Четверг, февраля 27, 2020
Важное

ОЖОКОВОНЬ 5-ЦЕ ЧИСТЭ МИНЕК МАСТОРСО ТЕШКСТАВСЬ УГОЛОВНОЙ РОЗЫСКЕНЬ ЧИСЬ. СОНЗЭ ТЕШКСТЫТЬ ОПЕРУПОЛНОМОЧЕННОЙТНЕ, СЛЕДОВАТЕЛЬТНЕ, КРИМИНАЛИСТТНЭ. ЧАРЬКОДЕВИ, СЫНСТ ВАЖОДЕМАСЬ АВОЛЬ ШОЖДА: ЧИНЕК-ВЕНЕК РОБОТАСО, ВЕШНИТЬ ЗЫЯНОВ ТЕВЕНЬ ТЕИЦЯТНЕНЬ ДЫ ЗАКОНОНЬ КОЛЫЦЯ ЛОМАНТНЕНЬ. КОДА ЮТЫ СЫНСТ ЧИСТ ДЫ КОДА ВАЖОДИТЬ МИНЕК СЭТЬМЕ ЭРЯМОНОК ВАНСТЫЦЯТНЕ?


Течинь материалсо ёвтнетяно «Чамзинский» Россиянь МВД-нь ММО-нь Дубёнка ёнксканть 17№ полициянь отделениянть важодемадонзо. Сонзэ прявтокс важоди полициянь подполковникесь Виктор Валентинович КАБАКОВ.

– Минек полициянь отделениясо 23 важодицят. Уголовной розысксэ важодить колмо ломанть, вейкесь эйстэст полициянь отделениянь прявтонь полавтыця. Сынь роботыть вете иеть. Весе эсенек райононь, тесэ чачсть ды тонавтнесть школасо, содасызь минек ёнксонть, ломантнень ды те лезды тенст роботасо, – ёвтни В.В.Кабаков.

– Кодат зыянов тевть седе сеедьстэ тейневить районсонк?

– Васенце таркасо неень шкане аштить саламотне. Меельце шкане сеедьстэ кармасть ломантнень манчеме телефонга ды Интернет вельде (мошенничества). Кочкить сыре ломантнень, кинь шожда манямс, ды гайневтнить. Сынь истя кортасызь ломаненть, сон, мездеяк берянде апак арсе, маняви…
 
– Виктор Валентинович, ломантнень манчицятне косто яла гайневтнить?

– Седе сеедьстэ лия ёнкстнэстэ ды васолдо, сень кисэ, аволизь муе. Те: Москов, Новосибирск оштнестэ ды лиясто. Минек районсо истят тевть ульнесть. Саемга, Поводелестэ манчицятненень кучсть ламо ярмакт, малав 200 тёжат целковойть. Шкань ютазь, Саранскоень уголовной розыскень коллегатнень марто важодезь, гайневтниця ломанесь муевсь ды сон чумондозель.

– Эрьва чи марятано кулят «гайневтниця манчицятнеде»… Кода идемс ломантнень истямо зыяндо?

– Тень коряс ветятано профилактикань покш тев. Тейнетяно памяткат. Явшетяно сеть таркатнева, косо ламо ломанть: лавкатнева, базарсо, банксо. Истя жо райононь «Новая жизнь» газетасо макстано информация. Свал пачтятано ломантненень: мезе мереви теемс, мезе а мереви, кода ветямс эсь прянть, ков пшкадемс. Полициянь важодицятне ютавтыть покш профилактика. Ды теньсэ ули смусть. Ломантнеяк полавтовсть. Сынь а пелить пшкадеме лезкс мельга полицияв, кемить тенек, сакшныть ды минь лездатано тенст.

Виктор Валентинович чачсь Отяжбуень Ботужелесэ. Школань прядомадо мейле служась армиясо. 1993 иестэ сась роботамо милицияв. Тонавтнесь РФ-нь МВД-нь Уфань высшей школасо. 1994 иестэ саезь важоди уголовной розысксэ. 2016 иестэ сонзэ ладизь полициянь отделениянь прявтокс.

