Понедельник, октября 18, 2021
Важное

Свал мельспаро теевемс содавиксэкс ломантнень марто, конат а стувтнить эсь ундоксост, тиринь келест, раськень коест-кирдаст. Кить а шныть пряст, а чавить мештес лиятнень ладсо. Сынь састыне важодить ды топавтыть тевест. Истятнэнь ютксо – Сергей Иванович Архипов.


Чачсь сон Пенза ёнксонь Никольской райононь Сабан велесэ эрзянь покш семиясо. Школань прядомадо мейле тонавтнесь Никольск ошонь 12№ ПТУ-со электромонтёрокс. Седе тов служась армиясо. Армиясто самодо мейле кармась важодеме милициясо. Вастызе Ирина вечкевиксэнзэ ды урьвакстсь. Чачсть кавто эйкакшост.

Архиповтне аволь весть невтнизь пряст «Папа, мама, я – спортивная семья!» пелькстамотнесэ, изнякшность «Успешная семья» конкурссо.
Сынст семиясо кияк а пели тевде: трить ракшат, путнить пире. Весе тевтнесэ лездыть эйкакштне. Сергей Иванович ниле иеть, кода пенсиясо, сон – боевой действиянь ветеран. Ней важоди Никольской райононь детско-юношеской спортонь школасо. Ирина важоди эйдень кужосо воспитателень лездыцякс. Сынст кавто эйкакшост тонавтнесть Саранскоень вузтнэсэ. Тесэяк невтнизь пряст эрьва кодамо пелькстамосо, вастовомасо, кенярксчитнесэ. Александр цёраст тусь эрямо Санкт-Петербургов, важоди государственной ды муниципальной услугань максомань коряс юристэкс. Настя тейтерест велявтсь Никольск ошов, тусь тетянзо киява, важоди полициясо.

Эряви меремс, Архиповтне вечкить раськень койтнень-кирдатнень, бажить сынст а стувтомс. Сынь сёрмадстыть ды ловныть эрзянь газетатнень ды журналтнэнь. Аволь весть тейнесть фотосессият, косо семиянек снимсесть эрзянь оршамопельсэ. Минек газетань лопатнесэяк неть мазый ды лембе фотографиятне лиснесть.

Сабан велесь, косо чачсь Сергей Иванович, ёмамо лангсо. Тосо ней эрить ансяк кеменьшка ломанть. Архиповтне ушодсть ютавтнеме велинесэнть кенярксчить. Эрьва иестэ Троицянень тей сакшныть ламо инжеть, сетне, кить тесэ чачсть, ансяк сралесть масторонть келес. Велесь ашти пек мазый таркасо, Айва лейненть чиресэ, Само-Пандонть вакссо. Те таркась эрьва кодамо шкане пек мазый. Неть кенярксчитнес аволь весть тердезельть Мордовиянь инжетнеяк. Тесэ аволь весть морасть МР-нь Заслуженной артисткась Татьяна Ломакина, морамонь эрьва кодамо конкурсонь изницясь Артём Мамаев, «Умарина» киштемань ды морамонь государственной ансамблянь морыцясь Ирина Учаева, «Ялгат» фолк-группась ды лият. Мастястояк, эрси, пурнавить тов.

Архиповтне састыне витнить Сабан велесэ эсь кудост, путнить пиренть, леднить кудонть перька тикшенть. Истямо кармавтома макснесь Сергеень тетязо Ирина урьванстэнь: «Сабан велесэ кудонть илинк кадо». Те семиясь инжень вечкиця, весень туртов паронь арсиця, а вечкить нусмакалеме, свал муить ёвтамс седей эждиця валт. Кудазорось Сергей Иванович мельспаросо покшчитнестэ толбандя лангсо пиди шулюм (истя мерить шурпантень).

Те кизэстэнть цёрась тейсь алкуксонь тев. Покш пиземе шкане ялгатнень марто ютамсто редизь, кода ёндолось понгсь вейке кудонть латос, тусь качамо. Сынь капшазевсть кудонтень, гайневтсть пожарнойтненень. Сынст самс лездасть кудазоронтень лисемс кудосто, саемс документтнэнь ды лия эрявиксэнть. Истя идезель кудось ды азороськак.

Течи, умарьковонь 11-це чистэ, Сергей Иванович тешксты 50 иень юбилеензэ. Арсетяно тензэ кеме шумбрачи, уцяска, паро ёжо!

Анокстызе
Татьяна Маторкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».