Те мазый, мизолдыця, теке лембе чипай, тейтеренть аволь весть некшния эрзянь кенярксчитнестэ. Сеедьстэ наряжазь эрзянь оршамопельсэ, панарсо-пулайсэ. Кортни ломантнень марто, ванат – лиси киштеме сцена ваксс. Сонзэ лангс ванозь, ежоткак паролгады. Дарья тонавтнесь артисткакс ды ней важоди Санкт-Петербургонь «Буфф» театрасо.
Дарья Великанова чачсь Саранск вакссо Луховка поселкасо. Ундоксонзо жо эрзянь, сынь ютыть Покш Игнатбуень Ежовка велестэ, косо чачсь покштязо. Самай тов кизэнь каникулатнестэ пурнавильть кеменьшка ялакст-сазорт, конат зярдояк эзть кирдевкшне кудосо. Ушось, вальмалксось, чувтопрятне теевкшнесть тенст налксемань вечкевикс таркакс.
Школасо тонавтнемстэ Даша кенерсь эрьва ков. Якась художественной ды музыкальной школатнес, кавонест прядынзе. Теке жо шкане чийнесь киштемань кружоков. Морась ды киштсь школань ды поселкань эрьва кенярксчитнесэ. Нилеце классо якась эйкакшонь лагерев. Истя тусь мелезэнзэ, мейле школанть прядовомс эрьва ие ардтнесь. Эйкакштнестэ кой-кить нусмакалить кудост ды малавиксэст кисэ, сон жо тосто кодаяк эзь саевкшне. Весть ульнесь творческой активень лагерьсэ. Те сменантень пурнавкшность ошонь школатнестэ весе творческой эйкакштне: киштицятне, морыцятне, седицятне, артыцятне… Ютксост Даша марясь прянзо эсензэ таркасо. Оймамо сон эзь сода, кенерсь эрьва ков, варчнесь прянзо эрьва мейсэ. Школадо мейле натой важодсь вожатоекс лагерьсэ. Лембе ледстнемакс кадовсь се шкась.
Дарья сиянь медаль марто прядызе школанзо. Бажась тонавтнемс Н.П. Огарев лемсэ МГУ-со. Кувать кавтолдсь, кодамо факультет кочкамс. Мелезэнзэ тукшность гуманитарной енкстнэ. Истя, документэнзэ кучинзе кото факультетка. Сонсь жо арсесь эсь пачказо: «Эх, университетсэ истя виевстэ ды сехте вадрясто ютыть «Студентэнь тундотне»! Те монень вечкеви!».
Школасо сон тонавтнесь немецень кель. Истя лиссь, весе неть иетнень перть уроктнень ветясть колмо тонавтыцят. Дашанень немецень келесь вечкевсь, саевсь шождасто. Те келенть тонавтыцятне натой арсесть, вузсо тонавтнемстэ сон кочкасы те енксонть. Паряк, туи тонавтыцянь киява, кода бабазо, Валентина Осиповна, кона ульнесь начальной классонь тонавтыцякс, эли авазо, Елена Александровна – МР-нь заслуженной тонавтыцясь, роботы начальной классонь тонавтыцякс.
Дарья кармась тонавтнеме Нижней Новгородонь лингвистической университетсэ. Тосояк ушодсь явомо покш мель творческой енксонтень. Немецень келенть жо эрявсь седеяк домкасто тонавтнемс, алтамс тенень весе юткошканть. Од тейтеренть цидярдомазо эзь сато. Сон сеедьстэ арсесь: видестэ-аволь кочкизе те кинть? Прядсь ниле семестрат ды тусь.
– Мон туинь Московов ды карминь варчамо виень театральной вузтнэсэ. Опытэм кодамояк арасель. Ютынь зярыя турт, ансяк ковгак эзинь понго. Неинь ломантнень, конат эрьва ие сакшность невтеме пряст, истя бажасть улемс артистэкс. Сынь содылизь театральной системанть, мастертнэнь, содасть, мезе седе паро ули ловномс комиссиянть икеле. Ансяк, нама, кинь кодамо уцясказо... Мон мездеяк эзинь мелявто, эзинь пеле, мезеяк лангс эзинь кеме. Теке Фрося Бурлакова «Приходите завтра» фильмасонть. Лиси эли а лиси, велявтан мекев, – ледстни тейтересь.
Самай неть экзаментнэсэ редизь сонзэ фактуранть, вайгелензэ, чаманзо мазылгавтсть безьгунтнэ. Лангозонзо ванозь, теке мерят, сась костояк васоло велестэ. Ды истя улияк. Московсо тевезэ эзь лисе, тусь Питерэв. Тесэ сонзэ редизе Санкт-Петербургонь театральной искусствань государственной академиянь тонавтыцясь И.Р. Штокбант. Дарья кармась тонавтнеме сонзэ мастерскойсэ. Ниле иеть валскестэ саезь талай чокшнес ютасть занятият. Чить ульнесть лекцият, чокшне – театрасо «мастерство актера» предметэсь. Омбоце курссто саезь студенттнэ уш налксесть «Буфф» театрань спектаклятнесэ. Тосо художественной руководителекс важодсь И.Р. Штокбант.
