Республикань паксятнесэ ушодовсь сюронь нуемась. Тедеде Мордовиянь аграрийтненень эряви урядамс 482 тежат гектарт сюро. Нуемантень васенцекс кундасть Отяжелень, Ромодановань ды Ицялонь муниципальной районтнэсэ важодиця велень хозяйствань предприятиятне.
Кода тешкстыть МР-нь Велень хозяйствань ды продовольствиянь министерствасо, сюротнень урядамосо Мордовиясо кармить важодеме тежадо ламо комбайнат. Сюротне чачсть аволь берянть. Бути максы пертьпельксэсь, арсеви пурнамс 1 730 тежат тоннат сюро.
Кода уш евтынек, васенцетнень ютксо, косо ушодовсь нуемась, – Ромодановань районось ды тесэнь «Агрофирма «Трофимовщинская» ООО-сь, конась сови «АПО Элеком» ОАО-нть юрс. Предприятиянть прявтсо эсь тевень содыця аграрникесь, эрзянь ероков церась Иван Александрович Базакин. Неть читнестэ минь ульнинек хозяйствасонть ды эсь сельмесэ неинек, кодамо алкукс «пси» шка, ды аволь ансяк ушолксонть коряс, ушодовсь аграрийтнень туртов.
– Течи хозяйствасонть тевтне лаказь лакить. Ушодовсь сюронь нуемась, – евтни предприятиянь агрономось Виктор Вячеславович Паулкин. – Паксятнес лисинек июлень 12-це чистэ. Васняяк ушодынек озимой товзюронть нуеме. Сондензэ видезь 2,5 тежат гектарт. Сюрось уш кенерсь вадрясто, секскак бажатано пурнамс сонзэ седе куроксто. Вейке гектарсто саевить косо-бути 40 центнерт. Пивсэмстэ важодить кемень комбайнат, нилетне эйстэст – «Полесьят», колмо – ACROS 530 ды кавто – «РСМ-161». Эште вейке комбайнанок овсе од, ансяк раминек. Те – «Ростсельмашонь» Т500 комбайнась. Весе комбайнатне вадрят. Комбайнертнэ сынст шныть. Истя жо нуезь сюронть усксить малав комсь автомашинат, зярыя эсенек, лиятне сиведезь.
Пивсэзесь сеске ускови «АПО Элеком» ОАО-нь элеваторс. Кода евтнесь Виктор Паулкин, хозяйствасонть, озимой товзюродонть башка, видезь 550 гектарт яровой товзюро, 400 гектарт кснав, 2 тежат гектарт ламбамо якстерькай, 50 гектарт сюрокс кукуруза, 480 гектарт силосокс кукуруза, 630 гектарт чиньжарамо.
– Товзюрось кенерсь парсте, сюрось коське. Летькесь эйсэнзэ 14 %, – корты Виктор Паулкин. – Ушосонть пси, секскак шканть а таргсетяно, роботатано эрязасто. Ансяк бу пертьпельксэсь меревель весементь теемс шкастонзо.
Сюронь пивсэмань тевтнеде кортамсто, агрономось ледстинзе комбайнатненьгак ды сынст руль экшсэ важодицятненьгак.
– Тевтне эдь парсте молить сестэ, зярдо техникасонть важоди алкуксонь специалист, – корты Виктор Вячеславович. – Комбайнертнэнь свал кочкатано весеме ендо анокстазь. Улить истят комбайнеронок, конат эйкакш порасто саезь нуить сюро. Эдь сынь чачсть ды кассть велесэ. Весемесь моли тосто!
Вейке комбайнань руленть экшсэ важоди Шамиль Кузяев. Шамиль Искяндерович весе эрямонзо перть роботы хозяйствасонть, уш малав 40 иеть. Чачома-касома енксозо – Ромодановань райононь Алтары велесь. Комбайнасо роботы кавксоце ие. Важодемань кинзэ жо ушодызе эсест велень колхозсо трактористэкс.
