Репортаж «ООО МАПО и К» ТНВ-нь паксятнестэ
Весе содатано, велень хозяйствасо важодицятнень туртов оймсема шкат а эрсить. Сынь трудить эрьва чистэ. Эзть кенере прядовомо видемань тевтне, вана уш ушодовсь ракшатнень туртов теленень тикшень-сенажонь анокстамось. Васняяк ледить-пурныть ламо иень тикшетнень, а фатяткак, кода мельгаст кенерить веиенсетнеяк, конатнень истя жо эрявить пурнамс шкастонзо.
Неть читнестэ минь ульнинек инжекс Ромодановань райононь «ООО Мордовское агропромышленное объединение и компания» ТНВ-сэнть. Тешкстасынек, «ООО МАПО и К» ТНВ-сь – Мордовия Республикань велень хозяйствань покш предприятиятнестэ вейкесь. Неень шкасто сон важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь енкстнэсэ. Те хозяйстванть прявтсо уш ламо иеть важоди ероков, эсензэ тевензэ содыця ды алкуксонь аграрникесь Николай Всеволодович Ютяев, кона домкасто тенек евтнесь, кода молить тевтне сынст хозяйствасонть. Николай Всеволодович кортась, важодемась предприятиясонть лаказь лаки. Тундонь видемань тевтне топавтозельть шкастонзо ды вадрясто, эдь прявтонть вановтонзо ало важодить алкуксонь специалистт, ломанть, конатне весе виест путыть велень хозяйствасо важодемантень. Секскак Николай Всеволодович а талны, соды, истямо неже марто хозяйстванть тевензэ свал кармить ютамо икелев.
Эряви евтамс, «ООО МАПО и К» ТНВ-нть юрс совить зярыя отделеният: Пятинань, Вишка Березникень, Кочуновань (Ромодановань район) ды Эрьмезенкань (Чаунзань район). Кода тешкстась прявтось, неень шкантень важодемась ветяви весе отделениятнесэ. Зярс ушосонть маней ды пси, эряви кенеремс анокстамс тикшетнень.
Истя, Николай Всеволодович тердимизь эсенек сельмесэ варштамс, кода молить тевтне хозяйствань паксятнесэ. Ды минь шкань апак таргсе сыргинек килангов – Пятина велень отделениянь паксясо важодицятнень марто вастовомо.
Паксясо улемстэ рединек, кода техникась пурнась ламо иень тикшенть сенажокс. Хозяйствасонть весемезэ видезь 4 тежат гектарт ламо иень тикшеть. Васенце ледевксэсь юты сенажокс. Паксясонть важодить ниле косилкат, коромонь урядамонь колмо комбайнат ды сенажонь усксиця зярыя КамАЗт.
Васняяк вастовинек ды кортнинек предприятиянь прявт агрономонть Николай Арсентьевич Сараев марто, кона важоди те хозяйствасонть малав 35 иеть. Николай Арсентьевич чачсь-кассь Рузаевкань райононь Палаевка велесэ. Тетязо ды авазо пингест перть важодсть колхозсо. Секскак Николай вишкинестэ саезь содасы моданть лангсо важодемань танстенть. Школасо тонавтнемстэ церась роботась тетянзо марто комбайнасо лездыцякс. Шкань ютазь, кавксоце классо тонавтнемстэ, сонсь уш озась комбайнань руль экшс. Церась евтни, кода 1987 иестэ сон сайсь васенце тарка комбайнасо вадрясто пивсэманть коряс пелькстамосонть. Сеть шкатнестэ эште ветявсть истят пелькстамот, ней уш те весемесь стувтовсь. Школанть прядомадо мейле Николай тонавтнесь Н. П. Огарев лемсэ Аграрной институтсо. Тонавтнемадо мейле сась важодеме «ООО МАПО и К» ТНВ-нь хозяйствас.
– Зярдо сынь тей роботамо, вадря нежекс ды тонавтыцякс тень ульнесь Николай Всеволодович Ютяев. Сон сестэ эште прявт экономистэль. Превс путоманзо ды тонавтоманзо нейгак мельсэнь кирдян, – евтни агрономось.
Эряви меремс, Николай Арсентьевичень ули семиязо. Вана уш малав 40 иеть, кода Николай нинзэ марто эрить вейсэ, важодить ды эрьва чинтень вейсэ кецнить.
