Арась мезеяк седе малавикс эсь тиринь ёнкстонть. Эрьванть туртов тиринь велинесь явови лиятнень эйстэ эсь виртнесэ-паксятнесэ, домка лейтнесэ-эрькетнесэ, седейс токиця мазычисэ, конась кенярдовты сельметнень, кепеди мельёжонть. Аволь умок савсь улемс Дубёнкань райононь Кочкур эрзянь велесэнть. Истят мазычить, истямо сэтьмечи, мерят, понгить лия эрямос. А кодамо тесэ эрямось, кодат ломантне, мезде арсить-бажить – минек марто вастовомсто ёвтнесь Кочкур велень администрациянь прявтось Людмила Ивановна СЛУШКИНА.
– Кочкур велесь – минек Дубёнкань райононь покш велетнестэ вейкесь. Тесэ лововить 326 кудот, весемезэ ниле курот. Эрицятнеде 428 ломанть. Сынст ютксо зярыя истят, кить печтизь 90 иетнень. Улить ламо эйкакшонь триця семиянокак. Сынь веленть каштанчизэ. Тедеде минек чачсть ниле эйкакшт. Те пек кенярдовты, – ёвтни Людмила Ивановна. – Велесэнть неень шкасто роботы эйдень кужо, козонь якить 17 эйкакшт. Тесэ, кода эсенек Кочкур велень, истя шабра Ломаты велень эйкакштне. Ули средней школа, тонавтницятнеде ней 51. Истя жо важодить неень шкань ФАП (теезь «Здравоохранение» национальной проектэнть лувсо), клуб, библиотека, почта, кавто лавкат, церькованок ули. Велесэнек лововить крестьянско-фермерской ниле хозяйстват, конатне трить ракшат, кастыть сюрот, модамарь, ниле ИП-ть ды эрицятнеяк эштё трить-кирдить ракшат, скалтнэдеяк лововить 28 прят.
Кода тешкстызе Людмила Слушкина, Кочкур велесь лиятнень эйстэ васняяк явови сеньсэ, од цёратне-тейтертне семияст пурныть теске. Лиякс меремс, ламот цёратне никс саить эсь велень тейтертнень. Ды неть од ломантнень ютксо аволь аламо истят, конатне кадовить эрямо теске ды весе эрямост сюлмить Кочкур веленть марто: стявтыть кудот, чачтыть эйкакшт ды одкстомтыть веленть.
– Минек пек ванстовить кудораськень койтне. Ды эрицятне весементь бажить теемс семиянек. Невтемга, бути саемс КФХ-тнень – ютксост ламо важодемань династият. Хозяйстватнесэ роботыть весе раськенек. Истятнэнь ютксо Адмайкинтнэ, Афонькинтнэ, Наумкинтнэ. Сынст покштяст-бабасткак, тетяст-авасткак весе пингест алтызь тиринь велентень ды мода лангсо важодемантень, те тевенть поладыть эйкакшост-нуцькаст, – ёвтни Людмила Ивановна.
Эряви тешкстамс сеньгак, Кочкур велень ломантне эзизь кадо-мие эсь модатнень. Колхозтнэнь каладомадо мейле, зярдо явшевсть пайть, весе модатнень саизь КФХ-тне ды сынсь эрицятне. Чавосто аштиця паксят арасть, весе сынь соксевить-видневить.
– А те весе косто моли? Икелень эрицятнень эйстэ. Минек ульнесь СССР-нь Народной учителенек Степан Ильич Дергачев, конась пек покш робота ветясь трудовой воспитаниянть коряс аволь ансяк школасо тонавтницятнень, велень эрицятнень ютксояк. Штобу сынст улевель эсь тиринь ёнксонтень вечкемась, штобу кадовольть велес. Ды минек эрицятнесэ те ёнксось ванстовсь те шкас, – корты Людмила Слушкина.
Кочкур велесэ, кезэрень койтнень-кирдатнень ванстомадо башка, покш мель явови неень шкань программатнень ды проекттнэнь тевс нолдамонтень, эдь сынь пек лездыть велесэ эрямонть вадрялгавтомантень. Истя, «Комплексное развитие сельских территорий» федеральной программанть лувсо 2021 иестэ велесэнть теезель спортонь площадка, косо улить футболсо налксемань туртов пакся, волейболсо ды баскетболсо налксемань туртов тарка. Теке жо программанть коряс 2021 иестэ велень Новая курованть теезель асфальтонь вельтявкс марто паро ды кеме ки. Теке иень сёксня «Экология» национальной проектэнь «Чистая вода» региональной программанть лувсо аламодо витнезельть велеванть ютыця ведень сеттне.