Дарья видьксты, тосо тонавтнемстэяк сон мелявтсь: те кинть кочкизе эли аволь? Неть арсематнень марто совась мастерэнтень. Исаак Романович сонськак тонавтнесь военной переводчикекс. Тейтеренть пингстэ гайневтсь Дашань аванстэнь, лембестэ мартонзо кортнесь ды мерсь: «Дарьянь тарказо ансяк тесэ!».
Истя, 2015 иестэ саезь Дарья Великанова важоди театрасо. Кодамо сон, «Буфф» театрась?
– Минек театрась музыкально-драматической. Малав весе труппанть улить эстрадань артистэнь дипломост. Театрасонок путовить музыкальной спектаклят, косо моратано ды кишттяно. Свал бажатано кортнемс ваныцятнень марто, улезэ ютксонок сюлмавома. Кадык спектаклядо мейле ломаненть ежозо витеви, оймезэ валдомгады.
Дарья налкси зярыя путовкстнэсэ. Неть: А.Пушкинэнь «Барышня-крестьянка» повестензэ коряс «Пушкин. Наше все!» спектаклясь, тосо сон налкси крепостной тейтеренть Настянь, Ж.Ануень «Коломба, или Бумажные розы» (Жорж костюмершанть), Н.Макиавеллинь «Мандрагора» итальянской комедиясо (Состратань), А.Володинэнь «С любимыми не расставайтесь» ды ламо лиясо.
Тейтерензэ содавтомо Саранскойстэ ардтни авазояк. Елена Александровна – прявт ваныцязо. Седе мейле, кода Даша кармась тонавтнеме театральной вузсо, сон яви покш мель театрань искусствантень. Саранскойсэ а менстни вейкеяк премьера, сонзэ содасызь весе актертнэ ды натой учить, мезе сермады спектаклянь ваномадо мейле Интернетс. Театрав эйкакшонь спектаклянь ваномо свал сайни тонавтницянзояк.
Дарьянь мирдезэ, Сергей, роботы теке театрасонть. Сынь теевсть содавиксэкс Питерсэ вейсэ тонавтнемстэ. Валюшка тейтерькаст туртов 4 иеть. Васенцеде понгсь театрав вете ковсо. Зярс авазо налксесь спектаклясо, коллегатне сцена удало вансть мельганзо.
– Бабам, Валентина Осиповна, ульнесь монь ангелэм-ванстыцям. Кеман, тейтернем касы истямо жо паро, валдо, алкуксонь ломанекс, – корты минек героинясь.
Дарья а содасы эрзянь келенть, ансяк пек вечксынзе раськень койтнень, культуранть. Кода истя лиссь?
– Эйкакш пингестэ саезь эрямосон свал ульнесть раськень моротне ды киштематне. Рузонсетнеде свал седе ламольть. Эрзянь ды мокшонь культурась жо пек явови славянонседенть. Сон лия енов а молиця. Киньгак арасть пулайть, аволь эрьва таркасо улить ламо вайгельсэ морамот. «Торама» фольклорной ансамблянь моротнень кунсоломсто монь седеем токнозевсь. Карминь вешнеме, ловномо минек культурадонть, койтнеде, ломантнеде. Чарькодинь, кодамо сюпавчи ули минек раськенть! Ставтынь эстень эрзянь оршамопель. Ды а евтавияк, кода вечкан якамо эрзянь кенярксчитнес – «Эрзянь Лисьмапряв», «Раськень Озксов». Теевинь содавиксэкс «Торамань» морыцятнень марто, карминек паро ялгакс. Сынст морост кунсоломсто мон пурнан вийть. Санкт-Петербургсо морсян «Домострой» казаконь этнографической ансамблясо. Тосо моратано морот, конат сермадозь экспедициятнесэ, кавксть ардтнинь мартост Дон лангов.
Дарья Великанова видькстась, ванкшны, кодат спектаклят путнить Эрзянь ды мокшонь национальной драматической театрасо. Зярс вестькак тензэ эзь савкшно ваномс тосо тиринь кельсэ спектакля. Ансяк ули покш мелезэ аволь ансяк ваномс, паряк, налксемскак эйсэнзэ. Арсетяно, сонзэ те тевесь парсте лисевель. Эдь сцена лангс лисезь, ваныцятненень свал бажи каземс седейлембензэ.
Татьяна Маторкина