Истямо лемсэ сокссо чийнеме вечкицянь клубось Отяжелень районсо теезель кавтошка иеде икеле.
Нурька шкань перть сонзэ кармасть содамонзо райононь весе эрицятне. Клубонть кенкшензэ панжадот весенень, кинь ули мелезэ стямс сокс лангс. Райононь эрицятненень ней ули косо ютавтомс телень оймсема читнень. Эштё кавтошка иеде икеле ульнесь аволь истя. Эряви меремс, Отяжеле ёнксось республикань районтнэнь ютксо ловови пек спортивной районокс. Икелень иетнестэ покш изнявкст добовакшность тесэнь хоккеисттнэ, бороцицятне, сокссо чийницятне. Сокссо чийнемань командатне ульнесть весе общеобразовательной школатнесэ ды лия тонавтнемань заведениятнесэ, роботасть секцият. Нурькинестэ меремс, те спортонть вечкицянзо Отяжелесэ ламо, а вана оймсема чистэ эрицятненень, паксядонть башка, сокссо чийнемс ульнесь молемс а ков. Тень арсезь, районсонть сайсть мель витемс истят тевтнень. Ульнесть истят ломантькак, кить тень лувсо снартнесть мезе-бути теемс. Истятнэстэ вейкесь «Композит» ООО-нь генеральной директорось Александр Николаевич Тикшайкин. Сон пурнакшнынзе перьканзо велувсо арсицятнень, ды тевесь сыргавтовсь.
Тешкстасынек, Александр Николаевич Тикшайкин – эсь тевень вечкиця ломань. Сон тескень, чачсь ды кассь Сабанцелесэ. Тонавтнесь тосонь школасо. Пек вечксы спортонть. Школасо тонавтнемань иетнестэ покш мельсэ якась спортонь секциятнес. Физкультурань тонавтыцяст Ефим Ефимович Палькин весе седеензэ путсь физкультурань уроктненень. Эйкакштне тень марясть, ды ламотне сонзэ тонавтницятнестэ сюлмизь эрямост спортонть марто. Истятнэстэ вейкесь Александр Николаевич Тикшайкингак. Школань прядомадо мейле поладызе тонавтнеманзо М.Е.Евсевьев лемсэ МГПИ-нь физвоспитаниянь факультетсэ. Служась армиясо. Тосто велявтомадо мейле сась роботамо Отяжелев.
Клубонь свалшкань таркакс кочказель «Сараст» совхозонть маласо вирьсэнть зярдо-бути строязь кудынесь. Те шкас тесэ ульнесь райононь спортшколань база. Арсезель, седе паро тарка а муят. Лементь лангсо кувать эзть арсе. «Вармась» весенень тусь мельс. Бути теньсэ прядомс лементь ланга кортамонть, карми а виде. «Варма» клубось кандтни Николай Николаевич Пелагейкинэнь лементь. Кие те истямось? Н.Н.Пелагейкин – физкультурань тонавтыця. Ламо иеть роботась школасо. Сонзэ воспитанниктнестэ ламот истя жо сюлмизь эрямост спортонть ды спортивной роботанть марто. Зярыя иеде икеле Н.Н.Пелагейкин тусь эрямосто. Тонавтницянзо ды содыцянзо арсизь истя кемекстамс те ломаненть лемензэ.
– Васняяк ульнесь а шожда, – ёвтни «Варма» клубонь председателесь Александр Николаевич Тикшайкин. – Васенце шкатнестэ ламо мезе эрявсь. Ней весемесь арась тарказонзо. Эрицятнень ютксо ветятано покш робота. Ней минек клубтонть содыть райононь весе эрицятне. Ламотне юткошкасто сакшныть семиянек. Кинь арасть соксонзо, макснетяно теске. Пертьпельксэсь тесэ пек мазый. Ардат телень вирьганть сокссо ды мелетькак кепети.
Мертяно, клубов сакшныцятне покш мельсэ участвовить ютавтовиця эрьва кодат пелькстамотнесэ, якить шабра райононь турниртнэскак. Овсе аволь умок Россиянть марто вейсэ «Варма» клубонь сокссо чийницятне участвовасть «Лыжня России» весероссиянь акциясонть. Те иестэнть пелькстамотне алтазельть Ине Изнямонь 75 иетненень, участниктнедеяк ульнесть ламо. Сокс лангс стякшность сыретнеяк, вишкинетнеяк. Аволь весе понгсть изницятнень юткс ды а те прявтось. Истят турниртнэнь васенце мелесь – стявтомс седе ламо ломанть сокс лангс. Истямо мелесь «Варма» клубсонтькак. Тесэ снартнить сюлмамс сокссо чийнеманть марто седе ламотнень. Кармить сакшномо седе ламот, седе ламот кармить ветямо шумбра эрямонь лув.
Николай ЕВДОКИМОВ