Шамиль Кузяевень велень хозяйствасо весе эрямонзо перть роботась тетязо. Сон ульнесь трактористэкс, эште икеле шкань дизельсэ роботакшнось. Эйкакш порасто уш эсь цератненьгак тракторонь руль экшсэ роботамо тонавтынзе. Ды те сынст туртов кармась эрямонь тевекс.
– Тракторонь руль экшсэ иензэ перть важодят, мелеськак моли, – пейди механизаторось. – Эряви лиясто эсь ерокчинть варчнемс мейсэяк одсо. Истя, ялгам Михаил Пестов, сон ней хозяйствань лия отделениясо роботы, кода-бути манимим комбайнань руль экшс озамс. Ульнесь те кавксошка иеде икеле ды ней эрьва кизна нуема шканть паро мельсэ учан. Комбайнасо важодемась вечкеви сеньсэ, тесэ азарт ули, тон кода-бути лия механизатортнэнь марто пелькстат, кие седе ламо бункерт сюро нуи. Теде башка, сюронь нуема шкась – а стувтовикс шка. Зярдо урожаесь паро, седееть кеци ды пурнамс сонзэ покш мельспаро. Ды зярдо ванат пивсэзь сюронть лангс, кенярдат, эдь тесэ ули тонь путовксоткак.
Шамиль Кузяев свал тевсэ. Тунда видемань тевтне, сексня модатнень сокамось-изамось, телень перть лия тевть муевить. Кода мерсь механизаторось, ялатеке сехте вечкевикс шкась – сюротнень нуемась. Те шкастонть аволь ансяк хозяйстватнесэ виев важодема моли, велетнеяк, мерят, вельмить. Паксятнестэ каятыть комбайнань увтт, сюро марто машинатне эвтезь эвтить. Ды сеске мельс ледить икелень шкатне, зярдо норовонть пурнамосо важодсть веленек.
– Нама, ней шкатне лият. Техникаськак полавтовсь, технологиятнеяк лият. Важодемась моли седе шождасто, куроксто, шкань апак таргсе. Ды нуема шкастонть истянь зняро важодицяткак а эрявить. Тень коряс весемесь полавтовсь пек паро енов, – тешксты Шамиль Кузяев.
Истя жо комбайнерокс предприятиясонть важоди Александр Фешкин. «АПО Элеком» ОАО-со роботы нилеце ие. Свалшкане важоди УАЗ автомашинасонть, тедеде макссть тензэ комбайна. Зярыя чинь перть важодезь, чарькодсь, техникась мелензэ коряс.
Сонсь Александр – Красный Узел поселкань. Школадо мейле тонавтнесь СПТУ-со сварщикень профессиянтень. Те тевсэнть роботамс эзь саво, седе малавикс тензэ водителень тевесь.
Комбайнаскак озась аволь васенцеде, кеменьшка иеде икеле аламос роботакшнось комбайнерокс.
Ды, эряви меремс, неть содамочитне церанть ванстовсть а беряньстэ. Пивсэме лисемань васенце читнестэ уш сон икельцетнень ютксо. Ловоманзо коряс, чинзэ перть сехте ламось сонензэ удалась нуемс 14 бункерт товзюро. Те пек паро.
«АПО Элеком» ОАО-со важодицятне а пеняцить кодамояк стакачи лангс. Виде, важодеманть тесэ, кода республикань велень хозяйствань лия предприятиятнесэяк, ушодыть рана валске ды прядокшныть позда чокшне. Шкась ней истямо. Зярс пертьпелькссэнть лембе ды сэтьме, сюронть кенерема нуеме. Туить пиземеть, весе тевесь лотки. А эдь кшись – минек прявт сюпавчинек! Ды самай тень кисэ роботыть весе алкуксокс, виень апак вансто.
Юлия Еремина
Фототне Егор Горинэнь.