Бути кортамс Дубёнкань райондонть, сон сэтьме. Малав весе преступлениятне панжовить. Оперуполномоченнойтне ломантнень содасызь, весе кортыть эрзякс, муить кель-вал, сыненст шожда роботамс.

В.В.Кабаков ёвты важодемань коряс ялгатнень туртов Уголовной розыскень чинть кувалма лембе валт:

«Ёвтан седейшкавань паро валт уголовной розысксэ важодицятненень. Кадык вадрясто важодить, тевест молест парсте, кить тейсть зыян – марявлизь чумост ды кирдевельть ответственность. Ветерантнэнень арсян кеме шумбрачи ды сэтьме эрямо!»

* * *
Дубёнкань ёнксканть 17№ полициянь отделениянь прявтонь полавтыцясь Павел Николаевич СВЯТКИН важоди тесэ 2003 иестэ саезь. Сась тей эсь мелензэ коряс, бажась важодемс полициясо. Чачсь сон Поводелесэ. Прядызе школанзо, служась армиясо. Тонавтнесь Краснослободскоень зооветеринарной техникумонь юридической отделениясо. Мейле прядсь Юстициянь министерствань Россиянь правовой академия. Эсензэ районсо ушодсь важодеме участковоекс. Павел Николаевич нейгак мельсэнзэ кирди васенце тевензэ:
 

rWihPlCG8ME

– Вейке цёрась салакшнось шабранзо кудосто чугунт. Монень стакаль ветямс те тевенть. Цёранть марто эринек ве куросо ды содылия сонзэ. Сон ней превейгадсь, паряк, те тевденть мейле полавтовськак. Теде мейле стясь виде килангс, лоткась симемадо, урьвакстсь ды вестькак мезеяк берянь эзь тее.

– Павел Николаевич, мейстэ ушодови важодемань чинк?

– Васня ванносынек районсо оперативной обстановканть: косо ды мезе теевсь. Мейле прявтонть кедьсэ юты планёрка. Тосо ташто сменась лия сменантень макссы дежурстванть. Карматано ванкшномо весе материалтнэнь. Эрьва важодицясь топавты эсь тевензэ, кармавтоманзо. Промкстонть мейле ушодтано тееме сень, мезе кармавтсь прявтось. Нама, преступленият эрсить. Ломантненень свал мертяно, кадык пшкадить тенек лезкс мельга. Участковойтне, уголовной розыскень важодицятне явить покш мель эрицятненень ды сынь кемить тенек. Лиясто сыретненень а ёвтави рузкс, мезе тенст эряви. Пшкадят тиринь кельсэ – лия тевесь. Ломанесь панжсы седеензэ ды ёвтнесы мелявксонзо. Келень содамось лезды роботасо. Эдь минек прявт тевенек – ломантнень марто важодемась.

Эрси, пшкалить тенек нитне, конатнень пансить мирдест. Васняяк неть мирдетнень марто минь кортатано, сынсь чарькодевлизь – теить апаро тев. Семиясо истя ветямс прянть а эряви. Минь тенст толковатано, мезе тень кисэ карми. Бути поладсызь апаро тевест – панжить уголовной тевгак эли административной ответственностьс тердьсызь. Ёвтнесынек закононь коряс тевтнень-валтнэнь, кода чумондовить.

Ломантне аволь весе вейкеть. Эрьва кодат. Улить истят, конат чизэнзэ кавксть сыть мезеньгак ды киньгак лангс пеняцямо. Весень кунсолосынек, кортатано.

– Кодамо тев ветяви полицейскойтнень физической анокстамост коряс?
– Физподготовкань коряс минек эрьва цетьверькстэ тонавтнемань чи. Обедс ютыть лекцият, ваннотано законодательствасо полавтоматнень ды одкстоматнень. Обедтэ мейле, бути понги леднемань чи, якатано тирэв эли лия таркав леднеме, чокшне 16:00 чассто минек юты физической анокстамо. Сон моли стадионсо эли ФОК-со. Тосо кемекстатано боевой приёмтнень, конатнень эрявить содамс эрьва полицейскоентень.



Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».