Седе тов малазонок сась хозяйствань прявт инженерэсь Максим Александрович Коробков. Сон важоди те предприятиясонть вана уш кемень иеть. Церась Чаунзань райононь Покш Эрьмезенка велестэ. Велень хозяйствань тевтнесэ лаки эйкакш порасто саезь. Секскак институтонть прядомадо мейле кочкизе те важодемань енксонть, эдь лия таркасо прянзо а неи. Од ломаненть ули семиязо. Ангелина нинзэ марто кастыть кемень иесэ церынькаст, конань туртов уш нейке вечкевить велень хозяйствась ды техникась.
Мейле кортнинек техниканть лангсо «инязортнэнь» марто, конатне важодить коромонь урядамонь комбайнатнесэ. Цератне роботасть Пятина веледенть аволь васоло. Вейке RSM F 2650 неень шкань агрегатонть руль экшсэ важодсь дока ды тевензэ вечкиця комбайнерось Александр Николаевич Кемаев. Велень хозяйствасо сон важоди малав 31 ие. Чачома тарказо – Отяжелень райононь Трокс Кужо велесь.
– Велень хозяйствань тевтнес чопавтинь армиядо мейле. Важодемась пек тусь мелезэнь. Васня роботынь Отяжелень райононь хозяйствасо, зярдо урьвакстынь, нинть марто сынек эрямо Ромодановань райононь Лыковщина велев. Ним, Надежда, эрямонзо перть важоди «ООО МАПО и К» ТНВ-нь бухгалтериясо. Минь весе оймевиенек путтано тесэ важодемантень, – мельспаросо евтни комбайнерось.
Мейле кортнинек Юрий Александрович Жаринов марто, кона важоди машинань ветницякс. Эсензэ трудовой кинзэ церась ушодызе «Мордовколхозстройсэ», седе тов зярыя иеть роботась Саранскоень заводсо ды вана 1982 иестэ пачкодсь те хозяйствантень ды неень шкас важоди тесэ, ускси сенаж.
– Важодемань вейкеяк чись а юты истяк аштезь. Минь трудятано ломантнень лезэс. Тесэ важодеме ушодынь автобусонь ветицякс, зярыя иеть усксинь скалонь потявтыцят, седе тов озавтымизь сюронь урядыця комбайнань руль экшс. Механизаторокс важодинь котошка иеть. Мейле таго карминь важодеме машинань ветницякс. Те тевенть лия лангс а полавтса, – тешкстась Юрий Жаринов.
Николай Всеволодович Ютяев, паксянь тевтнеде башка, содавтымизь сенажонь пештямонь латкотнень мартояк. Истя жо прявтось евтнесь, сенажонть теемстэ комбайнатнес каить биотроф добавканть, конась вадрялгавты коромонть составонзо. Истямо добавка марто сенажсонть карми седе ламо лезэвчи ды ракшатненень эрявикс витаминт.
Эряви меремс, сенажонь анокстамонь тевесь а шожда. Эдь бути сенажонь пештямось-каямось тееви эрявикс лувонть апак кирде, ракшатне кадовить коромтомо. Ледезь тикшесь зярыя шкань ютазь сырги ды чапаськады. Секскак ансяк стака техникасо сон седе вадрясто матрави ды калгодкстомтови. Сенажонь пештямонь латкотнесэ важодсть колмо тракторт. Вейкенть руль экшсэ роботась ероков механизаторось Иван Иванович Солгунов. Церась – эрзя. Чачсь Отяжелень Сабанцеле велесэ. Эште школасо тонавтнемстэ ушодсь важодеме тиринь велень колхозсо, лездась тетянзо туртов комбайнасо. Седе тов, армиядо мейле, кармась важодеме механизаторокс. Кода урьвакстсь, Людмила нинзэ марто састь эрямо Ромодановань районов. Цераст вана уш 35 иеть важоди те хозяйствасонть, низэ жо – школасо. Сенажонь теемань шкастонть Иван Иванович важодсь Fendt 816 тракторсонть.
Целанек «ООО МАПО и К» ТНВ-нь хозяйствасонть тевтне молить вадрясто. Весе эрявикс техникась ули, важодицятне роботыть паро мельсэ ды весе тевтнень теить шкастонзо.
Алена Артемьева