органтнэс служамо сась сеске Мордовиянь государственной пединститутонть прядомадо мейле, косо тонавтнесь «История и право» специальностенть коряс, ды вана уш кеветее иеть важоди участковоекс.

Ней Сергей Кузьмичень участкасо ламо квартирас 22 кудот, косо целанек эрить малав ниле тёжат ломанть, теке марто кото эрицят, кить судязь условна, колмо – эсь семияст марто тюрицят, ниле – эйкакшт, конат аштить учётсо кемгавксово иеде седе вишкинетнень тевест коряс подразделениясонть, наркологической диспансерсэ учётсо – вейке аштиця, истя жо эйдень кужо, церькова, зярыя организацият ды лавкат.
Важодемань эрьва чинть – сеске Саранск ошонь УВД-нь 3-це номер полициянь отделсэнть планёркадонть мейле – Сергей Кузьмич ушоды эсь территориянть ванномасто. Корты эрицятнень марто, ютавты профилактикань роботанть ды шкань апак ёмавтне панжи закононь коламотнень.

Вейке истямо читнестэ сэтьмечинть мельга ваныцянтень пшкадсь цёра ды ёвтнесь, сонзэ тетянзо-аванзо саласть ярмакт. Участковоенть эрязасто ды вадрясто важодемась лездась панжомс лисезь тевенть ды пурнамс чумондовицянть лангс весе эрявиксэнть. Истямокс лиссь авась, кона яки сыре ломань мельга. Аламодо теде икеле, истя жо эрицятнень марто кортамсто, старшей участковоесь Сергей Надин панжсь эштё зярыя саламот ды лавкань микшницянть чавомасо тандавтнемань тев.

Эряви тешкстамс, тедеде Мордовиянь полициянь участковой уполномоченнойтне ливтсть 1185 ды панжсть 1289 закононь коламонь тевть, лоткавтозь правань 13536 административной коламот, профилактикань важодема ютавтозь 4687 ломантнень марто, конат аштить учётсо внутренней тевень органтнэсэ. Те пек покш робота ды аёвтавикс путовкс республикань эрицятнень сэтьмечист ванстомасо.
Полициянь майорось Сергей Надин весе седейстэ ёвты лембе поздоровт эсь коллегатненень полициянь участковой уполномоченнойтнень кенярксчинть кувалма! Арси закононь а колыця эрицят эсь участкатнесэ ды сэтьме чить, вадря служба ды уцяска семиясо!

Анокстызе Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».