Эрьва иестэ Республикань Культурань кудосо ютавтови «Шумбрат, Мордовия!» раськень шкинемань республикань фестивалень-пелькстамонь лауреаттнэнь ды дипломанттнэнь Гала-концертэсь. Кавонест этажтнень фойесэнть свал невтеви «Мастерство земли мордовской» декоративно-прикладной ды изобразительной искусствань выставкась.
Покштянзо-бабанзо пельде
Ицяло ёнксонь Селища велень Спиридоновтнень буесь (Надежда Ильиничнань тейтерьксэнь фамилиязо) ламо ёнксонь коряс явовсь тосонь лия эрицятнеде. Сынст покштятне-бабатне васняяк ульнесть ламонь содыцят, тевтеме тунь а аштицят, Пазнэнь кемицят. Кудазортнэнь кардазост пешксель ракшадо: скалт, вазт, лишметь, реветь… Цёратне маштсть мельгаст якамо, пельдест лезэнь саеме. Мезесткак стяко эзь ёма, весементь тевс нолдылизь. Ракшань кедтнестэ шубань стамояк тонадсть. Тейтерь-аватне маштсть парсте кодамо, мазыйстэ викшнеме. Тенень тонавтсть эйкакшосткак, нуцькасткак. Тень кисэ сынст ловизь сюпавокс ды саекшнизь весе ули-парост. Ансяк шкань ютазь вельмевтизь валдо лемест.
Стакачитнень лангс апак вано, те буесь эзь калавтово, эзь лепштяво. Вана Спиридоновтнеяк, Надежда Ильиничнань тетязо-авазо – Илья Михайлович ды Роза Ильинична – трясть-кастсть вете эйкакшт, эрьванть юткстост ули семиязо, вечкевикс тевезэ. Эрьвась машты викшнеме-кодамо, куш кавтотне цёрат. Виде, теньсэ покш таликазо покш тейтерест Надянь, кие ульнесь тетянзо-аванзо туртов эрьва тевсэ васенце лездыцякс, ялакстнэнь-сазоркатнень мельга ваныцякс. Тейтернесь вишка пингестэ арсесь улемс лецицякс, секс кавксо класстнэнь прядомадо мейле тусь тонавтнеме Саранск ошонь медучилищав фельдшерэнь-акушерэнь отделенияв, конань парсте прядомадо мейле ушодсь важодеме Саранск ошонь чачтомань кудосо, сестэ сон ульнесь 4-це № больницянь территориясо.
Эсь шкастонзо вастовсь вечкеманзо марто, лиссь мирденень содавикс спортсменэнть Александр Володинэнь экшс. Сон ульнесь СССР-нь вольной бороцямонь коряс спортонь мастерэкс. Одтнэ тусть эрямо мирдензэ чачома ёнксов – Орданьбуев. Кодашка покшоль кенярксост, зярдо чачсь васенце цёраст – Евгений.
Тешкстасынек, ней тензэ уш 47 иеть, сонсь ниле тейтерень тетя, вечкиця мирде. Евгений Александрович Тольяттисэ высшей военной тонавтнемань заведениянть прядомадо мейле велявтсь тиринь ёнксов. Ней Евгений Александрович машты кшнистэ эрьва мезень тееме: мазыйдеяк мазый пирявкст, кудоютконь кедьёнкст. Прок мерят, аванзо ладсо викшни, ансяк Надежда Ильинична салмукссо, сон жо – кшнисэ. Теде башка, тонавтнесь Чебоксары ошсо юристэкс. Истя жо пек ламо лезды аванзо туртов саезь эйкакштнень трямосо-кастомасо. Володинтнэнь омбоце эйкакшост – Татьянань, юристэнь образованиязо, сонзэ кавто эйкакшонзо. Колмоцесь, Вера – кудазорава (сон колмо эйкакшонь триця ава), нилецесь – Лена – школасо тонавтыця.
Виде, ней Надежда Ильиничнанень ков седе шождыне икелень коряс. Эрьва тевсэ тензэ лездыть эйкакштне ды нуцькатне.
А ёвтавияк, кодамо стака ульнесь, зярдо од авинесь кадовсь ськамонзо ниле эйкакш марто. Эштё весть ледстяса се шканть, зярдо масторсонть мольсь тевтнень одс ладямось (перестройкась). Эдь сестэ ламот ломантнень допрок полавтовсь эрямост. Кие-бути теевсь сюпавокс, кой-кинень жо ярсамскак а мезде ульнесь. Виде, нама, вейке ломанесь прянзо кодаяк бу трявлизе, а кода улемс ламо эйкакшонь ськамонзо трицянтень?! Ялатеке сеть иетнень ледстнемстэяк Надежда Ильинична эрямонть лангс а пеняци, киньгак теньсэ а чумонды. Ансяк сюкпря Пазонтень ёвты эйкакшонзо трямсто-кастомсто вийтнень максоманть ды эрямосонзо паро ломаненть вастоманть кисэ.