– Те иестэ истя жо «Комплексное развитие сельских территорий» программанть вельде теинек эйкакштнень туртов площадка. Сонзэ теемантень явозельть 420 тёжат целковойде ламо ярмакт. Сынст лангс рамавсь неень шкань комплекс кирякстнемань пандынетнень, нурсематнень марто. Площадкась сеске кармась эйкакштнень туртов вечкевикс таркакс ды сон, кода спортонь площадкатнеяк, чаво а эрси, – ёвтни Людмила Ивановна. – Те иестэ анокстынек документт «Культура» национальной проектэнь «Сельский Дом культуры» программантень. Пек покш меленек вадрясто витнемс велень клубонок. Кемтяно, бажамонок кирдьсызь ды явить тенек ярмакт.
Кочкур велесэ улемстэ кодаяк эзинек ютаво эйкакштнень туртов неень шкань площадкатнень вакска. Футболсо, волейболсо ды баскетболсо налксема таркатне, вишкинетнень туртов площадкась – весемесь кенярдовты сельметнень. Седеяк мельспаро, сынь алкукс эрявить. Валске марто уш, эсь бажамотнень ёвтнезь, тов ютасть Кочкур велень «Чипайне» эйдень кужов якицятне. Цёрынькатне-тейтерькатне мелявтсть, саизь-арась воспитательтне осканть, конасонть арсить налксеме. Тонатне кемевтизь, весемесь мартост. Эйкакштне кенярдозь кармасть ёвтнеме, кода нейке ушодыть налксеме футболсо.
Минь жо седе тов поладынек кортамонок Людмила Ивановна марто. Сон ёвтнесь эрицятнень эрямо лувдонть ды пачтясь, сынст поселениянь территориясо тееви цементэнь завод. А те – налогт велень бюджетс ды эрицятнень туртов важодемань од таркат.
– Важодема таркань коряс, нама, кода ламо лия велетнесэяк, мелявкст улить. Эсенек велесэ предприятият арасть, кить Московсо вахтасо роботыть, ламот Чаунзань нармунень фабрикасо, цементэнь заводсо. Эрьва валске арды автобус, пурнасынзе ломантнень, важодеманть прядозь, мекев пачтить эйсэст кудов. Зярдо заводонть панжсызь, арсян, ламот велявтыть Московсто ды кармить роботамо теске, – корты Людмила Ивановна.
Нама, те пек вадря. Эдь зярдо улить важодема таркат, велеськак эри. Од ломантне а кармить бажамо туеме ве ёнов, мекевлангт, кармить раштамо эсь раськенть теске, покштяст-бабаст мода лангсо.
Слушкинтнэнь кудораськесь
Сонсь Людмила Слушкина профессиянь коряс медик, школадо мейле прядызе Орданьбуень медицинской училищанть. Ды 27 иеть роботась те тевсэнть. Эсест велень медпунктсо ульнесь акушеркакс. 2002 иестэ ставканть киртизь, 2004 иестэ велень школанть юрсо панжсть эйдень кужо ды Людмила Ивановнань саизь тов прявтокс. Кувать жо тосо роботамс эзь саво, 2006 иестэ, сонзэ важодемань ёрокчинзэ ды эрязачинзэ неезь, аравтызь велень администрациянь прявтокс. Ды те тевсэнть уш малав комсь иеть. Людмила Ивановна тескень, Кочкур велень. Тетянзо-аванзо, Иван Иванович ды Вера Григорьевна Кочетковтнень, ульнесть вете эйкакшост – ниле тейтерть ды вейке цёра. Зярыя иеть семиясь эрясь Свердловскойсэ (ней – Екатеринбург). Тосо чачстькак Людмила ялаксонзо марто. Мейле Кочетковтне велявтсть тиринь Кочкур велев, зярсыя эрясть тесэ ды шкань ютазь тусть одов. А Людмила уш вастызе седейпелькскензэ ды кадовсь велес. Мирдезэ, Александр Николаевич, ламо иеть котьмась культурасо – ульнесь клубонь важодицякс. Пек вадрясто налкси баянсо ды ламо лия инструментсэ. Парсте морыяк. Паряк, теньсэ солавтызеяк тейтеренть седеензэ.
Людмила Ивановна ды Александр Николаевич Слушкинтнэ трясть-кастсть кавто цёрат – Денисэнь ды Николаень. Денис кочкизе аванзо кинть, кармась фельдшерэкс. Ней канды службанть специальной военной операциянь таркатнесэ, лезды минек цёратненень шумбрачист ванстомасо. Николай эри ды важоди Екатеринбургсо. Школадо мейле прядызе Уральской политехнической институтонть ды кадовсь тоско. Цёратне ды мирдезэ Людмила Ивановнань туртов – те уцяска, эрямонь смусть ды вандынь чинтень кемема.
Юлия Еремина
Фототне
Эдуард Ретунскиень