Уцяскась лиссь истя, муевсь тензэ эри ялга, сонзэ мелявкстнэнь-майсематнень чарькодиця ломань – Николай Алексеевич. Мартонзо вейсэ сынь арсесть каземс уцяскав эрямо эштё вете эйкакштненень, кить кадовсть тетянь-авань вановттомо, кинь «сэпей» эрямост пачтинзе эйдень кудос.
Малав комсь иеть уш ютасть, кода Володинтнэнь кудось теевсь тиринсекс васня кавто сазоркатненень, школасо тонавтницятненень Иринанень ды Алинанень. Шкань ютазь Надежда Ильинична кармась содамо эштё колмо сынст сазоркатнеде, конат се шкане ульнесть лия эйдень кудотнесэ. Теде марямодо мейле Надежда Ильинична таго удоманзо ёмавтызе. Васня эсь пачканзо арсесь, мейле семиянтень пачтясь. Паро, малавиксэнзэ чарькодизь сеске, ды шкань апак таргсе тусть лия эйкакштнень саеме.
Истя, Володинтнэнь кудосо вейс пуромсть Селезневтнень ветенест тейтерькатне: Ирина, Алина, Галина, Оля, Наденька. Сехте вишкинентень ульнесть ниле иеть, сталмозоль ансяк сисем килограммат. Тейтерькинесь кинь мартояк эзь корта, натой весень эйстэ пельсь. Ансяк весень пильге лангс стявтызь мирдензэ марто. Ризксэнтень, Николай Алексеевич колмо иеде икеле кулось.
Кассть вечкезь
Трямс саезь эйкакштнень Надежда Ильинична а вечки явомс тиринсетнеде, нуцькатнеде. Саезтне тензэ истямокс жо савить. Надежда Ильиничнань нуцькатнеде 11: сисем тейтерькат ды ниле цёрынеть, ды вейке нуцькань эйкакш. Нуцькатнень ютксто сехте покшонтень, Мариянень, 27 иеть, вишкинентень – 9 ковт. Покштне сеедьстэ сакшныть бабаст туртов превс путома мельга, вишкинетнень кандтнесызь ваномс. Тешкстасынек, те покш семиясь эри ояксчисэ, вейке-вейкень чарькодезь ды вейкест-вейкест туртов лездазь.
Ёрокчизэ содавикс масторонь келес
Неень шкане Надежда Ильинична полады стамо-викшнеме эрзянь викшневкс марто кезэрень панарт, руцят, рушникть, юдмат (сумкат). Валонзо коряс, сонензэ покш лезкс максы минек республикасо содавикс искусствоведэсь Татьяна Петровна Прокина. Авась парсте машты ловномо эрзянь ды мокшонь викшневкстнэнь. «Мордовский Орнамент» сонзэ книганть вельде Надежда Ильинична седе домкасто тонавтни ды тевс нолды эрзянь викшневкстнэнь.
Кевкстеманок лангс, косто сон саи коцтонть ды суретнень, Надежда Ильинична мерсь:
– Кезэрень шкане минек сырькайтне тевс нолдасть понань суренть, конань сынсь штердсть. Нама, ней сондензэ аламо ды а косто саемскак. Интернет вельде муинь лияназонь коцт ды суреть Белоруссиясто. Куш сон пек питней, ялатеке раман ансяк сынст кедьстэ. Эсенек масторонь оштнесэ сонзэ питнесь седе вишкине, ансяк парочинь коряс явови.
Текенень поладса, эряви содамс, кодат тюст нолдамат вейсэ. Невтемакс, эрзятне кезэрень шкасто вечксть якстере ды чопода-якстере тюстнэнь, мартост нолдасть раужонть.
Надежда Ильиничнань важодевксэнзэ, эрзянь авань оршамопелензэ улить Орданьбуень краеведческой музейсэ, Санкт-Петербургонь «Кунсткамерасо».
Ютазь иень ноябрясто РФ-нь Федерациянь Советсэ панжовсь этнографической покш выставка, конань содавтызе Валентина Матвиенко. Эрзя-мокшонь раськенть пельде тосо невтевсь Надежда Володинань эрзянь авань мазый оршамопелесь, конантень покш питне путсь РФ-нь Федерациянь Советэнь прявтось.
Январень 19-це чистэ Надежда Ильинична тешкстызе юбилеензэ. Сонзэ лемс ёвтавсть ламо поздоровт. Минь, «Эрзянь правда» газетань теицятне, вейсэндявтано неть паро валтнэс ды арсетяно тензэ кеме шумбрачи, уцяска, кувака пинге ды маней менель!
Фотографиятне саезь семиянь архивстэ.
Валентина Юдина